បារាំងតាំងបង្ហាញផលិតផលលើកដំបូង នៅកម្ពុជា
ក្រោមការជួយជ្រោមជ្រែងពីស្ថានទូតបារាំង សភាពាណិជ្ជកម្មបារាំង-កម្ពុជានឹងរៀបចំព្រឹត្តិការណ៍សប្តាហ៍បារាំង ឈ្មោះថា សួស្តីឡាហ្វ្រង់ ចាប់ពីថ្ងៃសុក្រ ទី២៩ ខែតុលា រហូតដល់ថ្ងៃអាទិត្យ ទី៧ ខែវិច្ឆិកា ខាងមុខ។ សប្តាហ៍បារាំង នៅកម្ពុជា ដើម្បីបង្ហាញសាធារណជនឱ្យស្គាល់ និងសាកល្បងផលិតផលបារាំងនានា ដែលនាំចូលមកកម្ពុជា។ ការតាំងបង្ហាញផលិតផលបារាំង ក៏បានធ្វើឡើង ក្នុងន័យជំរុញដល់សកម្មភាពជំនួញរបស់ក្រុមហ៊ុនចែកចាយផលិតផលបារាំង ព្រមទាំងក្រុមហ៊ុនសហគ្រាស និងភោជនីយដ្ឋានបារាំងទាំងឡាយ នៅក្នុងប្រទេសកម្ពុជា។
ចុះផ្សាយនៅថ្ងៃ៖
សេចក្តីរាយការណ៍របស់លី ម៉េងហួរពីទីក្រុងភ្នំពេញ
សេចក្តីប្រកាសព័ត៌មានរបស់ស្ថានទូតបារាំង ប្រចាំកម្ពុជា ដែលបានបង្ហាញនៅក្នុងសន្និសីទកាសែត នាព្រឹកថ្ងៃច័ន្ទ ទី២៥ តុលា ឆ្នាំ២០១០ បានលើកឡើងថា នៅក្នុងព្រឹត្តិការណ៍ ដែលត្រូវរៀបចំឡើងជាលើកដំបូងនៅកម្ពុជានេះ ភោជនីយដ្ឋាន និងក្រុមហ៊ុនចែកចាយផលិតផល បារាំងធំៗ ជាច្រើន នឹងបង្កើតកម្មវិធីផ្សេងៗ ពេញមួយសប្តាហ៍ នៅពាសពេញរាជធានីភ្នំពេញ ចាប់ពីថ្ងៃទី២៩តុលា រហូតដល់ថ្ងៃទី៧វិច្ឆិកា។
សេចក្តីប្រកាសបានបង្ហាញថា ការប្រារឰទិវាសប្តាហ៍បារាំងនេះឡើង មិនមែនសំដៅតែទៅលើទិដ្ឋភាពពាណិជ្ជកម្មនោះទេ គឺមានគោលបំណងសំខាន់ខាងផ្នែកវប្បធម៌ ព្រោះវាជាឱកាសនៃការចែករំលែកពេលវេលាសប្បាយរីករាយ និងផ្លាស់ប្តូរបទពិសោធន៍គ្នាទៅវិញទៅមក ជាពិសេសជុំវិញអាហារប្រពៃណីបារាំង។
មុខម្ហូបពិសេសរបស់តំបន់មួយចំនួន នៅក្នុងប្រទេសបារាំង ដូចជា តំបន់លីម៊ូហ្សាំង ឡង់ហ្គឺដុក និង តំបន់អាល់ហ្សាស់ នឹងរៀបចំពិធីបង្ហាញនៅតាមភោជនីយដ្ឋានបារាំងល្បីៗនានា នៅទីក្រុងភ្នំពេញ។
សេចក្តីប្រកាសបង្ហាញថា មានក្រុមហ៊ុនចែកចាយផលិតផលបារាំង ប្រមាណ ៥០ និងសហគ្រាសធុនតូច និងមធ្យមឯករាជ្យជាង ១០០ ព្រមទាំងអង្គការក្រៅរដ្ឋាភិបាលជាច្រើនទៀត នឹងចូលរួមនៅក្នុងព្រឹត្តិការណ៍នេះ ដូចជា ៖ នៅផ្សារទំនើបឡាក់គី និង Bonjour Mart (ក្រុមហ៊ុន តូតាល់ ) ហាងវ៉ែនតា និងឱសថស្ថាន ជាដើម។
ពាក់ព័ន្ធនឹងតួនាទីបារាំង ក្នុងវិស័យសេដ្ឋកិច្ច កាលពីឆ្នាំ២០០៩ ស្ថានទូតបារាំង បានប្រកាសថា ប្រទេសបារាំង ស្ថិតនៅលំដាប់ថ្នាក់ទី៩ លើពិភពលោក ក្នុងចំណោមអតិថិជននានារបស់កម្ពុជា ហើយបារាំងក៏ជាប្រទេសផ្គត់ផ្គង់ផលិតផលលំដាប់ថ្នាក់ទី១០ មកកម្ពុជាផងដែរ។
យោងតាមរបាយការណ៍ បារាំងជាប្រទេសអឺរ៉ុបទីមួយ ក្នុងការនាំចេញផលិតផល មកកាន់ប្រទេសកម្ពុជា ដោយបរិមាណនៃការផ្លាស់ប្តូរពាណិជ្ជកម្មរវាងប្រទេសកម្ពុជា និងបារាំង មានតម្លៃសរុប ១២៨ លានអឺរ៉ូ ក្នុងឆ្នាំ២០០៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ