លោកហ៊ុន សែន បញ្ចេញវិធានការបង្ក្រាបជំនួញឈើក្រញូង
ប្រមុខរាជរដ្ឋាភិបាលកម្ពុជាលោក ហ៊ុន សែន បានចេញបទបញ្ជាម៉ឺងម៉ាត់ដើម្បីបង្ក្រាបជំនួញឈើក្រញូង ដែលជាប្រភពនៃសោកនាដកម្មលើពលរដ្ឋខ្មែរខ្លះ នៅព្រំដែនថៃ។ លោកនាយករដ្ឋមន្ត្រីបានព្រមានមិនអោយមន្ត្រីនិងកងកម្លាំងមានសមត្ថកិច្ច ពាក់ព័ន្ធនឹងសកម្មភាពជួញដូរឈើក្រញូងអោយសោះ។ ក្នុងបទបញ្ជាដែលសំដៅទប់ស្កាត់ការកែច្នៃឈើក្រញូងសម្រាប់ការប្រើប្រាស់ក្នុងស្រុកផងដែរនោះ លោកនាយករដ្ឋមន្ត្រីក៏បានស្នើអោយក្រសួងការបរទេស បន្តធ្វើការងារជាមួយប្រទេសជិតខាងដើម្បីថែរក្សាអាយុជីវិតពលរដ្ឋខ្មែរ។ ប៉ុន្តែសង្គមស៊ីវិលខ្លះថា បទបញ្ជានេះបានចេញយឺតពេលបន្តិចហើយ។
ចុះផ្សាយនៅថ្ងៃ៖
ស្តាប់ - ០៣:០១
បទបញ្ជាកម្រាស់៤ទំព័ររបស់លោកនាយករដ្ឋមន្ត្រី ហ៊ុន សែន ស្តីពីការបង្ក្រាបទប់ស្កាត់ការប្រមូលទិញ ការស្តុកទុក និងការនាំចេញឈើក្រញូង បានបាញ់ឆ្ពោះទៅមន្ត្រី កងប្រដាប់អាវុធគ្រប់ប្រភេទ និងក្រសួងការបរទេសទៀតផង។ ជាបញ្ជា ដែលសេនាធិការរបស់រាជរដ្ឋាភិបាលទាំងនេះ ត្រូវអនុវត្តអោយមានប្រសិទ្ធភាពទៀតផង ពិសេសការទប់ស្កាត់ប្រជាពលរដ្ឋមិនអោយឆ្លងដែនខុសច្បាប់ទៅប្រទេសជិតខាង ដើម្បីស៊ីឈ្នួលកាប់ និងអូសឈើក្រញូងនោះ។
នៅក្នុងបទបញ្ជាដែលលោកនាយករដ្ឋមន្ត្រីចុះហត្ថលេខានៅថ្ងៃទី២២ ខែកុម្ភៈ លោកនាយករដ្ឋមន្ត្រីបានព្រមានមេបញ្ជាការកងយោធពលខេមរភូមិន្ទ និងមេបញ្ជាការនគរបាលការពារព្រំដែនថា ប្រសិនបើមានករណីពលរដ្ឋខ្មែរឆ្លងដែនខុសច្បាប់ទៅប្រមូល ជញ្ជូន និងកាប់ឈើក្រញូងនៅប្រទេសជិតខាង តាមភូមិសាស្ត្រឈរជើងរបស់អង្គភាពណាមួយនោះ មេបញ្ជាការអង្គភាពនោះ ត្រូវទទួលខុសត្រូវចំពោះមុខរាជរដ្ឋាភិបាល។
លោកនាយករដ្ឋមន្ត្រីក៏បានព្រមាន មន្ត្រី អាជ្ញាធរ និងកងកម្លាំងប្រដាប់អាវុធគ្រប់ប្រភេទអោយពួកគេដកខ្លួនអោយឆ្ងាយពីសកម្មភាពពាក់ព័ន្ធបទល្មើសឈើក្រញូងផងដែរ។ បើមិនដូច្នោះទេ ពួកគេនឹងត្រូវកាត់ទោសតាមច្បាប់ដោយគ្មានការអត់ឱនឡើយ។
មិនត្រឹមតែការទប់ស្កាត់ការនាំចេញឈើក្រញូងចេញទៅបរទេសទេ ប្រមុខរាជរដ្ឋាភិបាលក៏បានបញ្ជាអោយអាជ្ញាធររាជធានីខេត្ត ទប់ស្កាត់ការប្រើប្រាស់ក្នុងស្រុកនូវប្រភេទឈើក្រញូង និងការប្រើប្រាស់ឈើប្រភេទនេះដើម្បីកែច្នៃគ្រឿងសង្ហារឹម ឬវត្ថុផ្សេងៗសម្រាប់ទីផ្សារក្នុងស្រុក និងការនាំចេញគ្រប់រូបភាពទាំងអស់។ នេះជាបទបញ្ជាថ្មីមួយទៀតរបស់លោកនាយករដ្ឋមន្ត្រីកម្ពុជា ក្នុងយុទ្ធនាការបង្ក្រាបជំនួញឈើក្រញូង ដែលលោកបានអះអាង បានកើតមានឡើងយ៉ាងអនាធិបតេយ្យ នៅក្នុងកម្ពុជា។
ប្រមុខរាជរដ្ឋាភិបាល ក៏បានទទួលស្គាល់ថា ជំនួញឈើក្រញូងនេះហើយដែលបានធ្វើពលរដ្ឋខ្មែរឆ្លងដែនខុសច្បាប់ទៅប្រទេសជិតខាង ហើយពួកគេត្រូវបានចាប់ខ្លួន និងត្រូវបានបាញ់សម្លាប់ជាបន្តបន្ទាប់នោះ។ សម្រាប់លោកនាយករដ្ឋមន្ត្រី ក្នុងករណីដែលស្រាវជ្រាវរកឃើញអ្នកការពារ ឬអ្នកនៅពីក្រោយសកម្មភាពជួញដូរឈើក្រញូង ហើយមានការលំបាកក្នុងការចាត់វិធានការ សមត្ថកិច្ចត្រូវធ្វើរបាយការណ៍ដោយផ្ទាល់ជូនប្រមុខរាជរដ្ឋាភិបាល ដើម្បីចាត់វិធានការដោយមិនមានការយោគយល់ និងលើកលែងឡើយ។
ក្រៅពីចំណាត់ការនៅក្នុងប្រទេសហើយ លោកនាយករដ្ឋមន្ត្រី ហ៊ុន សែន ក៏បានបញ្ជាអោយក្រសួងការបរទេសបន្តពិភាក្សាជាមួយក្រសួងការបរទេសនៃប្រទេសជិតខាង ដើម្បីដោះស្រាយករណីប្រជាពលរដ្ឋខ្មែរឆ្លងដែនខុសច្បាប់ ឬបានប្រព្រឹត្តិបទល្មើសណាមួយ ក្នុងទឹកដីប្រទេសជិតខាង ដើម្បីចៀសវាងសកម្មភាពណាមួយដែលនាំអោយប៉ះពាល់ដល់អាយុជីវិតប្រជាពលរដ្ឋខ្មែរ។
ហើយថាទន្ទឹមគ្នានេះ ក្រសួងការបរទេសត្រូវសហការជាមួយក្រសួងពាណិជ្ជកម្ម ដើម្បីពិភាក្សាគ្នាជាមួយប្រទេសទី២ និងទី៣ ដែលជាទីផ្សារឈើក្រញូង ដើម្បីទប់ស្កាត់ការនាំឈើក្រញូងចេញទៅប្រទេសទាំងនោះ។
ជាបទបញ្ជាយ៉ាងវែងដែលលោក ចាន់ សូវ៉េត មន្ត្រីស៊ើបអង្កេតរបស់សមាគមការពារសិទ្ធិមនុស្សអាដហុក អបអរសាទរ។ ប៉ុន្តែ មន្ត្រីសង្គមស៊ីវិលរូបនេះមិនបានរារែកនឹងអត្ថាធិប្បាយថា បទបញ្ជាហាក់បានចេញយឺតពេល ឬថាវាដល់ដំណាក់កាលចុងក្រោយដែលឈើប្រភេទក្រញូងត្រូវបានកាប់ស្ទើរតែអស់ហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ