រុស្ស៊ីបានប្រារព្ធខួបទី៦៨នៃទិវាមហាជ័យជំនះ ថ្ងៃ៩ឧសភា
ជាកិត្តិយសដល់កាលបរិច្ឆេទជ័យជំនះនេះក្នុងសង្គ្រាមលោកលើកទី២ ព្រឹកមិញ អស់ពេញមួយម៉ោង នៅលើទីលានក្រហម មុខវិមានក្រេមឡាំង ក្នុងរដ្ឋធានីម៉ូស្គូ មានប្រព្រឹត្តទៅយ៉ាងគគ្រឹកគគ្រេង ព្យុហយាត្រាកងទ័ពដោយមានការចូលរួមនៃយោធា១ម៉ឺន១ពាន់នាក់, យានយន្តចម្បាំងគ្រប់ប្រភេទ១១០គ្រឿង, យន្តហោះនិងឧទ្ធម្ភាគចក្រ ចំនួន៦៨គ្រឿង គឺស្របនឹងតួលេខនៃខួប៦៨ឆ្នាំនោះ។
ចុះផ្សាយនៅថ្ងៃ៖
ស្តាប់ - ០៣:២១
ជាបឋម គួរនិយាយថា ខុសពីបស្ចិមប្រទេសដែលតែងប្រារព្ធទិវាជ័យជំនះ គឺនៅថ្ងៃ៨ឧសភា រុស្ស៊ីវិញបានសម្រេចយកជាកាលបរិច្ឆេទជ័យជំនះ គឺថ្ងៃ៩ឧសភា ដ្បិតពេលដែលមេទ័ពនៃរបបហ្វាស៊ីស្តអាល្លឺម៉ង់ បានចុះហត្ថលេខាសុំចុះចាញ់ នៅពីមុខពួកមេទ័ពនៃ“សម្ព័ន្ធប្រឆាំងហ៊ីត្លែរ” គឺសហភាពសូវៀត ស.រ.អា. អង់គ្លេស បារាំង នៅក្រុង Berlin ទ្រនិចនាឡិកាចង្អុលម៉ោង ២២និង៤៣នាទីនៃថ្ងៃទី៨ឧសភាឆ្នាំ១៩៤៥ ប៉ុន្តែសម្រាប់សហភាពសូវៀតវិញ ពេលនោះគឺត្រូវនឹងម៉ោង០និង៤៣នាទី ម៉ោងម៉ូស្គូ រំលងអធ្រាត្រ ចូលថ្ងៃទី៩ឧសភាទៅហើយ។
ម្យ៉ាងទៀត សម្រាប់រុស្ស៊ី ជ័យជំនះថ្ងៃ៩ឧសភាគឺមានន័យជាការខ័ណ្ឌបញ្ចប់សង្គ្រាម ក្រោមឈ្មោះជាផ្លូវការថា “មហាសង្គ្រាមការពារមាតុភូមិ” ដែលបានពន្យារទៅអស់ ១៤១៨ថ្ងៃ រាប់ពីថ្ងៃទី២២មិថុនា ឆ្នាំ១៩៤១ ពេលកងទ័ពអាល្លឺម៉ង់ស្រាប់តែវាយលុកមកលើសហភាពសូវៀត។
ចំណែកសង្គ្រាមលោកលើកទី២ផ្ទាល់ វាបានចាប់ផ្តើមឡើង នៅថ្ងៃទី១កញ្ញា ឆ្នាំ១៩៣៩ ហើយបានចប់ទៅនៅទ្វីបអឺរ៉ុប គឺនៅថ្ងៃទី៨ឧសភា ឆ្នាំ១៩៤៥ និងនៅទ្វីបអាស៊ី គឺនៅថ្ងៃទី២កញ្ញា ឆ្នាំនោះឯង ដោយការចុះហត្ថលេខាសុំចុះចាញ់នៃមេទ័ពរបបយោធានិយមជប៉ុន។
មុនបើកជាក្បួនព្យុហយាត្រា នៅលើទីលានក្រហមព្រឹកមិញ លោកប្រធានាធិបតីពូទីន ដែលស្របនឹងរដ្ឋធម្មនុញ្ញ ជាអគ្គមេបញ្ជាការជាន់ខ្ពស់បំផុតនៃកងទ័ព បានថ្លែងសុន្ទរកថាឧទ្ទិសដល់ទិវាមហាជ័យជំនះថ្ងៃ៩ឧសភា ដោយសង្កត់ធ្ងន់ថា ៖ រុស្ស៊ីនៅចងចាំច្បាស់ណាស់អំពីសោកនាដកម្មនៃសង្គ្រាមនេះ ហើយរុស្ស៊ីនឹងធ្វើសព្វបែបយ៉ាងដើម្បីកុំឲ្យនរណាហ៊ានបញ្ឆេះភ្លើងសង្គ្រាមដែលគម្រាមប្រជាជននិងរដ្ឋរុស្ស៊ីទៀតឡើយ។ ពិតជារុស្ស៊ីនិងសហភាពសូវៀតដែលបានរែកលើស្មាខ្លួន នូវបន្ទុកធ្ងន់ជាងគេនៃសង្គ្រាមនោះ និងបានបំផ្លាញឲ្យហិនហោចទៅ គម្រោងសែនយង់ឃ្នងរបស់ពួកហ្វាស៊ីស្ត ចង់ធ្វើជាចៅហ្វាយលើពិភពលោកទាំងមូល។ ហើយពន្លឺនៃជ័យជំនះកាលពី៦៨ឆ្នាំមុន នឹងនៅតែបន្តចែងចាំង
ជាប់ជានិច្ចសម្រាប់ប្រជាពលរដ្ឋរុស្ស៊ី ពីស្រករមួយទៅស្រករមួយ។
ដោយហេតុថា ក្នុង “មហាសង្គ្រាមការពារមាតុភូម៌” សហភាពសូវៀតបានបាត់បង់ពលរដ្ឋខ្លួនដល់ទៅ២៦លាន៥សែននាក់ បានជាអ្នកស្រុកហៅបុណ្យជ័យជំនះនេះថាជា “បុណ្យអមដោយទឹកភ្នែករលីងរលោង”។
ព្យុហយាត្រាផ្ទាល់បានចាប់ផ្តើម គឺពីការដង្ហែចូលលើទីលានក្រហម នូវទង់ជាតិត្រីពណ៌របស់រុស្ស៊ី និងទង់ជ័យជំនះក្រហមឆ្អិនឆ្អៅ ដែលកាលពី៦៨ឆ្នាំមុន ត្រូវបានយុទ្ធជនសូវៀតដោតលើអគាររដ្ឋសភានៃអាណាចក្រអាល្លឺម៉ង់ទី៣ ក្នុងក្រុងប៊ែរឡាំង ផ្ចាញ់របបHitlerឲ្យលឹបបាត់ទៅ។
បន្ទាប់មក គឺព្យុហយាត្រានៃយោធា១ម៉ឺន១ពាន់នាក់ តំណាងឲ្យកងទ័ពជើងគោក ជើងទឹក ជើងអាកាស យានយន្តចម្បាំង១១០គ្រឿង យន្តហោះនិងឧទ្ធម្ភាគចក្រចំនួន៦៨គ្រឿង គឺស្របនឹងតួលេខនៃខួប៦៨ឆ្នាំនោះ អស់ទាំងនេះគឺសុទ្ធតែតំណាងឲ្យសព្វាវុធគ្រប់ប្រភេទ ដែលបច្ចុប្បន្នបំពាក់នៅនឹងកងទ័ពរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ