មេដឹកនាំចលនាបះបោរប្រឆាំងរដ្ឋាភិបាលចិន សុំអាជ្ញាធរត្រឡប់ចូលស្រុកវិញ
មេដឹកនាំចលនាបដិវត្តន៍និស្សិតនៅទីលាន Tiananmen និងមេដឹកនាំចលនាបះបោរប្រឆាំងក្រុងប៉េកាំងផ្សេងៗទៀត ដែលកំពុងនិរទេសខ្លួននៅបរទេស បានស្នើ និងអំពាវនាវទៅកាន់អាជ្ញាធរកាន់អំណាច សុំសិទ្ធិ និងលទ្ធភាព វិលត្រឡប់ចូលស្រុកកំណើតវិញ។ នេះបើយោងតាមការបោះផ្សាយរបស់អង្គការការពារសិទ្ធិមនុស្ស Human Rights in China នៅថ្ងៃអាទិត្យទី ៨ មេសា ឆ្នាំ២០១២នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ជាមួយនឹងការអំពាវនាវឱ្យរដ្ឋាភិបាលក្រុងប៉េកាំងបោះបង់ចោល ការអនុវត្តន៍នយោបាយចាស់គំរិល “ហាមឃាត់មិនឱ្យពួកអ្នកបះបោរចូលស្រុក” មេដឹកនាំចលនានិស្សិតដើម្បីលទ្ធិប្រជាធិបតេយ្យ និងប្រមុខដឹកនាំចលនាបដិវត្តន៍ប្រឆាំងនឹងអាជ្ញាធរចិនជាច្រើនផ្សេងទៀត មានជាអាទិ៍តំណាងក្រុមជនជាតិភាគតិចវួយហ្គួរ បានប្រកាសត្រៀមខ្លួនជាស្រេចនឹងគោរពគោលការណ៍បើកចំហនយោបាយរបស់ក្រុងប៉េកាំង និងបានបញ្ជាក់ពីចេតនាល្អ-ពិតៗ ចង់ចូលរួមដោះស្រាយវិបត្តិ ជាមួយអាជ្ញាធរដោយជាក់ស្តែង។
នៅក្នុងចំណោមមេដឹកនាំសំខាន់ៗ ដែលបានស្នើសុំការអនុញ្ញាតពីរដ្ឋាភិបាលក្រុងប៉េកាំង លទ្ធភាពអាចវិលចូលស្រុកកំណើតវិញនេះ មានម្នាក់ជាតំណាងមេដឹកនាំចលនាបដិវត្តន៍និស្សិត នៅទីលានTiananmen កាលពីឆ្នាំ១៩៨៩ គឺលោក វង់ ដាន និងម្នាក់ទៀតឈ្មោះ វូ អើ កៃស្ហ៊ី តំណាងឱ្យក្រុមអ្នកបះបោរវួយហ្គួរ ដែលកំពុងនិរទេសខ្លួននៅតែវ៉ាន់។
លោក វង់ ដាន ដែលពេលនេះបានទទួលសិទ្ធិជ្រកកោនសហរដ្ឋអាមេរិក ធ្លាប់បានដឹកនាំចលនាកូដកម្មបង្អត់អាហារខ្លួនឯង នៅទីលានTiananmen មុនកងកម្លាំងរថក្រោះចិនចេញកិនបំបែក និងកម្ទេចបាតុករនិស្សិតស្លាប់អស់ជាច្រើនពាន់នាក់នៅរវាងថ្ងៃទី៣-៤មិថុនា ១៩៨៩។ បន្ទាប់មកលោកត្រូវជាប់ពន្ធនាគារបួនឆ្នាំនៅឆ្នាំ១៩៩១ និងកាត់ទោសឱ្យជាប់ពន្ធនាគារម្តងទៀតនៅឆ្នាំ១៩៩៦ មុននឹងដោះលែងវិញ ព្រោះបញ្ហាសុខភាព នាឱកាសទស្សនកិច្ចរបស់ប្រធានាធិបតី ប៊ីល គ្លីនតុន នៅប្រទេសចិន ឆ្នាំ ១៩៩៨។
សំណើសុំរបស់ប្រមុខដឹកនាំបះបោរនេះ ធ្វើឡើងក្រោយពីនាយករដ្ឋមន្ត្រីចិន វេន ជាប៉ាវ ទើបបានលើកឡើងពីភាពចាំបាច់ ក្នុងការធ្វើកំណែទម្រង់នយោបាយចិន ប៉ុន្តែជាកំណែទម្រង់ដែលមិនប៉ះពាល់ដល់តួនាទីដឹកនាំបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ