ក្រុមប្រទេស G7 ប្រកាសទុកជាមុនថានឹងមិនទទួលស្គាល់លទ្ធផលប្រជាមតិនៅតំបន់គ្រីមេ
ក្រុមប្រទេសមហាអំណាចឧស្សាហកម្មទាំង ៧ ដែលហៅកាត់ថា G7 បានប្រកាស កាលពីថ្ងៃពុធថា ការបោះឆ្នោតប្រជាមតិ នៅគ្រីមេ ដែលរៀបចំធ្វើក្រោមការជ្រោមជ្រែងរបស់រុស្ស៊ី នឹងមិនមានតម្លៃខាងផ្លូវច្បាប់នោះទេ។ ក្រុមប្រទេសទាំង ៧ ក៏បានអំពាវនាវដល់ផងដែរដល់រដ្ឋាភិបាលក្រុងម៉ូស្គូឲ្យប្រមូលកងទ័ពចូលទៅក្នុងបន្ទាយរបស់ខ្លួនវិញ ដើម្បីជាជំហានឆ្ពោះទៅរកដំណោះស្រាយវិបត្តិតាមផ្លូវការទូត។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសេចក្តីថ្លែងការណ៍ ចេញផ្សាយពីសេតវិមាន កាលពីថ្ងៃពុធ ក្រុមប្រទេស G7 ដែលរួមមាន សហរដ្ឋអាមេរិក កាណាដា បារាំង អង់គ្លេស អាល្លឺម៉ង់ អ៊ីតាលី និងជប៉ុន ព្រមជាមួយនឹងមេដឹកនាំសហភាពអឺរ៉ុប បានអំពាវនាវដល់រដ្ឋាភិបាលរុស្ស៊ីឲ្យ “បញ្ឈប់រាល់សកម្មភាពទាំងអស់ ដែលនាំទៅរកការផ្លាស់ប្តូរលក្ខន្តិកៈផ្លូវច្បាប់របស់តំបន់គ្រីមេ ផ្ទុយពីច្បាប់របស់អ៊ុយក្រែន និងច្បាប់អន្តរជាតិ”។
គួរបញ្ជាក់ថា តំបន់គ្រីមេ ដែលបច្ចុប្បន្នស្ថិតក្រោមការកាន់កាប់របស់កងទ័ពរុស្ស៊ី គ្រោងនឹងរៀបចំបោះឆ្នោតប្រជាមតិមួយ នៅថ្ងៃអាទិត្យខាងមុខនេះ ដើម្បីផ្តាច់ខ្លួនពីអ៊ុយក្រែន ទៅភ្ជាប់ខ្លួនជាមួយនឹងរុស្ស៊ី។
នៅក្នុងសេចក្តីថ្លែងការណ៍ ដែលចេញផ្សាយតែប៉ុន្មានម៉ោងមុនពេលដែលលោកអូបាម៉ាទទួលជួបនាយករដ្ឋមន្រ្តីស្តីទីអ៊ុយក្រែន នៅសេតវិមាន ក្រុមប្រទេស G7 បានប្រកាសទុកជាមុនថា ពួកគេនឹងមិនទទួលស្គាល់លទ្ធផលនៃការបោះឆ្នោតប្រជាមតិនៅគ្រីមេនេះទេ ដោយសារតែ “វាជាដំណើរការបោះឆ្នោតដែលមិនមានការរៀបចំត្រឹមត្រូវ ហើយដែលធ្វើឡើងក្រោមការគំរាមកំហែងពីសំណាក់វត្តមានរបស់កងទ័ពរុស្ស៊ី”។
គួររំឭកឡើងវិញថា ក្រុមប្រទេស G7 បានទទួលប្រទេសរុស្ស៊ីជាសមាជិក កាលពីឆ្នាំ១៩៩៨ ហើយបង្កើតទៅជាក្រុម G8។ ការចេញផ្សាយសេចក្តីថ្លែងការណ៍ នៅក្នុងក្របខ័ណ្ឌ G7 នេះ គឺជាការបង្ហាញឲ្យឃើញថា ប្រទេសលោកខាងលិចកំពុងតែផាត់រុស្ស៊ីចេញពីក្រុម G8 ដើម្បីជាការតបតទៅនឹងអន្តរាគមន៍កងទ័ពរុស្ស៊ី នៅតំបន់គ្រីមេរបស់អ៊ុយក្រែន។
នៅក្នុងសេចក្តីថ្លែងការណ៍ កាលពីថ្ងៃពុធ ក្រុមប្រទេស G7 បានបញ្ជាក់សាជាថ្មីម្តងទៀតថា ពួកគេនឹងព្យួររាល់កិច្ចប្រជុំទាំងអស់ ដែលទាក់ទងនឹងការរៀបចំជំនួបកំពូល G8 ដែលមានន័យថា ពួកគេនឹងធ្វើពហិការមិនចូលរួមក្នុងជំនួបកំពូល G8 ដែលត្រូវធ្វើនៅរុស្ស៊ី នៅខែមិថុនាខាងមុខនេះទេ ប្រសិនបើរុស្ស៊ីនៅតែបន្តកាន់កាប់តំបន់គ្រីមេតទៅទៀត។
លោកហ្វ្រង់ស័រ ហូឡង់ វិញ បានព្រមានលោកវ៉្លាឌីមៀរ ពូទីន នៅក្នុងកិច្ចសន្ទនាតាមទូរស័ព្ទ កាលពីថ្ងៃពុធនេះថា ការភ្ជាប់តំបន់គ្រីមេទៅនឹងទឹកដីរុស្ស៊ី គឺជា “ការកាត់យកទឹកដីអ៊ុយក្រែន ដែលជារឿងមិនអាចទទួលយកបានសម្រាប់សហគមន៍អន្តរជាតិ”។ នេះបើយោងតាមសេចក្តីប្រកាសព័ត៌មានចេញផ្សាយដោយវិមានប្រធានាធិបតីបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ