តូក្យូដោះលែងអ្នកនេសាទចិន តែវិបត្តិការទូតនៅតែដុនដាប
ថ្ងៃសុក្រទី ២៤កញ្ញានេះ ជប៉ុនបានសម្រេចដោះលែងអ្នកបើកបរកប៉ាល់នេសាទចិន ដែលត្រូវឃាត់ខ្លួនពីបទបានបើកកប៉ាល់ទៅបុកនាវាល្បាតជប៉ុន ក៏ប៉ុន្តែវិបត្តិការទូតដ៏ធ្ងន់ធ្ងរមិនធ្លាប់មានគិតចាប់ពីឆ្នាំ ២០០៦មក រវាងប្រទេសទាំងពីរនេះ មិនបានធូរស្រាល ប្រសើរឡើងវិញទេ។ ចិនបន្តធ្វើការសងសឹកដាក់គំនាបលើជប៉ុនទាំងផ្នែកការទូតនិង សេដ្ឋកិច្ច ព្រមទាំងបានចាប់ខ្លួនជនជាតិជប៉ុនបួននាក់នៅថ្ងៃម្សិលមិញ ពីបទចារកិច្ច។
ចុះផ្សាយនៅថ្ងៃ៖
សេចក្តីរាយការណ៍របស់ អៀង សុខម៉ិញ
"ដោយយល់ពីផលប៉ះពាល់ចំពោះប្រជាជនជប៉ុន និងពីផលវិបាកក្នុងទំនាក់ទំនងចិន-ជប៉ុន វាគ្មានប្រយោជន៍អ្វីនឹងត្រូវបន្តឃុំខ្លួន និងសួរចម្លើយអ្នកបើកបរកប៉ាល់នេសាទចិនទៀតឡើយ !" នេះជាហេតុផលរបស់ ព្រះអាជ្ញាជប៉ុន ដែលបានប្រកាសដោះលែងអ្នកបើកបរនោះវិញ ដោយបានគូសបញ្ជាក់បន្ថែមទៀតថា ជនជាប់សង្ស័យចិននេះគ្រាន់តែជាអ្នកបើកបរកប៉ាល់ម្នាក់ ដែលរត់គេចខ្លួនពីការក្រុមត្បាតសមុទ្ទប៉ុណ្ណោះ គ្មានចេតនាគិតទុកជាមុនចង់បុកនាវាជប៉ុនទេ! ប៉ុន្តែសេចក្តីសម្រេចរបស់ជប៉ុននៅថ្ងៃនេះ អាចបិទបញ្ចប់ភាពតានតឹងបានដោយស្រួលឡើយ។
សូមជម្រាបថា ឧប្បត្តិហេតុចាប់ខ្លួនអ្នកបើកបរកប៉ាល់នេសាទ កាលពីថ្ងៃទី៧ កញ្ញា ២០១០ បានរុញច្រានប្រទេសទាំងពីរឲ្យធ្លាក់ចូលក្នុងវិបត្តិការទូតមួយដ៏ធ្ងន់ធ្ងរ ! ពីមួយថ្ងៃទៅមួយថ្ងៃ ចិនបានបង្កើនការប្រឆាំងជប៉ុនកាន់តែខ្លាំងឡើងៗ មិនធ្លាប់មានគិតចាប់ពីឆ្នាំ២០០៦មក។
ទំនងជារបៀបមួយនៃការសងសឹកគ្នា ! នៅថ្ងៃនេះជប៉ុនបានបញ្ជាក់ថា ជនជាតិជប៉ុនបួននាក់ពិតជាបានត្រូវក្រុងប៉េកាំងចាប់ខ្លួន ពីបទសង្ស័យបានលបលួចចូលក្នុងតំបន់ហាមឃាត់ ដោយគ្មានការអនុញ្ញាត។
ក្នុងនាមជាប្រទេសមហាអំណាចសេដ្ឋកិច្ចនៅក្នុងតំបន់ និងនៅលើពិភពលោក រឿងតូចតែរីករាលដាលជាធំនេះ បានប៉ះពាល់យ៉ាងខ្លាំងដល់វិស័យសេដ្ឋកិច្ច ជាពិសេសជប៉ុនដែលពឹងផ្អែកកាន់តែខ្លាំងឡើងលើអ្នកជិតខាងចិន។ ជាថ្មីម្តងទៀត រដ្ឋមន្ត្រីជប៉ុនបានអះអាងនៅថ្ងៃសុក្រនេះថា ចិនបានបញ្ឈប់ការនាំចេញរ៉ែកម្រសម្រាប់ដំណើរការឧស្សាហកម្មមកឲ្យជប៉ុន ប៉ុន្តែក្រសួងពាណិជ្ជកម្មចិនបានបដិសេធទាំងស្រុងព័ត៌មាននេះ។
ប្រសិនបើចិនប្រើវិធានការផ្អាកឬបញ្ឈប់ការនាំរ៉ែទៅជប៉ុន ដែលហាមឃាត់ដោយអង្គការពាណិជ្ជកម្មពិភពលោក វិបត្តិចិន-ជប៉ុនមិនអាចបញ្ចប់បានត្រឹមណេះទេ ជប៉ុនអាចប្រើសិទ្ធិស្របច្បាប់ប្រឆាំងនឹងចិនវិញមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ