សម្តេចឪនរោត្តម សីហនុនឹងផ្ញើសាររំលែកមរណទុក្ខលោកគីម ជុងអ៊ីល
ព្រះមហាវីរក្សត្រនរោត្តម សីហនុបានផ្ញើលិខិតរំលែកទុក្ខ នៅថ្ងៃចន្ទនេះ ចំពោះមរណភាពរបស់អគ្គមគ្គទេសក៍កូរ៉េខាងជើងលោកគីម ជុងអ៊ីល។ លោកគីម ជុងអ៊ីលជាកូនប្រុសរបស់សេនាប្រមុខគីម អ៊ីលស៊ុង ដែលត្រូវជាបងធម៌របស់សម្តេចឪនរោត្តម សីហនុ។ នេះបើតាមបន្ទូលរបស់ព្រះអង្គម្ចាស់ស៊ីសុវត្ថិ ធម្មិកោ។ អ្នកនាំពាក្យក្រសួងការបរទេសកម្ពុជាអះអាងថាជំហរកម្ពុជា គឺនឹងនៅតែបន្តទំនាក់ទំនងល្អជាមួយកូរ៉េខាងជើងដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១២
សម្តេចឪនរោត្តម សីហនុបានផ្ញើព្រះរាជសាររំលែកទុក្ខមរណភាពរបស់មេដឹកនាំកំពូលកូរ៉េខាងជើងគីម ជុងអ៊ីល នៅថ្ងៃចន្ទនេះ។ នេះបើតាមបន្ទូលអះអាងរបស់ព្រះរាជលេខាផ្ទាល់របស់សម្តេចឪ គឺព្រះអង្គម្ចាស់ស៊ីសុវត្ថិ ធម្មិកោ។
ព្រះអង្គម្ចាស់ធម្មិកោបានមានបន្ទូលប្រាប់វិទ្យុបារាំងអន្តរជាតិនៅថ្ងៃនេះថា សម្តេចតាមានទំនាក់ទំនងជិតស្និទ្ធខ្លាំង ជាមួយប្រទេសកូរ៉េខាងជើង តាំងពីចុងទសវត្សរ៍ទី៦០ជាមួយសេនាប្រមុខគីម អ៊ីលស៊ុង ដែលជាឪពុករបស់អគ្គមគ្គទេសក៍គីម ជុងអ៊ីល ដែលទើបទទួលមរណភាពកាលពីថ្ងៃសៅរ៍កន្លងទៅនេះ។
ព្រះមហាវីរក្សត្របានមានទំនាក់ទំនងកាន់តែស្និទ្ធ នឹងរបបព្យុងយ៉ាងរហូតដល់របបនេះសង់ព្រះរាជដំណាក់មួយថ្វាយព្រះអង្គទៀតផង។ ព្រះរាជលេខាផ្ទាល់របស់សម្តេចឪគឺព្រះអង្គម្ចាស់ធម្មិកោបានមានបន្ទូលថា សម្តេចឪបានចាត់ទុកលោកសេនាប្រមុខគីម អ៊ីលស៊ុងជាបងធម៌របស់ព្រះអង្គទៀតផង។ ហើយថាជាការតបស្នងវិញ សម្តេចឪបានប្រគល់ដំណាក់ដែលព្រះអង្គបានប្រសូត អោយរដ្ឋាភិបាលកូរ៉េខាងជើងខ្ចីធ្វើជាស្ថានទូតសព្វថ្ងៃនេះ។
ទំនាក់ទំនងល្អនេះនឹងនៅបន្តរហូត បើទោះជាមេដឹកនាំកំពូលគីម ជុងអ៊ីលទទួលមរណភាពក៏ដោយ នេះបើយោងតាមការអត្ថាធិប្បាយរបស់អ្នកនាំពាក្យក្រសួងការបរទេសកម្ពុជាលោកកុយ គួង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ