ហាមលក់ និងពិសារគ្រឿងស្រវឹងនៅមុនថ្ងៃបោះឆ្នោត និងថ្ងៃបោះឆ្នោត
ប្រជាពលរដ្ឋខ្មែរ និងជនបទេសមិនត្រូវពិសារគ្រឿងស្រវឹងនៅថ្ងៃមុនបោះឆ្នោតនិងថ្ងៃបោះឆ្នោត ទី៣ខែមិថុនាខាងមុននេះទេ។ ការអំពាវនាវរបស់រាជរដ្ឋាភិបាលកម្ពុជាគឺធ្វើឡើង ដើម្បីអោយកិច្ចដំណើរការបោះឆ្នោតឃុំសង្កាត់ប្រព្រឹត្តឡើងក្នុងបរិយាកាសល្អ សេរី ត្រឹមត្រូវ យុត្តិធម៌និងគ្មានអំពើហិង្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
៨ថ្ងៃ មុនការបោះឆ្នោតឃុំសង្កាត់ដែលប្រព្រឹត្តិទៅនៅថ្ងៃទី៣ ខែមិថុនាខាងមុខនេះ លោកនាយករដ្ឋមន្ត្រី ហ៊ុន សែន បានអំពាវដល់ប្រជាពលរដ្ឋខ្មែរ និងជនបរទេសមិនអោយពិសារគ្រឿងស្រវឹងនៅថ្ងៃមុនបោះឆ្នោត និងថ្ងៃបោះឆ្នោត។ ព្រមពេលជាមួយគ្នា ប្រមុខរាជរដ្ឋាភិបាលកម្ពុជាបានអំពាវនាវនៅក្នុងសេចក្តីណែនាំរបស់ខ្លួន សំណូមពរអោយអ្នកលក់ដូរគ្រឿងស្រវឹងទាំងឡាយត្រូវផ្អាកសកម្មភាពរបស់ខ្លួននៅថ្ងៃនោះផងដែរ។
សេចក្តីណែនាំរបស់លោកនាយករដ្ឋមន្ត្រី ហ៊ុន សែន បានបញ្ជាក់ថា សំណើរសុំផ្អាកពិសារគ្រឿងស្រវឹង និងលក់គ្រឿងស្រវឹងត្រូវចាប់អនុវត្តពីម៉ោង២៤ ថ្ងៃទី១ ខែមិថុនារហូតដល់ម៉ោង២៤ ថ្ងៃទី០៣ ខែមិថុនាឆ្នាំ២០១២។ លោកនាយករដ្ឋមន្ត្រីបានបន្តពន្យល់ទៀតថា សេចក្តីណែនាំសុំផ្អាកលក់ និងពិសារគ្រឿងស្រវឹងនៅថ្ងៃមុនបោះឆ្នោត និងថ្ងៃបោះឆ្នោតនោះ គឺដើម្បីទប់ស្កាត់អំពើហិង្សា ការគំរាមកំហែង ការបំភិតបំភ័យ និងបាតុភាពនានាដែលបណ្តាលមកពីការពិសារគ្រឿងស្រវឹងគ្រប់ប្រភេទ។
លោក គល់ បញ្ញា នាយកប្រតិបត្តិនៃអង្គការសង្កេតការណ៍បោះឆ្នោត Comfrel បាននិយាយថា សេចក្តីណែនាំមិនអោយមានការលក់និងការពិសារគ្រឿងស្រវឹងមួយថ្ងៃមុនបោះឆ្នោតនិងថ្ងៃបោះឆ្នោត គឺជាគោលការណ៍អន្តរជាតិ។ យុទ្ធសាស្រ្តនេះគឺដើម្បីកាត់បន្ថយអំពើហិង្សានៅក្នុងអំឡុងពេលបោះឆ្នោត។ ដើម្បីអោយសេចក្តីណែនាំកាន់តែមានប្រសិទ្ធភាពបន្ថែមទៀតនោះ លោកនាយករដ្ឋមន្ត្រី ហ៊ុន សែនបានអំពាវនាវអោយក្រសួងពាក់ព័ន្ធទាំងអស់អនុវត្តសេចក្តីណែនាំនេះ។
សូមបញ្ជាក់ថា ប្រជាពលរដ្ឋខ្មែរចំនួន៩លាននាក់គ្រោងនឹងទៅបោះឆ្នោតជ្រើសរើសក្រុមប្រឹក្សាសង្កាត់នៅថ្ងៃទី៣ ខែមិថុនាខាងមុខនេះ។ គណបក្សចំនួន១០គ្រោងនឹងប្រកួតប្រជែងយកអាសនៈក្រុមប្រឹក្សាក្នុងឃុំសង្កាត់ចំនួន១ ៦៣៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ