អន្តរជាតិប្រាប់អោយសាលាក្តីពន្លឿនសវនាការ ក្រោយការស្លាប់របស់អៀង សារី
សហគមន៍អន្តរជាតិអ្នកផ្តល់ជំនួយដល់សាលាក្តីខ្មែរក្រហម និងអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា បានចេញសេចក្តីថ្លែងការណ៍ជាបន្តបន្ទាប់ នៅថ្ងៃនេះ សម្តែងការការព្រួយបារម្ភខ្លាំងអំពីដំណើរស្វែងរកយុត្តិធម៌អោយដល់ជនរងគ្រោះ។ ក្រោយពីការស្លាប់របស់អៀង សារី សហគមន៍អន្តរជាតិហាក់កំពុងស្តីបន្ទោសតុលាការពិសេសនេះថា មានដំណើរការយឺតយ៉ាវក្នុងការបញ្ចប់សវនាការ ខណៈជនជាប់ចោទកាន់តែមានវ័យចំណាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
តុលាការខ្មែរក្រហមកំពុងតែស្ថិតនៅក្នុងស្ថានភាពលំបាក។ វិបត្តិថវិកា ជនជាប់ចោទអៀង សារី បានស្លាប់ និងបន្ទាប់មក សហគមន៍អន្តរជាតិកំពុងធ្វើសេចក្តីថ្លែងការណ៍ស្តីបន្ទោសអំពីភាពយឺតយ៉ាវនៅក្នុងដំណើរការកាត់ក្តីអតីតមេដឹកនាំរបបខ្មែរក្រហម។
ការស្តីបន្ទោសត្រូវបានគេមើលឃើញ នៅក្នុងសេចក្តីថ្លែងការណ៍រួមមួយរបស់ប្រទេសបារាំង និងប្រទេសជប៉ុន និងនៅក្នុងសេចក្តីថ្លែងការណ៍របស់លោក ស៊ូរិយ៉ា សូបេឌី អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា។ ប្រទេសទាំងពីរ បារាំងនិងជប៉ុន ដែលតំណាងអោយប្រទេសអ្នកផ្តល់ជំនួយអោយសាលាក្តីនោះ បានសម្តែងការសោកស្តាយចំពោះមរណភាពរបស់ជនជាប់ចោទអៀង សារី អតីតរដ្ឋមន្ត្រីការបរទេសរបបខ្មែរក្រហម ដែលជាមនុស្សសំខាន់មួយនៅក្នុងសំណុំរឿង ០០២។
ប៉ុន្តែតំណាងប្រទេសអ្នកផ្តល់ជំនួយទាំងពីរនេះបាននិយាយថា វាជាការបន្ទាន់ជាងពេលណាៗទាំងអស់ ដែលតួអង្គពាក់ព័ន្ធនានានៅក្នុងអង្គជំនុំជម្រះវិសាមញ្ញ ក្នុងតុលាការកម្ពុជា ត្រូវទទួលខុសត្រូវលើភារកិច្ចរបស់ខ្លួន ដើម្បីធ្វើយ៉ាងណាឲ្យសវនាការកាត់ទោសជនជាប់ចោទដែលនៅសល់ អាចដំណើរការបានដោយត្រឹមត្រូវមានប្រសិទ្ធភាព និងលឿនទៅមុខ និងដើម្បីឲ្យយុត្តិធម៌ដែលគេទន្ទឹងរង់ចាំជាយូរមកហើយនោះ ក្លាយទៅជាការពិតនៅកម្ពុជា។
អ្នករាយការណ៍ពិសេសរបស់អគ្គលេខាធិការអង្គការសហប្រជាជាតិលោក ស៊ូរិយ៉ា ស៊ូបេឌី ឯណោះវិញបានអំពាវនាវពីទីក្រុងហ្សឺណែវដល់គ្រប់តួអង្គទាំងអស់ រួមទាំងសហគមន៍អន្តរជាតិទាំងមូល អោយប្តេជ្ញាឡើងវិញ ក្នុងការឧបត្ថម្ភគាំទ្រតុលាការខ្មែរក្រហម ដើម្បីតុលាការនេះអាចបំពេញការងាររបស់ខ្លួនដោយឯករាជ្យពេញលេញបាន។ លោកស៊ូបេឌី រម្លឹកថា អ្នកពាក់ព័ន្ធនឹងតុលាការពិសេសនេះកំពុងជំពាក់ជនរងគ្រោះដែលបានរួចផុតពីការកាប់សម្លាប់នៃរបបខ្មែរក្រហម ក្រុមគ្រួសាររបស់ជនរងគ្រោះ និងជំពាក់សង្គមកម្ពុជាទាំងមូលដែលកំពុងរងទុក្ខពីបច្ច័យនៃរបបខ្មែរក្រហម រហូតដល់សព្វថ្ងៃនេះ។ ចំពោះលោកស៊ូបេឌី ការស្លាប់របស់អៀង សារី ក្នុងដំណាក់កាលនៃការកាត់ក្តីមានន័យថា គាត់មិនបានទទួលការវិនិច្ឆ័យទោស នោះឡើយ។
សាលាក្តីខ្មែរក្រហមមិនបដិសេធរាល់ការរិះគន់ទាំងនេះទេ នេះបើតាមការបញ្ជាក់របស់អ្នកនាំពាក្យសាលាក្តីខ្មែរក្រហម លោកនេត ភក្ត្រា នៅថ្ងៃនេះ។ ប៉ុន្តែអ្នកនាំពាក្យរូបនេះ បានទាញចំណាប់អារម្មណ៍សហគមន៍អន្តរជាតិអោយពិនិត្យមើលឡើងវិញដែរលើការខិតខំរបស់សាលាក្តី។ សម្រាប់លោកនេត ភក្ត្រា គ្រប់ដំណាក់កាលនៅក្នុងសាលាក្តីកូនកាត់មួយនេះ ត្រូវបានអនុវត្តតាមនីតិវិធីទាំងអស់ ដើម្បីធ្វើយ៉ាងណាអោយដំណើរការនោះប្រព្រឹត្តិទៅដោយប្រសិទ្ធភាព ឆ្លើយតបទៅនឹងផលប្រយោជន៍យុត្តិធម៌របស់គ្រប់ភាគី។ លោកនេត ភក្ត្រា បញ្ជាក់ថា តុលាការមិនចង់បានដំណើរលឿនពេកដែលធ្វើអោយមានភាពថ្លោះធ្លោយនោះឡើយ។
និយាយអំពីសពរបស់លោកអៀង សារី វិញ។ សាកសពត្រូវបានបញ្ជូនទៅដល់ផ្ទះធ្វើបុណ្យក្នុងស្រុកម៉ាឡៃហើយ។ លោកអាង ឧត្តម អតីតសហមេធាវីជាតិរបស់អៀង សារី បានប្រាប់អោយដឹងថា ពិធីបូជាសពលោកអៀង សារី អាចរៀបចំធ្វើនៅថ្ងៃទី២១ មិនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ