រដ្ឋាភិបាលក្រិកអនុម័តផែនការសន្សំសំចៃលើផ្ទៃនៃអំពើហិង្សា
នៅទីបំផុត អធ្រាត្រយប់មិញ សភាក្រិកបានអនុម័ត វិធានការត្បិតត្បៀតថវិកាថ្មីដោយសំឡេងភាគច្រើនដាច់ខាតលើសលុប។ ផែនការសំន្សំសំចៃដែលជាចម្លើយតបទៅនឹងសំណើរបស់សហភាពអឺរ៉ុប និងអង្គការមូលនិធិរូបិយវត្ថុអន្តរជាតិ នឹងអនុញ្ញាតឱ្យក្រិកអាចចាប់ផ្តើមសង្គ្រោះហិរញ្ញវត្ថុជាតិ និងធានារ៉ាប់រងបានស្ថិរភាពតំបន់ចាយប្រាក់អឺរ៉ូ។ ប៉ុន្តែរដ្ឋាភិបាលក្រិកមិនអាចលើកដៃសាទរយ៉ាងពេញទំហឹង នឹងជោគជ័យនេះបានឡើយ ព្រោះប្រជាជនកំពុងខឹងសម្បា ចុះថ្នល់បញ្ចេញកំហឹងប្រឆាំងនឹងផែនការត្បិតត្បៀត ពេញផ្ទៃប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
វិធានការថ្មីដែលទើបត្រូវបានសភាក្រិកអនុម័តនៅយប់មិញនេះ អាចសន្សំប្រាក់បាន ប្រមាណជា៣៣០០លានអឺរ៉ូ តាមរយៈការកាត់បន្ថយប្រាក់បៀវត្សរ៍ កាត់បន្ថយប្រាក់ចូលនិវត្តន៍ និងលុបបំបាត់ការងាររដ្ឋមួយចំនួន ជាថ្នូរនឹងប្រាក់កម្ចីប្រមាណ១៣០ពាន់លានអឺរ៉ូដើម្បីទប់ទល់កុំឱ្យក្រិកក្ស័យធន។
សភាក្រិកអនុម័តវិធានការស្នើឡើងដោយម្ចាស់បំណុលក្នុងសំឡេងភាគច្រើនលើសលុប អាចជាចាត់ទុកជាជោគជ័យមួយរបស់រដ្ឋាភិបាល លោក Lucas Papademos ប៉ុន្តែចលនាប្រឆាំងក៏មានខ្លាំងនៅខាងក្រៅ។ ការប្រមូលផ្តុំនៅមុខសភា និងតាមផ្លូវ នាទីក្រុងអាថែន បានប្រព្រឹត្តទៅតាំងពីព្រឹកដល់យប់ជ្រៅខ្លាំង ! មានការប៉ះទង្គិចគ្នារវាងក្រុមបាតុករ និងប៉ូលិស រហូតដល់មានការបាញ់ផ្សែងឱ្យចេញទឹកភ្លែក និងរបួសជាង៥០នាក់។ បន្ទាប់មកគេសង្កេតឃើញមានការផ្ទុះ-ដុត រោងកុន ធនាគារ ប្រមាណជាង៤០កន្លែងនៅក្នុងរដ្ឋធានី។ ហាងទំនិញជាច្រើនត្រូវវាយបំផ្លាញនិងលួចប្លន់។ ក្រុមប៉ូលិស និងក្រុមពន្លត់អគ្គិភ័យ បំពេញការងារយ៉ាងត្រដាបត្រដួសបំផុតទើបយកឈ្នះលើកម្លាំងភ្លើងបាន។
នៅព្រឹកថ្ងៃចន្ទនេះ កម្លាំងបាតុករមិនថមថយទេ ! ក្រុងអាថែន ត្រូវគាំងស្តូកស្តឹង ផ្លូវថ្នល់ធំៗ បានក្លាយជាសមរភូមិប្រយុទ្ធ គ្របដណ្តប់ទៅដោយបំណែក កម្ទេចបាក់បែក និងសំរាមរាយប៉ាយ ពេញផ្លូវ ដូចសម័យផ្ទុះអំពើហិង្សាកាលពីឆ្នាំ២០០៨ ដែលអូសបន្លាយកាលណោះរាប់សប្តាហ៍ ប៉ុន្តែលើកនេះ ជាសំណាងល្អ គ្មានគ្រោះថ្នាក់ដល់ជីវិត។
បើតាមទូរទស្សន៍ជាតិក្រិក អំពើហិង្សា ក៏មានផ្ទុះឡើងដែរនៅតាមកោះទេសចរណ៍ និងក្រុងធំៗផ្សេងទៀត ដើម្បីបរិហារផែនការសន្សំសំចៃរបស់រដ្ឋាភិបាលលើកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ