អ៊ីរ៉ង់និងទីភ្នាក់ងារថាមពលបរមាណូអន្តរជាតិព្រមព្រៀងគ្នាលើវិធានការអនុវត្តន៍៧ចំនុច
នៅថ្ងៃអាទិត្យនេះ តំណាងអ៊ីរ៉ង់និងទីភ្នាក់ងារថាមពលបរមាណូអន្តរជាតិ បានប្រកាសថា បានសម្រេចកិច្ចព្រមព្រៀងជាមួយគ្នា លើវិធានការអនុវត្តន៍ផ្នែកកិច្ចសហប្រតិបត្តិការនុយក្លេអ៊ែរ៧ចំណុច។ ភាគីទាំង២មិនបានប្រាប់ថា តើវិធានការ៧ចំណុចនេះ ជាវិធានការអ្វីពិតប្រាកដនោះទេ។ អ៊ីរ៉ង់កំពុងព្យួរសកម្មភាពនុយក្លេអ៊ែរ សម្រាប់រយៈពេល៦ខែ ឆ្លើយតបនឹងកិច្ចព្រមព្រៀងក្រុងហ្សឺណែវ ដែលបានចូលជាធរមានកាលពីថ្ងៃ២០មករាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
វិធានការអនុវត្តន៍ទាក់ទងកិច្ចសហប្រតិបត្តិការនុយក្លេអ៊ែរ ដែលអ៊ីរ៉ង់និងទីភ្នាក់ងារថាមពលបរមាណូអន្តរជាតិ សម្រេចបាននៅថ្ងៃអាទិត្យនេះ មាន៧ចំណុច ហើយនឹងត្រូវអនុវត្តអោយបានយ៉ាងយូរ នៅថ្ងៃ១៥ឧសភា ខាងមុខនេះ។ លោករេហ្សា ណាចាហ្វ៊ី តំណាងអ្នកពិភាក្សាអ៊ីរ៉ង់ និងលោកតេរ៉ូ វ៉ាចូរ៉ាន់តា តំណាងទីភ្នាក់ងារថាមពលបរមាណូអន្តរជាតិ បានជជែកគ្នា២ថ្ងៃមកហើយ លើបញ្ហាបច្ចេកទេសនិងការស្ថាបនា មុននឹងសម្រេចបានកិច្ចព្រមព្រៀងលើវិធានការអនុវត្តន៍៧ចំណុចនេះ។
ដោយឡែក ភាគីនៃកិច្ចពិភាក្សាទាំង២មិនបានប្រាប់ថា តើវិធានការ៧ចំណុចនេះ មានបែបផែនអ្វីពិតប្រាកដនោះទេ។ គេគ្រាន់តែដឹងថា កិច្ចព្រមព្រៀងនេះ មិនបានចែងថា អ្នកជំនាញទីភ្នាក់ងារថាមពលបរមាណូអន្តរជាតិ ត្រូវចុះទៅពិនិត្យទីតាំងយោធា ប៉ាក់ឈីន ស្ថិតនៅ៣០គីឡូម៉ែត្រ ភាគខាងត្បូងទីក្រុងតេហេរ៉ង់នោះទេ។ ទីភ្នាក់ងារថាមពលបរមាណូអន្តរជាតិបានសន្និដ្ឋាន កាលពីឆ្នាំ២០០៥ ថាទីតាំងយោធាប៉ាក់ឈីននេះមិនមែនជាកន្លែងផលិតនុយក្លេអ៊ែរនោះទេ។ ប៉ុន្តែ នៅឆ្នាំ២០១២ វិទ្យាស្ថានវិទ្យាសាស្ត្រនិងសុវត្ថិភាពអន្តរជាតិរបស់អាមេរិក បានចោទអ៊ីរ៉ង់ថា បានលាងសម្អាតសកម្មភាពនុយក្លេអ៊ែរនៅទីនោះ។
គួរបញ្ជាក់ឡើងវិញថា ប្រទេសលោកខាងលិចនិងអ៊ីស្រាអែលតែងសង្ស័យថា អ៊ីរ៉ង់ចង់ផលិតគ្រាប់បែកបរមាណូ តាមរយៈកម្មវិធីនុយក្លេអ៊ែរស៊ីវិលរបស់ខ្លួន។ នៅពេលនេះ ស្របតាមកិច្ចព្រមព្រៀងក្រុងហ្សឺណែវលើកដំបូង ដែលអ៊ីរ៉ង់សម្រេចបានជាមួយប្រទេសមហាអំណាច៥+១ កាលពីខែវិច្ឆិកា សម្រាប់រយៈពេល៦ខែ អ៊ីរ៉ង់កំពុងតែព្យួររាល់សកម្មភាពនុយក្លេអ៊េររបស់ខ្លួន ជាការផ្តោះប្តូរជាមួយការបន្ធូរបន្ថយទណ្ឌកម្មអន្តរជាតិ។
អ៊ីរ៉ង់និងប្រទេសមហាអំណាច៥+១ មានអាមេរិក ចិន រុស្ស៊ី បារាំង អង់គ្លេស និងអាល្លឺម៉ង់ និងជួបពិភាក្សាគ្នាជាថ្មី នៅថ្ងៃ១៨កុម្ភៈខាងមុខ ដើម្បីសម្រេចអោយបានកិច្ចព្រមព្រៀងចុងក្រោយ ស្តីពីកម្មវិធីនុយក្លេអ៊ែរអ៊ីរ៉ង់។ នៅថ្ងៃអាទិត្យនេះដែរ នាយករដ្ឋមន្ត្រីអ៊ីស្រាអែល បេនយ៉ាមីន នេតានីយ៉ាហ៊ូ បានលើកឡើងថា ការបន្ធូរបន្ថយទណ្ឌកម្មលើអ៊ីរ៉ង់មានតែជំរុញអោយអ៊ីរ៉ង់បង្កើនសកម្មភាពឈ្លានពាន នៅលើឆាកអន្តរជាតិតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ