ទស្សនកិច្ចលោកប្រធានរដ្ឋសភាចិន Wu Bangguo នៅរុស្ស៊ី
ក្នុងក្របខ័ណ្ឌទស្សនកិច្ចនេះ ជា ” ទស្សនកិច្ចមិត្តភាពផ្លូវការ ” រយៈពេល៤ថ្ងៃ ពីថ្ងៃ១៤ដល់១៧ កញ្ញា លោក Wu Bangguo បានជួបប្រស្រ័យជាមួយនាយករដ្ឋមន្ត្រីរុស្ស៊ី ពូទីន បានចូលរួមក្នុងសម័យប្រជុំលើកទី៥នៃ ”គណៈកម្មការខាងសហប្រតិបត្តិការរវាងរដ្ឋសភាចិន និងសភាឌូម៉ារុស្ស៊ី “ ហើយនឹងត្រូវទទួលជួបដោយលោកប្រធានាធិបតីរុស្ស៊ី មេដវេដេវ។ បន្ទាប់ពីរុស្ស៊ី លោកប្រធានរដ្ឋសភាចិននឹងបន្តដំណើរទស្សនកិច្ចទៅកាន់ប្រទេស Belarus Ouzbekistan និងKazakhstan ដែលនឹងចប់ជាស្រេចបាច់ លុះនៅថ្ងៃ ២៧ កញ្ញា។
ចុះផ្សាយនៅថ្ងៃ៖
ស្តាប់ - ០២:១៩
គោលដៅទស្សនកិច្ច តាមប្រសាសន៍លោកប្រធានរដ្ឋសភាចិន Wu Bangguo គឺ ដើម្បីស៊ីជម្រៅសហប្រតិបត្តិការ និងពង្រឹងទំនាក់ទំនងរវាងសាធារណរដ្ឋប្រជាមានិតចិន និងសហព័ន្ធរុស្ស៊ី។ គាត់គូសបញ្ជាក់ថា គឺក្នុងឆ្នាំនេះតែម្តង ដែលជាខួបគម្រប់១០ឆ្នាំ តាំងពីចិន និងរុស្ស៊ីបានចុះនឹងគ្នា ជា “ សន្ធិសញ្ញាស្តីអំពីមិត្តភាព សហប្រតិបត្តិការ និងការរួមរស់ភូមិផង របងល្អនឹងគ្នា ”។ ថ្លែងរសៀលម្សិលមិញក្នុងសម័យប្រជុំលើកទី៥នៃ ” គណៈកម្មការខាងសហប្រតិបត្តិការរវាងរដ្ឋសភាចិន និងសភាឌូម៉ារុស្ស៊ី ” ដោយរួមជាមួយលោកប្រធានសភាឌូម៉ារុស្ស៊ី Boris Gryzlov លោកប្រធានរដ្ឋសភាចិន Wu Bangguo បានលើកឡើងថា៖ ខាងវិស័យនយោបាយ ការជឿទុកចិត្តគ្នាទៅវិញ ទៅមកជាយុទ្ធសាស្ត្រ ចេះតែចាក់ឫសជ្រៅទៅៗ បញ្ហាព្រំដែនបន្សល់ទុកដោយប្រវត្តិសាស្ត្របានត្រូវដោះស្រាយរួចទាំងស្រុង គូភាគីតែងគាំទ្រគ្នាយ៉ាងប្តូរផ្តាច់ ក្នុងបញ្ហាណាដែលមានន័យគន្លឹះ។
ខាងសេដ្ឋកិច្ច កំពុងសមិទ្ធិចេញជាផ្លែផ្កា គឺគម្រោងយុទ្ធសាស្ត្រធំៗកើនឡើងយ៉ាងបង្គួរ ទាំងគុណភាព ទាំងកម្រិតនៃសហប្រតិបត្តិការតាមផ្លូវអនុវត្ត។ ខាងមនុស្សធម៌ មានប្រព្រឹត្តិទៅយ៉ាងជោគជ័យ ឆ្នាំប្រទេសចិននៅរុស្ស៊ី និងឆ្នាំប្រទេសរុស្ស៊ី នៅចិន ក៏ដូចជាឆ្នាំនៃភាសាប្រទេសទាំងពីរ រួចជាលទ្ធផលមិត្តភាពបានជ្រៀតចូលយ៉ាងជ្រៅ ទៅក្នុងបេះដូងប្រជាជនចិន និងរុស្ស៊ី។
ក្នុងក្របខ័ណ្ឌ អ.ស.ប. និងក្រុម២០ប្រទេសដែលមានសេដ្ឋកិច្ចហំហួនជាងគេ ហៅថា G20 ព្រមទាំងក្នុងយន្តការអន្តរជាតិពហុភាគីផ្សេងៗទៀត ចិន និងរុស្ស៊ីតែងផ្លាស់ប្តូរពត៌មាន និងសម្របសម្រួលសកម្មភាពគ្នា ដោយពង្រឹងភាពជាដៃគូយុទ្ធសាស្ត្រ។
លោកប្រធានសភាឌូម៉ារុស្ស៊ី Boris Gryzlov ពីចំណែកខ្លួនវិញ បានឲ្យតម្លៃខ្ពស់ដល់យន្តការនៃដល់ការប្តូរទស្សនកិច្ចទៅវិញ ទៅមកជារឿយៗ រវាងគណៈប្រតិភូរដ្ឋសភាចិន និងរុស្ស៊ី។ តាមមតិគាត់ ជំនួបបែបនេះមួយលើកៗ គឺតែងរួមវិភាគទានដ៏សំខាន់ទៅក្នុងការអភិវឌ្ឍន៍ទំនាក់ទំនងអន្តររដ្ឋ។
ពេលជួបប្រស្រ័យគ្នារវាងលោកប្រធានរដ្ឋសភាចិន Wu Bangguo និងលោក ពូទីន នាយករដ្ឋមន្ត្រីរុស្ស៊ី គូភាគីបានឯកភាពគ្នាថា បង្កើនទំហំផ្តោះប្តូរពាណិជ្ជកម្មរវាងប្រទេសទាំងពីរដែលក្នុងឆ្នាំមុន មានទឹកប្រាក់ ៦០.០០០លានដុល្លារអាមេរិក ឲ្យទៅទល់ឆ្នាំ ២០១៥ ឡើងដល់ ១០០.០០០លានដុល្លារ ហើយទៅទល់ឆ្នាំ២០២០ វាត់រហូតដល់ ២០០.០០០លានដុល្លារតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ