អ្នកកាសែតបារាំងជាប់ជាចំណាប់ថ្នូរតាលីបង់ ត្រូវបានដោះលែង !
អតីតចំណាប់ថ្នូរបារាំង លោក Hervé Ghesquière និង Stéphane Taponier អ្នកកាសែតទូរទស្សន៍ជាតិបារាំង France 3 បានទទួលសេរីភាព ត្រឡប់មកដល់ទឹកដីកំណើតវិញហើយ បន្ទាប់ពីបានជាប់ថ្នូរក្នុងកណ្តាប់ដែពួកតាលីបង់អស់រយៈពេល១៨ខែ។ មិនមែនគ្រាន់តែជាដំណឹងល្អ សម្រាប់គ្រួសារ មិត្តភក្តិរួមការងារ និងប្រទេស ប៉ុណ្ណោះទេ តែជាអំណរសម្រាប់ពិភពអ្នកកាសែតទាំងមូល ព្រោះលោកជាអ្នកយកព័ត៌មានបារាំងចុងក្រោយបង្អស់នៅលើលោក ដែលបានជាប់ជាចំណាប់ថ្នូរ។ រដ្ឋាភិបាលបារាំង និងក្រុមការងារបានចំណាយពេលវេលាយ៉ាងយូរ ទម្លាំអាចបានទទួលសេរីភាពនៅថ្ងៃនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
លោក Hervé Ghesquière និង Stéphane Taponier អ្នកយកព័ត៌មានឲ្យទូរទស្សន៍ជាតិបារាំង France 3 ដែលមានឯកទេសផ្នែកធ្វើបទយកការណ៍សង្គ្រាម និងដែលធ្លាប់បានចុះទៅសមរភូមិក្តៅៗជាច្រើន នៅអាហ្វ្រិក អ៊ីរាក់ និងនៅប្រទេសកម្ពុជា ជាមួយពួកព្រៃ-ខ្មែរក្រហម ។ល។ និង។ល។ បានមកដល់ទីក្រុងប៉ារីស នាវេលាម៉ោង ៨និង៤៥នាទី ព្រឹកថ្ងៃទី៣០មិថុនា ក្នុងទឹកមុខរីករាយ ស្រស់ថ្លា និងហាក់មានសុខភាពរឹងប៉ឹងទាំងផ្លូវចិត្ត ទាំងផ្លូវកាយ។ លោកប្រធានាធិបតីបារាំង នីកូឡា សាកូហ្ស៊ី និងភរិយា បានអញ្ជើញទៅទទួលអ្នកកាសែតទាំងពីរដល់ព្រលានយន្តហោះ។
ជាប់ជាចំណាប់ថ្នូរ កាលពីថ្ងៃទី ២៩ ធ្នូ ២០០៩ ដល់ថ្ងៃទី២៩មិថុនា អ្នកទាំងពីរបានអះអាងថាមិនបានទទួលរងការធ្វើទារុណកម្ម អំពើហិង្សា ឬការគំរាមកំហែងណាមួយពីសំណាក់ពួកតាលីបង់ទេ។ អ្នកទាំងពីរត្រូវឃុំខ្លួនបំបែកពីគ្នារយៈពេល៨ខែ (១៣មេសា ដល់១៣ធ្នូ ២០១០) បរិភោគអាហាររបៀបអ្នកភ្នំ ក្នុងបរិមាណតិចតួច មានសិទ្ធិធ្វើកីឡា និងស្តាប់វិទ្យុបារាំងអន្តរជាតិ ជារៀងរាល់ថ្ងៃ។
ស្តីពីលក្ខខណ្ឌនៃការចរចាដើម្បីសេរីភាពអ្នកកាសែតទាំងពីររូបវិញ គ្មានព័ត៌មានលម្អិតច្បាស់លាស់បញ្ជាក់ពីបញ្ហានេះទេ ! រដ្ឋមន្ត្រីក្រសួងការបរទេសបារាំង និងរដ្ឋមន្ត្រីផ្នែកថវិកា គ្រាន់តែអះអាងថាគ្មានទេការផ្តល់ប្រាក់ជាថ្នូរ។ ប៉ុន្តែលោកប្រធានាធិបតីអាហ្វហ្កានិស្ថាន អាមីត កាហ្សៃ បានជួយជ្រោមជ្រែងច្រើន។ ហើយជាពិសេសទៅទៀត បរិបទអន្តរជាតិ ពោលគឺការប្រកាសដកទ័ពអាមេរិក និងបារាំងចេញពីអាហ្វហ្កានីស្ថាន ក៏អាចជាកត្តាមួយ ជួយជំរុញពួកតាលីបង់ឲ្យដោះលែងអ្នកសារព័ត៌មានបារាំងនេះដែរ។ នេះបើតាមអ្នកវិភាគខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ