មជ្ឈមណ្ឌលសិទ្ធមនុស្សព្រួយបារម្ភពីអតុល្យភាពតំណាងរាស្ត្រស្ត្រី
នៅថ្ងៃទី១០កញ្ញានេះ មជ្ឃមណ្ឌលសិទ្ធិមនុស្សកម្ពុជា ហៅកាត់ថា CCHR បានចេញសេចក្តីថ្លែងការណ៍មួយ សម្តែងក្តីបារម្ភចំពោះភាគរយរបស់អ្នកតំណាងរាស្ត្រស្ត្រី នៅក្នុងរដ្ឋសភា នីតិកាលទី៥នេះ។ ការព្រួយបារម្ភនេះ ក៏ព្រោះតែភាគរយរបស់តំណាងរាស្ត្រស្ត្រី បានថយចុះជាងសម័យបង្កើតរដ្ឋសភា នៅក្នុងអណត្តិទី៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
លទ្ធផលផ្លូវការដែលប្រកាសដោយគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី០៨កញ្ញា ឆ្នាំ២០១៣ បានបង្ហាញថា តំណាងរាស្ត្រជាស្ត្រីមានតែ ២០,៣៣ ភាគរយ ឬស្មើនឹងចំនួនអាសនៈ ២៥ ក្នុងចំណោម ១២៣អាសនៈ ក្នុងរដ្ឋសភា តែប៉ុណ្ណោះ។
សេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា បានឲ្យដឹងថា គណបក្សជាប់ឆ្នោតធំៗទាំង២ គឺទាំងគណបក្សសង្គ្រោះជាតិ និងគណបក្សប្រជាជនកម្ពុជា មានចំនួនអ្នកតំណាងរាស្ត្រស្ត្រី តិចជាងចំនួនអ្នកតំណាងរាស្ត្របុរសយ៉ាងច្រើន។ គណបក្សប្រជាជនកម្ពុជាដែលទទួលបាន ៦៨អាសនៈ មានតែ១៨អាសនៈប៉ុណ្ណោះ ដែលជារបស់អ្នកតំណាងរាស្ត្រស្ត្រី ឬស្មើនឹងជាង២៦ ភាគរយ។ រីឯគណបក្សសង្គ្រោះជាតិ ដែលទទួល បាន ៥៥អាសនៈ មានតែ៧អាសនៈប៉ុណ្ណោះ ដែលជារបស់តំណាងរាស្ត្រស្ត្រី ដែលស្មើនឹងជាង ១២ ភាគរយ។
ចំនួននេះ បានធ្វើឲ្យមជ្ឈមណ្ឌលសិទ្ធិមនុស្សកម្ពុជា យល់ថានៅតែបង្ហាញពីកង្វះឆន្ទៈនយោបាយ និងគំនិតផ្តួចផ្តើមនានា ដើម្បីបង្កើនចំនួនតំណាងរាស្ត្រីនៅគ្រប់ជួរលំដាប់ថ្នាក់របស់រដ្ឋាភិបាល។ រាជរដ្ឋាភិបាលកម្ពុជា កន្លងមក បានប្តេជ្ញាសម្រេចឲ្យបានតំណាងស្ត្រី នៅថ្នាក់ជាតិ ឲ្យបាន៣០ភាគរយ នៅឆ្នាំ ២០១៥។ ប៉ុន្តែ ប្រសិនបើលទ្ធផលបោះឆ្នោតនៃការជ្រើសតាំងតំណាងរាស្ត្រនេះ បានបង្ហាញដូច្នេះ មានន័យថា រដ្ឋាភិបាលមិនអាចសម្រេចអ្វីដែលជាគោលដៅតម្លាភាពយែនឌ័របាននោះទេ។
ថ្លែងនៅក្នុងលិខិតនោះ លោកស្រី ជរ ច័ន្ទធីតា មន្ត្រីសម្របសម្រួលគម្រោងលើកស្ទួយសមាសភាពស្ត្រីក្នុងវិស័យនយោបាយ បាននិយាយថា វាជាការខកចិត្តមួយ ដែលចំនួនស្ត្រីក្នុងឆាកនយោបាយមានចំនួនតិចដូច្នេះ។ ហើយវាក៏ជាសញ្ញាបង្ហាញថា ការអនុវត្តន៍យេនឌ័រនៅកម្ពុជា មិនមានតុល្យភាពគ្រប់គ្រាន់ផងដែរ។
គួរបញ្ជាក់ថា នៅក្នុងនីតិកាលទី៤នៃរដ្ឋសភា ចំនួនស្ត្រីជាអ្នកតំណាងរាស្ត្រ មានចំនួន ២២ភាគរយ ក្នុងចំណោមចំនួនអាសនៈទាំង ១២៣ ហើយនៅក្នុងនីតិកាលទី៥នេះ ចំនួនស្ត្រី មានការថយចុះ ១,៦៧ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ