តុលាការកំពូលបង្គាប់ឲ្យផ្អាកការដោះលែងលោកស្រី អៀង ធីរិទ្ធិ
តុលាការកំពូលនៃសាលាក្តីខ្មែរក្រហមបានបង្គាប់នៅថ្ងៃនេះឲ្យផ្អាកជាបណ្តោះអាសន្នការដោះលែងលោកស្រីអៀង ធីរិទ្ធិ។ ការបង្គាប់ដូច្នេះបានធ្វើឡើងបន្ទាប់ពីអង្គ ជំនុំជម្រះសាលាដំបូងបានសម្រេចដោះលែងលោកស្រី អៀង ធីរិទ្ធិ ក្រោមហេតុផលសុខភាព ប៉ុន្តែ សហព្រះរាជអាជ្ញាបានប្តឹងជំទាស់។ តុលាការកំពូលមានរយៈពេល១៥ថ្ងៃដើម្បីសម្រេចរឿងដោះលែងលោកស្រីអៀង ធីរិទ្ធិ។ នៅថ្ងៃអាទិត្យនេះដែរ ក្រុមជនរងគ្រោះបានជួបជុំគ្នានៅវាលពិឃាតជើងឯកដើម្បីឧទ្ទិសកុសលដល់អ្នកស្លាប់ និងបានជំរុញឲ្យតុលាការពន្លឿននីតិវិធីរបស់ខ្លួនខណៈដែលជនជាប់ចោទកាន់តែចាស់ជរាណាស់ទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ក្រោយទទួលបានពាក្យបណ្តឹងជំទាស់របស់សហព្រះរាជអាជ្ញា តុលាការកំពូលនៃសាលាក្តីខ្មែរក្រហមបានបង្គាប់នៅថ្ងៃនេះឲ្យផ្អាកជាបណ្តោះអាសន្នការដោះលែងលោកស្រី អៀង ធីរិទ្ធិ។ តុលាការកំពូលបានបង្គាប់ឲ្យបន្តឃុំខ្លួនលោកស្រីអៀង ធីរិទ្ធិ រហូតដល់ពេលដែលអង្គជំនុំជម្រះតុលាការកំពូលសម្រេចចំពោះពាក្យបណ្តឹងជំទាស់របស់សហព្រះរាជអាជ្ញា។ នេះបើយោងតាមការឲ្យដឹងរបស់លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម។ មន្ត្រីអ្នកនាំពាក្យបានឲ្យដឹងទៀតថា តុលាការកំពូលមានរយៈពេល១៥ថ្ងៃ ដើម្បីសម្រេចពាក្យបណ្តឹងជំទាស់នេះ។
លោកស្រី អៀង ធីរិទ្ធិ អាយុ៧៩ឆ្នាំ អតីតរដ្ឋមន្ត្រីសង្គមកិច្ចខ្មែរក្រហម និងជាជនជាប់ចោទម្នាក់ក្នុងចំណោម៤នាក់ក្នុងសំណុំរឿង០០២ត្រូវបានអង្គជំនុំជម្រះសាលាដំបូងសម្រេចដោះលែងវិញដោយសារតែគ្រូពេទ្យជំនាញបានរកឃើញថា លោកស្រីមានជំងឺវង្វេងវង្វាន់បាត់ការចងចាំដែលមិនអាចយកមកកាត់ទោសបានទេ។ ប៉ុន្តែ សហព្រះរាជអាជ្ញាគឺលោកស្រី ជា លាង និង លោក Andrew Carley បានសម្រេចប្តឹងជំទាស់ភ្លាមៗកាលពីល្ងាចថ្ងៃសុក្រចំពោះការដោះលែងលោកស្រីអៀង ធីរិទ្ធិ។
មុននឹងចាប់ផ្តើមសវនាការលើអង្គសេចក្តីសំណុំរឿង០០២នៅថ្ងៃស្អែក សាលាក្តីខ្មែរក្រហមក៏បានរៀបចំសន្និសីទកាសែតមួយនៅរសៀលថ្ងៃអាទិត្យនេះនៅទីក្រុងភ្នំពេញដើម្បីប្រកាសប្រាប់អ្នកកាសែតអំពីនីតិវិធី និងរបៀបវារៈរបស់អង្គសវនាការសំណុំរឿង០០២។ លោក នេត្រ ភក្ត្រា បានបា្រប់ឲ្យដឹងថា សវនាការនៅថ្ងៃស្អែកនេះ មានជនជាប់ចោទតែ៣នាក់ប៉ុណ្ណោះគឺ លោក នួន ជា ខៀវ សំផន និងអៀង សារី។
នៅព្រឹកថ្ងៃអាទិត្យនេះដែរ ក្រុមជនរងគ្រោះដែលជាដើមបណ្តឹងរដ្ឋប្បវេណីប្រមាណជា២០០នាក់បានជួបជុំគ្នានៅមជ្ឈមណ្ឌលប្រល័យពូជសាសន៍ជើងឯក ជាយក្រុងភ្នំពេញ ដើម្បីសូត្រមន្តឧទ្ធិសកុសលដល់វិញ្ញាណក្ខន្ធអ្នកស្លាប់។ ពួកគេក៏បានសម្តែងការព្រួយបារម្ភចំពោះយុត្តិធម៌ក្នុងសំណុំរឿងខ្មែរក្រហមខណៈដែលជនជាប់ចោទកាន់តែមានវ័យចាស់ជរាណាស់ទៅហើយ។ លោក ជុំ ម៉ី អតីតអ្នកទោសគុកទួលស្លែងដែលបានរួចជីវិតពីការកាប់សម្លាប់បានជំរុញឲ្យតុលាការពន្លឿននីតិវិធីសំណុំរឿង០០២ឲ្យបានឆាប់បំផុតពីព្រោះថា វ័យចាស់ជរារបស់ជនជាប់ចោទអាចនឹងបង្កបញ្ហាដល់ដំណើរការស្វែងរកយុត្តិធម៌។ ការដោះលែងលោកស្រី អៀង ធីរិទ្ធ គឺជាមូលហេតុដែលនាំឲ្យជនរងគ្រោះមានការព្រួយបារម្ភកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ