iPads និង Iphones ក្រដាស ពេញនិយមខ្លាំងពេលបុណ្យសង្កត់ផ្នូរ
អំណោយ (កាដូ) ជា iPads និង Iphones គឺជាក្តីស្រមៃចង់បាន និងចង់ធ្វើ របស់មនុស្សសម័យថ្មី សម័យកុំព្យូទ័រ ជាពិសេសយុវវ័យ ដែលចូលចិត្ត និងប្រាថ្នា រត់ឱ្យទាន់បច្ចេកវិទ្យាទំនើប ! ទិញប្រើខ្លួនឯង ឬធ្វើកាដូជូនអ្នកទីស្រឡាញ់នៅរស់មិនគ្រប់គ្រាន់ទេ ! កូនចៅចិន នឹកឃើញដល់ព្រលឹងជីដូនជីតា ដែលស្លាប់បាត់បង់ជីវិតទៅហើយទៀត។ ហេតុដូច្នេះហើយបានជានៅប្រទេសចិន iPads និង Iphones ក្រដាស បានក្លាយជាក្រដាសសែនពេញនិយមបំផុត ពិធីបុណ្យសង្កត់ផ្នូរ នៅថ្ងៃទី ៤មេសា សប្តាហ៍ក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
iPads និង Iphones ធ្វើពីក្រដាស សំរាប់ សែន -ដុត លក់ដាច់ដូច លក់ iPads និង Iphones មែនទែន ! ផលិតផល iPads និង Iphones នេះ ធ្វើពីក្រដាសមែន ប៉ុន្តែមានខ្សែ មានស្រោម មានប្រដាប់ស្តាប់នៅត្រចៀក ។ល។ និង។ល។ ដូចជារបស់ពិតៗ និងបានក្លាយជា គឺវត្ថុសំណែនពេញនិយមបំផុតរបស់បណ្តាជនចិន នាឱកាស ពិធីបុណ្យសង្កត់ផ្នូរ ឬ ឆេងម៉េង ឆ្នាំនេះ។
យោងតាមអ្នកលក់ចិនម្នាក់ ដែលទីភ្នាក់ងារព័ត៌មានបារាំងAFP បានជួបសួរ iPads ក្រដាស មួយ មានតម្លៃដល់ទៅ ៦៤អឺរ៉ូ (៥៣៨យ័ន) ចំណែកឯ Iphones ក្រដាសវិញ ថ្លៃ២អឺរ៉ូកន្លះ។
ក្នុងប្រពៃណីចិន ថ្ងៃទី ៤ មេសា ជាថ្ងៃបុណ្យរំលឹកវិញ្ញាណក្ខន្ធបុព្វការី និងជីដូនជីតា ដែលបានស្លាប់បាត់បង់ជីវិតទៅ។ ក្រៅពីទៅបោសសំអាត ពូនផ្នូរ សម្តែងការគោរពកូនចៅដែលនៅរស់តែងនាំយកម្ហូបអាហារ មាសប្រាក់ លុយកាក់ សម្លៀកបំពាក់និងវត្ថុផ្សេងៗ ជាក្រដាស ទៅសែន រួចដុតបញ្ជូនទៅបំពេញចិត្តដូនតា។ ហើយអ្វីជាការកត់សម្គាល់ នៅឆ្នាំនេះ គឺ iPads និង Iphones ក្រដាស ក៏នឹងត្រូវដុតឧទ្ទិសជូនដូនតា នាឱកាសបុណ្យសង្កត់ផ្នូរ ឬឆេងម៉េងដែរ។
គេធ្លាប់ឮពាក្យចចាមអារ៉ាម ជុំវិញការដុតក្រដាសប្រាក់ដុល្លារអាមេរិក ថាខ្មោចដូនតាមិនស្គាល់ ! ចុះ iPads និង Iphones ក្រដាស វិញ តើនឹងឲ្យភ្ជាប់ទៅនឹងប្រព័ន្ធអ្វីទៅ ? ឬគ្រាន់តែជាឱកាសជួញដូរយកចំណេញខាងពាណិជ្ជកម្ម ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ