អតីតមេដឹកនាំខ្មែរក្រហមក៏បានប្រារព្ធពិធីបុណ្យចូលឆ្នាំដែរ
ក៏ដូចជាប្រជាពលរដ្ឋខ្មែរទូទៅដែរ អតីតមេដឹកនាំជាន់ខ្ពស់ខ្មែរក្រហម៤រូបដែលកំពុងជាប់ក្នុងមន្ទីរ ឃុំឃាំងគឺ៖ នួន ជា ខៀវ សំផន អៀង សារី និង អៀង ធីរិទ្ធ ក៏បានប្រារព្ធពិធីបុណ្យចូលឆ្នាំតាមគន្លងព្រះពុទ្ធសាសនាដែរ។ សាលាក្តីខ្មែរក្រហមបានអនុញ្ញាតឱ្យអតីតមេដឹកនាំខ្មែរក្រហមទាំងនោះ បានរៀបចំពិធីសូត្រមន្តនៅក្នុងមន្ទីរឃុំឃាំងដើម្បីអបអរបុណ្យចូល ឆ្នាំថ្មីនៅមុនពេលដែលពួកគេត្រូវឡើងសវនាការសំណុំរឿង០០២នៅក្នុង អំឡុងពេលពីរឬបីខែខាងមុខនេះ។ ដោយឡែកតែឌុចម្នាក់មិនបានចូលរួមពិធីនោះទេ ពីព្រោះតែគាត់ជាគ្រិស្តបរិស័ទ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា ពីទីក្រុងភ្នំពេញ
ពិធីសូត្រមន្តឆ្នាំថ្មីតាមគន្លងព្រះពុទ្ធសាសនាត្រូវបានគេប្រារព្ធធ្វើឡើងនៅក្នុងមន្ទីរឃុំឃាំងនៃសាលាក្តីខ្មែរក្រហមតាំងពីប៉ុន្មានថ្ងៃមុនពិធីបុណ្យចូលឆ្នាំមកម្ល៉េះ។ អតីតមេដឹកនាំជាន់ខ្ពស់ខ្មែរក្រហម៤រូបគឺ ៖ នួន ជា- ខៀវ សំផន- អៀង សារី និងអៀង ធីរិទ្ធ បានចូលរួមទទួលអំណរឆ្នាំថ្មី និងទទួលពរជ័យពីព្រះសង្ឃគ្រប់ៗគ្នា។
លោក ឌឹម សុវណ្ណារុំ មន្ត្រីទទួលបន្ទុកផ្នែកព័ត៌មាននៃសាលាក្តីខ្មែរក្រហមបានប្រាប់ឱ្យដឹងនៅថ្ងៃនេះថា ពិធីបុណ្យតាមប្រពៃណីសាសនាត្រូវបានសាលាក្តីខ្មែរក្រហមរៀបចំធ្វើសម្រាប់អតីតមេដឹកនាំខ្មែរក្រហមទាំងនោះជារៀងរាល់ឆ្នាំទៅតាមជំនឿរបស់ពួកគេ។ ពិធីនេះក៏ត្រូវបានរៀបចំធ្វើឡើងស្របពេលដែលក្រសួងមហាផ្ទៃអនុញ្ញាតឱ្យរៀបចំធ្វើតាមមន្ទីរឃុំឃាំងនានានៅទូទាំងប្រទេស។ ដោយឡែកតែឌុច អតីតប្រធានមន្ទីរសន្តិសុខ ស២១ មិនបានចូលរួមក្នុងពិធីនោះទេពីព្រោះតែគាត់ជាគ្រិស្តបរិស័ទ។
គួរកត់សម្គាល់ថា អតីតមេដឹកនាំជាន់ខ្ពស់ខ្មែរក្រហមដែលកំពុងតែជាប់ក្នុងមន្ទីរឃុំឃាំងដើម្បីរង់ចាំការកាត់ទោសពីតុលាការចម្រុះតែងតែប្រារព្ធពិធីបុណ្យផ្សេងៗទៅតាមប្រពៃណីព្រះពុទ្ធសាសនាដូចជាពិធីបុណ្យចូលឆ្នាំឬបុណ្យភ្ជុំបិណ្ឌជាដើម ពីព្រោះពួកគេក៏ជាពុទ្ធសាសនិកជនដែរ។ មានតែឌុចម្នាក់គត់ដែលបានផ្លាស់ប្តូរពីព្រះពុទ្ធសាសនាទៅកាន់គ្រិស្តសាសនាវិញក្រោយពីរបបខ្មែរក្រហមដួលរលំទៅ។ ការផ្លាស់ប្តូរសាសនារបស់ឌុចត្រូវបានអ្នកខ្លះយល់ឃើញថាឌុចបានស្វែងរកការលុបលាងបាបកម្មដែលគាត់បានធ្វើក្នុងរបបខ្មែរក្រហម។
នៅឯស្រុកអន្លង់វែង ខេត្តឧត្តរមានជ័យឯណោះវិញ ផ្នូរសពរបស់ ប៉ុល ពត បានក្លាយជាទីសក្ការៈមួយសម្រាប់បងប្អូនអតីតខ្មែរក្រហមនៅក្នុងតំបន់នោះ។ មានសេចក្តីរាយការណ៍ថា អ្នកដែលគោរពស្រឡាញ់ប៉ុល ពតជាច្រើនបាននាំគ្នាយកម្ហូបអាហារ នំចំណីទៅសែនព្រេនឧទ្ទិសដល់ព្រលឹងរបស់អតីតមេដឹកនាំកម្ពុជាប្រជាធិបតេយ្យរូបនេះក្នុងឱកាសបុណ្យចូលឆ្នាំថ្មីនេះផងដែរ។ មានអ្នកខ្លះទៀតថែមទាំងបាននាំគ្នាដុតទៀនធូបបួងសួងសុំសេចក្តីសុខពីប៉ុល ពតទៀតផង។
ទោះបីជាបងធំទី១ ប៉ុល ពត បានស្លាប់មុននឹងត្រូវបានតុលាការកាត់ទោសក្តី ក៏នៅមាន នួន ជា -ខៀវ សំផន- អៀង សារី- និងអៀង ធីរិទ្ធ កំពុងរង់ចាំការកាត់ទោស។ លោក ឌឹម សុវណ្ណារុំបានឱ្យដឹងថា សវនាការសំណុំរឿង០០២នឹងត្រូវចាប់ផ្តើមក្នុងអំឡុងខែមិថុនា ឬកក្កដាខាងមុខនេះ។ រីឯឌុចអាចនឹងត្រូវគេកោះហៅឱ្យធ្វើជាសាក្សីផងដែរ។ ប្រសិនបើឌុចត្រូវគេកោះហៅឱ្យធ្វើសាក្សីមែន ឌុចនឹងត្រូវគេស្នើឱ្យស្បថមុននឹងនិយាយដូចជាសាក្សីផ្សេងៗទៀតដែរ។ គ្មានអ្នកណាដឹងថា អតីតមេខ្មែរក្រហមទាំងនោះបួងសួងសុំអ្វីខ្លះទេក្នុងពិធីបុណ្យចូលឆ្នាំថ្មីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ