រឿងអាស្រូវនៃការវះកាត់កែសុដន់
ក្នុងអត្ថន័យ “ការពារប្រសើរជាងព្យាបាល” រដ្ឋាភិបាលបារាំងបានចេញអនុសាសន៍ នៅថ្ងៃសុក្រទី ២៣ ធ្នូ ២០១១នេះ ឲ្យស្រ្តីដែលបានធ្វើការវះកាត់កែសម្រស់ បំប៉ោងសុដន់ ដោយដាក់ផលិតផលស៊ីលីកូន ម៉ាក PIP ត្រឡប់មកជួបគ្រូពេទ្យ ទោះគ្មានរោគសញ្ញាអ្វីគួរឲ្យកត់សម្គាល់ក៏ដោយ ដើម្បីធ្វើការត្រួតពិនិត្យ និងវះយកចេញវិញ ព្រោះផលិតផលនេះបានធ្វើឱ្យស្ត្រីបារាំងមួយចំនួនជួបបញ្ហាសុខភាពរួចទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
បន្ទាប់ពីមានរឿងអាស្រូវស្ត្រី៨នាក់ វះកាត់ពាក់ផលិតផលស៊ីលីកូន ម៉ាកPIP ដំឡើងទំហំសុដន់ កើតរោគមហារីកសុដន់មក ក្រសួងសុខាភិបាលបារាំងបានសម្រេចចេញអនុសាសន៍ ណែនាំដល់ស្ត្រីបារាំង វះកាត់ដកផលិតផលបំប៉ោងសុដន់សប្បនិម្មិតនេះចេញវិញ។
នេះជាសេចក្តីណែនាំ ក្នុងអត្ថន័យ “ការពារប្រសើរជាងព្យាបាល” ដូច្នេះស្ត្រីគ្រប់រូប ដែលបានធ្វើការវះកាត់កែសម្រស់ដើមទ្រូង ទាំងជាងបីម៉ឺននាក់ គួរតែ ទៅជួបគ្រូពេទ្យប្រចាំគ្រួសារ ឬគ្រូពេទ្យឯកទេស តាមសម្រួល ដើម្បីថតឆ្លុះ និងត្រួតពិនិត្យសុខភាពសុដន់ ទោះបីជាគ្មានស្លាកស្នាម ឬរោគសញ្ញាអ្វីក៏ដោយ។
នៅល្ងាចមិញ អ្នកវិទ្យាសាស្ត្រស្រាវជ្រាវនៃវិទ្យាស្ថានជាតិផែ្នកជំងឺមហារីក បានផ្តល់របាយការណ៍ជូនរដ្ឋាភិបាលថា “នៅពេលនេះ ពុំទាន់មានអ្វីបញ្ជាក់ និងបង្ហាញពីគ្រោះថ្នាក់ធ្ងន់ធ្ងរខ្លាំង នៃជំងឺមហារីក លើស្ត្រីពាក់ផលិតផលPIP ទេ”។ ប៉ុន្តែ ជាលើកទីមួយក្នុងប្រវត្តិវេជ្ជសាស្ត្រកែសម្រស់បារាំង ដែលមានសេចក្តីសម្រេចឲ្យវះកាត់ដកចេញដូច្នេះ។ សម្រាប់រដ្ឋាភិបាល ក៏ដូចជាអ្នកឯកទេសពាក់ព័ន្ធ ផលិតផលស៊ីលីកូន របស់ក្រុមហ៊ុនPIP ធ្វើឡើងដោយសារធាតុមិនសមស្របតាមបទដ្ឋានវេជ្ជសាស្ត្រ។ ជាហ្សែលស្អិត ដែលអាចបែកធ្លាយ បង្កឲ្យមានការរលាក និងអាចរាលដាលទៅជាជំងឺមហារីក។
សូមជម្រាបជូនថា ផលិតផល ស៊ីលីកូន PIP ដាក់ក្នុងសុដន់ ដើម្បីតំឡើងដើមទ្រូងនេះ បានទទួលការពេញនិយមយ៉ាងខ្លាំងណាស់នាឆ្នាំ២០០០ ព្រោះមានតម្លៃថោក និងជាក្រុមហ៊ុនធំទីបីនៅលើពិភពលោក ខាងផ្នែកកែសម្រស់សុដន់។ គេកំពុងព្រួយបារម្ភថា រឿងអាស្រូវនេះអាចនឹងរាលដាលកាន់តែធំ ព្រោះផលិតផល PIP នេះ មានធ្វើចរាចរណ៍ខ្លាំងប្រមាណ៨០% នៅបរទេស ក្នុងប្រទេសជាង៦០ តែត្រូវច្បាប់បារាំងរំលាយក្រុមហ៊ុនចោល បញ្ជូនទៅតុលាការតាំងពីឆ្នាំ២០១០ម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ