ជប៉ុនកោះហៅឯកអគ្គរាជទូតរបស់ខ្លួនប្រចាំម៉ូស្គូឲ្យចូលប្រទេសវិញ
នៅព្រឹកថ្ងៃអង្គារនេះ ក្រសួងការបរទេសជប៉ុនបានសម្រេចកោះហៅឯកអគ្គរាជទូតរបស់ខ្លួនប្រចាំទីក្រុងម៉ូស្គូឲ្យត្រលប់ចូលប្រទេសវិញ។ ជប៉ុនហៅឯកអគ្គរាជទូតរបស់ខ្លួនចូលស្រុកវិញ ដើម្បីបង្ហាញនូវការមិនសប្បាយចិត្តរបស់ខ្លួននឹងរុស្ស៊ីផង និងដើម្បីចង់ដឹងលំអិតពីគោលបំណងពិតប្រាកដនៃទស្សនកិច្ចរបស់ លោកមេដវេដេវ ប្រធានាធិបតីរុស្ស៊ី នៅប្រជុំកោះ គួរីល កាលពីថ្ងៃចន្ទម្សិលមិញផង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
ដំណើរទស្សនកិច្ចរបស់លោក មេដវេដេវ (Medvedev) ប្រធានាធិបតីរុស្ស៊ី នៅប្រជុំកោះ គួរីល កាលពីថ្ងៃចន្ទម្សិលមិញ ធ្វើឲ្យជប៉ុនអាក់អន់ស្រពន់ចិត្តមិនតិចទេ។ ភ្លាមៗ រដ្ឋាភិបាលជប៉ុនបានកោះហៅឯកអគ្គរដ្ឋទូតរុស្ស៊ីប្រចាំទីក្រុងតូក្យូឲ្យចូលបំភ្លឺបកស្រាយពីវត្តមានរបស់ប្រធានាធិបតីរុស្ស៊ី នៅលើប្រជុំកោះគួរីលដែលជប៉ុនកំពុងទាមទារយកមកគ្រប់គ្រងវិញ។
នៅថ្ងៃនេះទៀត ក្រសួងការបរទេសជប៉ុនបានកោះហៅឯកអគ្គរាជទូតរបស់ខ្លួនប្រចាំម៉ូស្គូឲ្យត្រលប់ចូលប្រទេសវិញ ជាបណ្តោះអាសន្ន។ រដ្ឋមន្រ្តី ការបរទេសជប៉ុនលោក Seiji Maehara បានប្រាប់អ្នកយកព័ត៌មាន នៅ ព្រឹកថ្ងៃអង្គារនេះថា លោកចង់ពិភាក្សាជាមួយឯកអគ្គរាជទូតរបស់ខ្លួនស្តីពីវត្តមានរបស់លោកមេដវេដេវ នៅប្រជុំកោះ គួរីល។
ចំណែករុស្ស៊ីវិញបាននិយាយតបភ្លាម ដោយចាត់ទុកប្រតិកម្មរបស់ជប៉ុនថា ជារឿងមួយដែលមិនអាចទទួលយកបាន។ សម្រាប់រុស្ស៊ី វាគ្មានរឿងអ្វីដែលខុសឆ្គងទេ ដែលប្រធានាធិបតីរុស្ស៊ីធ្វើទស្សនកិច្ចនៅលើកោះមួយនៃប្រជុំកោះ គួរីលដែលជាទឹកដីរបស់រុស្ស៊ី។ ម្យ៉ាងទៀត នៅថ្ងៃអង្គារនេះ រុស្ស៊ីបានចាត់ទុកការកោះហៅឯកអគ្គរាជទូតជប៉ុនដោយក្រសួងការបរទេសជប៉ុនថា ជារឿងធម្មតាមួយ។
សម្រាប់អ្នកវិភាគមួយចំនួនជម្លោះដណ្តើមកោះរវាងរុស្ស៊ី និងជប៉ុន ជាជម្លោះមួយដែលមិនងាយនឹងដោះស្រាយចេញបាន។ ក្នុងជម្លោះដណ្តើមប្រជុំកោះគួរីល រុស្ស៊ីធ្លាប់បានយល់ព្រមប្រគល់កោះ ២ ក្នុងចំណោមកោះចំនួន៤ដែលជប៉ុនទាមទារ។ ប៉ុន្តែជប៉ុនមិនព្រមទទួលយកសំណើនោះទេ ព្រោះថា កោះ ២ដែលរុស្ស៊ីព្រមប្រគល់ឲ្យ តំណាងឲ្យតែ ៧ភាគរយប៉ុណ្ណោះនៃទឹកដីប្រជុំកោះ គួរីលសរុប។
ក្នុងរឿងជម្លោះទឹកដីនេះដែរ នាយករដ្ឋមន្រ្តីជប៉ុន និងប្រធានាធិបតីរុស្ស៊ីអាចនឹងជួបពិភាក្សាទេ្វភាគី នៅក្រៅក្របខ័ណ្ឌ នៃកិច្ចប្រជុំកំពូលសេដ្ឋកិច្ចអាស៊ីប៉ាស៊ីហ្វិក ដែលនឹងធ្វើឡើងនៅពាក់កណ្តាលខែវិច្ឆិកាខាងមុខនេះ។ យោងតាម អ្នកនាំពាក្យរបស់រដ្ឋាភិបាលជប៉ុន ការថ្នាក់ថ្នាំងចិត្តគ្នា នៅពេលនេះ នឹងមិនធ្វើឲ្យរំខានដល់ជំនួបរវាងថ្នាក់ដឹកនាំរបស់ប្រទេសទាំងពីរទេ ហើយក៏នឹងមិនធ្វើឲ្យប៉ះពាល់ដល់ទំនាក់ទំនងពាណិជ្ជកម្មដ៏សំខាន់រវាងប្រទេសទាំងពីរដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ