អតីតរដ្ឋមន្រ្តីយុត្តិធម៌លីប៊ី៖ កាដាហ្វីនឹងអាចសម្លាប់ខ្លួនឯងដូច ហ៊ីត្លែ
សហគមន៍អន្តរជាតិ ជាពិសេសអង្គការសហប្រជាជាតិបានមានប្រតិកម្មជាបន្តបន្ទាប់ និងថ្កោលទោសទៅលើអំពើហិង្សាដែលក្រុមអ្នកគាំទ្រលោកកាដាហ្វី បានប្រព្រឹត្តទៅលើប្រជាជន។ កាលពីថ្ងៃពុធទី ២៤ កុម្ភៈ លោកប្រធានាធិបតីអាមេរិក លោកបារ៉ាក់ អូបាម៉ា ទើបបានចេញមុខប្រកាសថា ការសម្លាប់បង្ហូរឈាមលើប្រជាជនស៊ីវិលលីប៊ី គឺជារឿងបំពានមួយដ៏ធ្ងន់ធ្ងរ និងមិនអាចទទួលយកបានទេ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ឈាង បុប្ផា
ជា លើកទីមួយដែលលោកអូបាម៉ាបានចេញមុខថ្លែង ជាសាធារណៈ ថា ទុក្ខវេទនា និងការស្លាប់ក្នុងថ្លុកឈាមរបស់ប្រជាជនលីប៊ី គឺជារឿង មួយដែលមិនអាចទទួលយកបាន។ កាលពីប៉ុន្មានថ្ងៃក្រោយដែលបាតុកម្ម និងការបះបោរ បានផ្ទុះឡើង នៅថ្ងៃទី ១៥កុម្ភៈ នៅ លីប៊ី លោកអូបាម៉ាគ្រាន់តែបានចេញសេចក្តីថ្លែងការណ៍ថ្កោលទោសអំពើហិង្សា និងអំពាវនាវឲ្យលោកកាដាហ្វី ធ្វើការឆ្លើបតបទៅនឹងការទាមទាររបស់ប្រជាជនតែប៉ុណ្ណោះ។
នៅក្នុងការថ្លែងនៅថ្ងៃពុធទី លោកបារ៉ាក់អូបាម៉ាមិនបាននិយាយរិះគន់ចំៗ សំដៅឈ្មោះលោកកាដាហ្វី ទេ។ លោកគ្រាន់តែបាននិយាយថា ទង្វើបង្រ្កាបដ៏បង្ហូរឈាមរបស់ទាហាន ទៅលើប្រជាជនដែលស្រលាញ់សេរីភាព គឺជារឿងមួយដែលខុសធ្ងន់ធ្ងរប៉ុណ្ណោះ។ ប្រតិកម្មរបស់ប្រធានាធិបតីអាមេរិកាំង នៅពេលនេះ ធ្វើឡើងនៅពេលដែលតួលេខរបស់ជនរងគ្រោះស្លាប់ក្នុងថ្លុកឈាម បានកើនជាង ៦០០នាក់ នេះបើតាមអង្គការសហព័ន្ធអន្តរជាតិដើម្បីសិទ្ធិមនុស្ស។
ក្នុងករណីលីប៊ី អាមេរិកហាក់មានការប្រយ័ត្នប្រយែង មិនទាន់ចង់ចេញមុខប្រតិកម្មអ្វីខ្លាំងក្លា ព្រោះចង់ ឬមិនចង់ អាមេរិកជាអតិថិជនដែលត្រូវការទិញប្រេងពីលោកកាដាហ្វី។ ប៉ុន្តែ អាមេរិកពេលនេះ បានចេញមុខរិះគន់របបលីប៊ីបច្ចុប្បន្ន ព្រោះ ទីមួយ តំបន់ភាគខាងលិចរបស់លីប៊ី ដែលសំបូរប្រេងនោះ ក៏កំពុងធ្លាក់ក្នុងកណ្តាប់ដៃរបស់ពួកប្រឆាំងនឹងលោកកាដាហ្វី។ ទីពីរ គឺអាមេរិកបានឃើញប្រទេសគ្រប់គ្នា ជាពិសេសសហព័ន្ធអារ៉ាប់ និងសហគមន៍បណ្តាប្រទេសអាហ្វ្រិក ដែលធ្លាប់ជាសម្ព័ន្ធមិត្តរបស់លោកកាដាហ្វី ចាប់ផ្តើមបោសដៃ បោះបង់ចោលលោកកាដាហ្វី។
នៅថ្ងៃពុធ ២៣ កុម្ភៈ លោកអូបាម៉ាបានថ្លែងថា លោកនឹងបញ្ជូនប្រមុខការទូតអាមេរិក គឺលោកស្រីហ៊ីឡារី គ្លីនតុន ឲ្យទៅរដ្ឋមន្រ្តីការបរទេសរបស់ប្រទេសសហគមន៍អឺរ៉ុប នៅចុងសប្តាហ៍នេះ ដើម្បីពិភាក្សាពីវិបត្តិ នៅលីប៊ី។ លោកអូបាម៉ាបញ្ជាក់ថា តួនាទីរបស់លោកស្រីHillary Clintons ពេលនេះ គឺធានាយ៉ាងណា ឲ្យសហគមន៍អន្តរជាតិមានសម្លេងតែមួយទៅកាន់រដ្ឋាភិបាលរបស់លីប៊ី និងប្រជាជនរបស់ប្រទេសនេះ។
ហើយបើតាមអាមេរិក គឺមានតែអឺរ៉ុបទេដែលអាចចេញបញ្ជាបិទតំបន់ហោះហើរនៅម្តុំសមុទ្រ មេឌីទែរ៉ាណេ។ ការបិទតំបន់ហោះហើរ នេះក៏ជាការទទូចសុំពីក្រុមប្រឆាំងលីប៊ីដែរ ព្រោះក្នុងអំពើហិង្សាប៉ុន្មានថ្ងៃនេះ លោកកាដាហ្វីប្រើប្រាស់តំបន់ហោះហើរនោះ ប្រហារពីយន្តហោះទៅលើក្រុមអ្នកបះបោរនៅភាគខាងលិចប្រទេសលីប៊ី។
អំណាចរបស់លោកកាដាហ្វីរហូតមកដល់ថ្ងៃនេះ បានរួមថយ។តំបន់ ភាគខាងកើត ជាពិសេសទីក្រុងបិនហ្គាហ្ស៊ី ដែលជាទីក្រុងធំទីពីរ របស់លីប៊ី និងដែលបានចេញមុខបះបោរមុនគេ តាំងពីថ្ងៃទី ១៥កុម្ភៈមក ពេលនេះ បានធ្លាក់ក្នុងដៃរបស់ក្រុមប្រឆាំង។ នៅតំបន់ភាគខាងកើត ទាហានដែលកាលពីដំបូងឡើយបានធ្វើការបង្ក្រាបលើហ្វូងបាតុករ បានសម្រេចបោះចោលអាវុធ លែងបាញ់ប្រហារទៅលើប្រជាជន ទៅតាមការបញ្ជារបស់អគ្គបញ្ជាការជាតិ។ បន្ទាយទាហាន ពេលនេះ ស្ងាត់ជ្រងំ ឬត្រូវកាន់កាប់ដោយក្រុមអ្នកប្រឆាំង។ ទាហានជាច្រើនដែលបានបោះឯកសណ្ឋានចោល និងដែលរត់ចូលមកគាំទ្រក្រុមប្រឆាំង វិញ បាននិយាយថា ពួកគេធ្វើដូច្នេះ បន្ទាប់ពីបងប្អូន សាច់ញាតិ ឬអ្នកជិតខាងរប៊ស់ពួកគេ ទាហានស្ម័គ្រស្មោះ និងទាហានស៊ីឈ្នួលរបស់លោកកាដាហ្វី បាញ់សម្លាប់នៅទីក្រុងបិនហ្គាហ្ស៊ី។
នៅតាមផ្លូវ ក្នុងទីក្រុងមួយទៀត គឺទីក្រុងTobrouk គេឃើញក្រុមបះបោរមានកាន់អាវុធរបស់ទាហានក្នុងដៃ។ ពួកគេស្រែកគ្រវី ទង់ជាតិដែលតំណាងឲ្យរបបរាជានិយម លិប៊ី ដែលត្រូវលោកកាដាហ្វីធ្វើរដ្ឋប្រហារដណ្តើមអំណាចនៅឆ្នាំ ១៩៦៩។ ក្រោមការគ្រប់គ្រងរបស់ពួកអ្នកប្រឆាំង តំបន់ភាគខាងកើតនេះត្រូវបានបើកទូលាយ ដល់អ្នកយកព័ត៌មានបរទេស ដែលកន្លងមកធ្លាប់តែត្រូវលោកកាដាហ្វី ហាមឃាត់មិនឲ្យមានព័ត៌មានលេចខ្ចរខ្ចាយទៅក្រៅ។ ប្រជាជនស្វាគមន៍អ្នកកាសែតដោយស្រែកថា ពីពេលនេះទៅ ពួកគេលែងជាទាសកររបស់លោកកាដាហ្វីទៀតហើយ។
ក្រៅតែបាត់បង់ទឹកដីគ្រប់គ្រង អំណាចរបស់លោកកាដាហ្វី ក៏ត្រូវរង្គោះរង្គើមិនរឹងមាំ ជាពិសេសនៅពេលពួកកុលសម្ព័ន្ធលីប៊ីមួយចំនួន ដែលរកស៊ីខាងប្រេង បានប្រកាសនៅថ្ងៃនេះថា ពួកគេលែងគាំទ្រលោកកាដាហ្វីទៀត ហើយ។ ពួកកុលសម្ព័ន្ធដែលធ្លាប់ធ្វើការជាមួយលោកកាដាហ្វី និយាយថា ពួកគេមិនអាចនៅឈរមើលលោកកាដាហ្វីឈរបញ្ជាឲ្យទាហានបរទេស គឺទាហានស៊ីឈ្នួលអាហ្រ្វិកបាញ់សម្លាប់ប្រជាជនលីប៊ី ដែលជាសាសន៍ឯងនោះទេ។
លោកកាដាហ្វី មិនទាន់ទាល់ច្រកខ្លាំងណាស់ណាមែន ប៉ុន្តែ ការចលនាលែងឈប់គាំទ្រលោក មានកាន់តែច្រើនឡើង ក្នុងចំណោមអ្នកគាំទ្ររបស់លោក លោកកាដាហ្វីអាចនឹងឈានដល់ដំណាក់កាលមួយគឺទឹកដល់ច្រមុះ។ បើតាមរដ្ឋមន្រ្តីយុត្តិធម៌លីប៊ីដែលបាននិយាយប្រាប់អ្នកកាសែតបរទេស នៅថ្ងៃព្រហស្បតិ៍នេះ លោកកាដាហ្វីអាចនឹងធ្វើអត្តឃាតសំលាប់ខ្លួនឯង ដូចជាហ៊ីត្លែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ