តុលាការខ្មែរក្រហមទទួលបានជំនួយ១លាន៦សែនដុល្លារទៀត
ប្រទេសអង់គ្លេស និងអៀរឡង់ខាងជើងបានប្រកាសផ្តល់ជំនួយហិរញ្ញវត្ថុ១លានផោន ដែលមានតម្លៃប្រមាណ១លាន៦សែនដុល្លារបន្ថែមទៀតដល់តុលាការខ្មែរក្រហម។ ប៉ុន្តែជំនួយនេះត្រូវបានផ្តល់ដល់ភាគីអន្តរជាតិប៉ុណ្ណោះ។ មន្ត្រីសាលាក្តីពិសេសសម្រាប់កាត់ទោសអតីតមេដឹកនាំជាន់ខ្ពស់របបខ្មែរក្រហមបានស្វាគមជំនួយនេះ ហើយបានធ្វើអត្ថាធិប្បាយថាជំនួយនេះធ្លាក់មកចំពេលវេលាដ៏សំខាន់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
អង្គជំនុំជម្រះវិសាមញ្ញក្នុងតុលាការកម្ពុជាដែលគេស្គាល់ថា ជាតុលាការខ្មែរក្រហមនោះ បានទទួលជំនួយហិរញ្ញវត្ថុ១លានផោនថែមទៀត ដែលមានតម្លៃប្រមាណ១លាន៦សែនដុល្លារ។ នេះជាជំនួយរបស់រដ្ឋាភិបាលប្រទេសអង់គ្លេស និងអៀរឡង់ខាងជើង ដែលបញ្ជាក់ថា ជំនួយខាងលើនេះ នឹងត្រូវផ្តល់ទៅអោយភាគីអន្តរជាតិនៃតុលាការនេះតែប៉ុណ្ណោះ។ ជំនួយចុងក្រោយនេះ បានធ្វើអោយទំហំនៃជំនួយរបស់ចក្រភពអង់គ្លេសចំពោះសាលាក្តីខ្មែរក្រហមកើនឡើងដល់៥លាន៧សែនដុល្លារ។
ប្រធានរដ្ឋបាលស្តីទី លោក ក្រាញ់ តូនី និងអនុប្រធានរដ្ឋបាលនៃសាលាក្តីខ្មែរលោក ឃ្នុត រ៉ូសិនហក បានអរគុណចំពោះទឹកចិត្តសប្បុរសរបស់ចក្រភពអង់គ្លេស ហើយថាជំនួយនៅពេលនេះត្រូវបានធ្វើឡើងចំពេលវេលាដ៏សំខាន់ ពោលគឺនៅពេលដែលតុលាការពិសេសនេះ កំពុងតែត្រៀមរៀបចំប្រកាសសាលដីកាចំពោះបណ្តឹងឧទ្ធរណ៍របស់ឌុច និងនៅចំពេលដែលតុលាការនេះចាប់ផ្តើមសវនាការសំណុំរឿង០០២។ សំណុំរឿង០០២ដែលមានជនជាប់ចោទ ខៀវ សំផន នួន ជា អៀង សារី និងអៀង ធីរិទ្ធ។
សម្រាប់សាលាក្តីខ្មែរក្រហម ចក្រភពអង់គ្លេស គឺជាម្ចាស់ជំនួយដ៏ធំមួយក្នុងចំណោមម្ចាស់ជំនួយធំៗនានា ដែលបានគាំទ្រសាលាក្តីខ្មែរក្រហម ចាប់តាំងពីការកកើតសាលាក្តីនេះមក។
កាលពីខែមករាកន្លងទៅ ប្រទេសជប៉ុនបានសន្យាផ្តល់ជំនួយជាង១១លាន៧សែនដុល្លារដល់សាលាក្តីខ្មែរក្រហមសម្រាប់ដំណើរការក្នុងឆ្នាំ២០១១នេះតែម្តង។ ក្នុងនោះ ៨លាន៧សែនដុល្លារត្រូវផ្តល់អោយហោប៉ៅភាគីអន្តរជាតិ និង២លាន៩សែនដុល្លារសម្រាប់ហោប៉ៅភាគីជាតិ។
ដើម្បីទ្រទ្រង់ដំណើរការតុលាការចម្រុះកាត់ទោសមេខ្មែរក្រហមក្នុងឆ្នាំ២០១១នេះ ខាងភាគីអង្គការសហប្រជាជាតិ ត្រូវការថវិកាជាង ៣៥ លានដុល្លារ។ រីឯភាគីកម្ពុជា ត្រូវការជាង ១០,៥ លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ