កម្ពុជា

សពលោកអៀង សារីត្រូវបូជាយប់ថ្ងៃ២១មីនានេះ

សពរបស់លោកអៀង សារីនឹងត្រូវបានបូជាតាមប្រពៃណីកាលពីវេលាម៉ោង៦កន្លះអម្បិញមិញនេះនៅក្នុងទីធា្លអតីតផ្ទះរបស់លោកនៅក្នុងភូមិដូង ឃុំម៉ាឡៃ ស្រុកម៉ាឡៃខេត្តបន្ទាយមានជ័យ ញាតិមិត្តជិតឆ្ងាយរបស់លោកអៀង សារីជាច្រើនរយនាក់ ព្រមទាំងជនជាតិថៃខ្លះទៀតផងបានចូលរួមក្នុងពិធីបូជាសពដែលគេធ្វើនៅលើមេនយ៉ាងធំ។

ចុះផ្សាយនៅថ្ងៃ៖ 21/03/2013 - 14:00

ផ្សាយពាណិជ្ជកម្ម

បន្ទាប់ពីបានតម្កល់សាសពសម្រាប់ធ្វើបុណ្យរយៈពេល១សប្តាហ៍មក សាកសពលោកអៀង សារីត្រូវរំកិលមកដាក់លើមេនកាលពីរសៀលថ្ងៃព្រហស្បតិ៍ទី២១មិនានេះ ដើម្បីរៀបចំពិធីបូជាដែលបានប្រព្រឹត្តិទៅកាលពីវេលាម៉ោងជិត៧យប់នេះ។

នៅថ្ងៃនេះ មនុស្សម្នា សាច់ញាតិ មិត្តភក្តិជិតឆ្ងាយរបស់លោកអៀង សារីបានមកជួបជុំគ្នាជាបន្តបន្ទាប់នៅក្នុងទីធ្លាផ្ទះបុណ្យនៅក្នុងភូមិដូង ឃុំ ម៉ាឡៃ ស្រុកម៉ាឡៃ ខេត្តបន្ទាយមានជ័យ ដែលនៅជាប់នឹងព្រំដែនជាមួយប្រទេសថៃ។ នេះបើតាមការរៀបរាប់របស់អ្នកសារព័ត៌មានដែលកំពុងស្ថិតនៅក្នុងពិធីបុណ្យបូជាសពលោកអៀង សារីនោះ។

លោកញែម អេនដែលជាអតីតអ្នកថតរូបក្នុងសម័យក្រហមក៏កំពុងស្ថិតនៅក្នុងពិធីបុណ្យនោះជាច្រើនថ្ងៃមកហើយដែរ ក្នុងនាមជាអ្នកថតរូបទៀត។ លោកញែម អេនបានប្រាប់វិទ្យុបារាំងអន្តរជាតិនៅរសៀលថ្ងៃនេះថា អតីតថ្នាក់ដឹកនាំ និងកងទ័ពខ្មែរក្រហមជាច្រើន មកពីប៉ៃលិន សំឡូត សំពៅលូន ភ្នំព្រឹក អន្លង់វែងជាដើមបានចូលរួមក្នុងពិធីបុណ្យសពនេះ ដែលកំពុងរៀបចំធ្វើនៅក្នុងអតីតផ្ទះរបស់លោកអៀង សារី។

លោកញែម អេនបញ្ជាក់ថា ទីនេះហើយជាអនុស្សាវរីយ៍របស់លោកអៀង សារីតាំងតែឆ្នាំដើមទស្សវត្សរ៨០មកម្លេះ។ លោកអៀង វុធ កូនប្រុសរបស់លោកអៀង សារីបានប្រាប់វិទ្យុបារាំងអន្តរជាតិកាលពីសប្តាហ៍មុនថា ការរៀបចំពិធីបុណ្យសពរបស់ឪពុកលោកនៅក្នុងស្រុកម៉ាឡៃនេះ គឺជាការធ្វើតាមបណ្តាំរបស់ឪពុករបស់លោក។

អ្នកកាសែតជាតិនិងអន្តរជាតិយ៉ាងហោចណាស់៣០នាក់កំពុងតែយកព័ត៌មាននៅក្នុងពិធីបូជាសពនេះ។ ពួកគេបានប្រាប់អោយដឹងថា លោកស្រីអៀង ធីរិទ្ធដែលជាភរិយារបស់លោកអៀង សារី ហើយដែលមានជំងឺបាត់ការចងចាំហើយនោះ ទើបតែមានវត្តមាននៅផ្ទះបុណ្យសព។ យោងតាមការផ្សព្វផ្សាយរបស់គេហទំព័រភ្នំពេញប៉ុស្តិ៍នៅថ្ងៃនេះ នៅព្រឹកថ្ងៃព្រហស្បតិ៍នេះ ក្រុមគ្រួសារលោកអៀង សារីបានរៀបចំពិធីរាប់បាត្រព្រះសង្ឃ៨៩អង្គដើម្បីឧទ្ធិសកុសលដល់វិញ្ញានក្ខន្ធលោកអៀង សារីផងដែរ។

អ្នកកាសែតដែលមានវត្តមាននៅក្នុងពិធីបុណ្យសពលោកអៀង សារីបានអះអាងថា ពួកគេពិបាកទទួលបានព័ត៌មានពីក្រុមគ្រួសាររបស់លោកអៀង សារីដែលមិនចង់និយាយជាមួយអ្នកកាសែត៕