សកម្មជនគណបក្សសិទ្ធិមនុស្ស ២នាក់ នៅខេត្តកំពង់ចាមត្រូវប៉ូលិសចាប់ខ្លួន
សកម្មជនគណបក្សសិទ្ធិមនុស្សរបស់លោកកឹម សុខា ២ នាក់ ត្រូវបានប៉ូលិសចាប់ខ្លួន បញ្ជូនទៅតុលាការកាត់ទោស ដោយសារអ្នកទាំងពីរ បានផ្សព្វផ្សាយឯកសារ ដែលជាគោលនយោបាយគណបក្ស ពាក់ព័ន្ធនឹងរឿងវៀតណាម ទន្ទ្រានកាន់កាប់ទឹកដីកម្ពុជា។ បុរសអ្នកគាំទ្រគណបក្សសិទ្ធិមនុស្សទាំងពីរនាក់ រស់នៅឃុំទន្លេបិទ ស្រុកត្បូងឃ្មុំ ត្រូវតុលាការសម្រេចឃុំខ្លួន នៅរសៀលថ្ងៃទី២កញ្ញានេះ ពីបទញុះញង់ឲ្យមានបទឧក្រិដ្ឋ និងចលាចលសង្គម។
ចុះផ្សាយនៅថ្ងៃ៖
ស្តាប់ - ០២:៣២
កាលពីម៉ោង៦ល្ងាច ថ្ងៃទី១ ខែកញ្ញា ឆ្នាំ២០១១ អាជ្ញាធរមូលដ្ឋាន និងប៉ូលិសខេត្តកំពង់ចាម បានចាប់ខ្លួនសកម្មជនគណបក្សសិទ្ធិមនុស្សពីររូប។ ទីមួយ លោក ផាន ផា អាយុ ៦៦ឆ្នាំ ជាអនុប្រធានបក្សសិទ្ធិមនុស្ស ប្រចាំឃុំទន្លេបិទ ស្រុកត្បូងឃ្មុំ និងសកម្មជនសិទ្ធិមនុស្សប្រចាំភូមិទួលខ្សាច់ម្នាក់ទៀត គឺលោក ភូមិ យាន អាយុ ៧១ឆ្នាំ។
តាមបក្សសិទ្ធិមនុស្ស ការចាប់ខ្លួនសកម្មជនទាំងពីរ បានធ្វើឡើង បន្ទាប់ពីពួកគាត់ ចេញពីកន្លែងសង្កេតការណ៍ពិនិត្យឈ្មោះ និងការចុះឈ្មោះបោះឆ្នោត។
សេចក្តីថ្លែងការណ៍របស់គណបក្សសិទ្ធិមនុស្ស នៅថ្ងៃ២កញ្ញានេះបង្ហាញថា សកម្មជនគណបក្សសិទ្ធិមនុស្សទាំងពីរនាក់នោះ បានយកឯកសារ ដែលពាក់ព័ន្ធនឹងកិច្ចការបោះឆ្នោត គោលនយោបាយ និងប្រវត្តិសាស្ត្រខ្មែរ ទៅប្រគល់ឲ្យសកម្មជននៅថ្នាក់ភូមិ ហើយត្រូវបានមេភូមិ ដែលមកពីគណបក្សកាន់អំណាច ឃើញក៏បានឆក់យកទៅឲ្យប៉ូលីស និងមួយថ្ងៃបន្ទាប់មកប៉ូលីស ក៏នាំខ្លួនសកម្មជនទាំងពីរ ទៅឃុំខ្លួននៅស្នងការប៉ូលីសខេត្តកំពង់ចាម។
គណបក្សសិទ្ធិមនុស្ស ចាត់ទុកថា ការចាប់ និងឃុំខ្លួនសកម្មជនគណបក្សសិទ្ធិមនុស្សទាំងពីររូបនៅខេត្តកំពង់ចាម ជាការរំលោភសិទ្ធិ ជាការគំរាមកំហែងផ្នែកនយោបាយ និងជាការរំខានដល់ដំណើរការរៀបចំការបោះឆ្នោត នៅកម្ពុជា មិនឲ្យមានលក្ខណៈសេរី ត្រឹមត្រូវ និងយុត្តិធម៌។
តាមគណបក្សសិទ្ធិមនុស្ស នៅកម្ពុជារាល់ពេលមានការរៀបចំការបោះឆ្នោតម្តងៗ តែងតែមានការរំលោភសិទ្ធិនយោបាយ ការគម្រាមកំហែង បំភិតបំភ័យ ចាប់ខ្លួន និងលបលួចកាប់សម្លាប់សកម្មជនគណបក្សប្រឆាំងជារឿយៗ។
គណបក្សសិទ្ធិមនុស្ស បានអំពាវនាវដល់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ពិនិត្យឡើងវិញនូវអំពើរបស់អាជ្ញាធរមូលដ្ឋាន ដែលបានរំលោភលើសិទ្ធិនយោបាយ និងសុំឲ្យដោះលែង ជាបន្ទាន់នូវសកម្មជនគណបក្សសិទ្ធិមនុស្សទាំងពីររូប ដែលមិនបានប្រព្រឹត្តអ្វីខុសពីច្បាប់រដ្ឋទាល់តែសោះ។
ក៏ប៉ុន្តែ មេប៉ូលិសខេត្តកំពង់ចាម លើកឡើង មូលហេតុនៃការចាប់ខ្លួនសកម្មជនគណបក្សសិទ្ធិមនុស្សទាំងពីរ ដោយសារតែជនទាំងពីរបានផ្សព្វផ្សាយឯកសារ ដែលមានកម្រាស់ ៩ ទំព័រ សរសេរញុះញង់ឲ្យប្រជាពលរដ្ឋ មានការយល់ច្រលំលើរដ្ឋាភិបាលកម្ពុជា ពាក់ព័ន្ធនឹងរឿងកាត់ទឹកដីកម្ពុជា ទៅឲ្យប្រទេសវៀតណាម។
ប៉ូលិសបានកសាងសំណុំរឿង ដើម្បីបញ្ជូនអ្នកទាំងពីរ ទៅកាន់តុលាការ នារសៀលថ្ងៃទី២កញ្ញានេះ។ តុលាការ ក៏បានសម្រេចឃុំខ្លួនបុរសសកម្មជនគណបក្សសិទ្ធិមនុស្សទាំងពីរនោះ ដោយចោទប្រកាន់ពីបទញុះញង់ឲ្យមានបទឧក្រិដ្ឋ និងឲ្យមានចលាចលសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ