ប្រមុខការទូតបារាំងសន្យាជាមួយប៉េកាំងថាប្រទេសទាំងពីរនឹងមានទំនាក់ទំនងនឹងនរល្អ
កាលពីនិទាឃរដូវកន្លងទៅថ្មីៗនេះ លោក ឡូរ៉ង់ ហ្វាប៊ីយូស ធ្លាប់បានអញ្ជើញទៅបំពេញទស្សនកិច្ចនៅទីក្រុងប៉េកាំង។ ប៉ុន្តែកាលណោះ លោកពុំបានមានជំនួបជាមួយឥស្សរជនចិនសំខាន់ៗឡើយ។ ដោយអាក់អន់ចិត្ត លោកហ្វាប៊ីយូសក៏បានសម្រេចចិត្តបង្រួញពេលទស្សនកិច្ច ហើយវិលត្រឡប់មកប្រទេសបារាំងវិញ។ លើកនេះ លោកប្រមុខការទូតបារាំងបានត្រូវទទួលដោយលោកនាយករដ្ឋមន្ត្រីចិន វិន ជាប៉ាវ ហើយនិងលោក លី ខឹឈាំង ដែលអាចក្លាយជាអនាគតនាយករដ្ឋមន្ត្រីចិនជំនួសលោកវិន ជាប៉ាវ ផងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:១៩
មូលហេតុដែលនាំឲ្យទីក្រុងប៉េកាំងទទួលរាក់ទាក់លោកឡូរ៉ង់ហ្វាប៊ីយូសយ៉ាងដូច្នេះ គឺដោយសារតែនៅពេលនេះ លោកហ្វាប៊ីយូសអញ្ជើញមកបំពេញទស្សនកិច្ចក្នុងឋានៈជារដ្ឋមន្ត្រីក្រសួងការបរទេសនៃប្រទេសបារាំង។ ប្រទេសបារាំងដែលជាដៃគូសេដ្ឋកិច្ចនិងនយោបាយដ៏សំខាន់សម្រាប់ប្រទេសចិននៅអឺរ៉ុប។ ម្យ៉ាងទៀត នេះជាលើកទីមួយដែលសមាជិករដ្ឋាភិបាលរបស់លោក ហ្វ្រង់ស័រហូឡង់ មួយរូបអញ្ជើញមកបំពេញទស្សនកិច្ចនៅក្នុងប្រទេសចិន។ ហើយកាលពីនិទាឃរដូវកន្លងទៅ ទីក្រុងប៉េកាំងបានព្រងើយកន្តើយជាមួយលោកហ្វាប៊ីយូសគឺ បណ្តាលមកពីកាលណោះលោកឡូរ៉ង់ហ្វាប៊ីយូសអញ្ជើញមកប្រទេសចិនក្នុងឋានៈជាបេសកជនរបស់បេក្ខជនប្រធានាធិបតីហ្វ្រង់ស័រហូឡង់ដែលចេញពីបក្សសង្គមនិយមបារាំង ហើយក៏ដោយហេតុតែទីក្រុងប៉េកាំងពុំចង់ជាប់ទាក់ទិនជាមួយការបោះឆ្នោតជ្រើសតាំងប្រធានាធិបតី ហើយនិងបញ្ហានយោបាយផ្ទៃក្នុងបារាំង។ ដោយឡែក សម្រាប់ទីក្រុងប៉េកាំង គណបក្សសង្គមនិយមគឺជាគណបក្សនយោបាយមួយនៅក្នុងប្រទេសបារាំងដែលច្រើនទិតៀនទីក្រុងប៉េកាំងពីបញ្ហាពុំគោរពសិទ្ធិមនុស្សនិងសិទ្ធិសេរីភាពនយោបាយ។
ក្រៅពីលោក Yang Jiechi ដែលជាសមភាគីរបស់លោក ឡូរ៉ង់ហ្វាប៊ីយូស ទីប្រឹក្សារដ្ឋលោក Dai Bingguo ដែលជាអ្នករៀបចំសម្របសម្រួលនយោបាយការបរទេសចិនដ៏សំខាន់ ប្រមុខការទូតបារាំងលោក ឡូរ៉ង់ ហ្វាប៊ីយូស ក៏បានមានជំនួបពិភាក្សានៅថ្ងៃអង្គារម្សិលមិញជាមួយលោកនាយករដ្ឋមន្ត្រីចិន វិន ជាប៉ាវ ហើយនិង លោក លី ខឹឈាំង ដែលអាចក្លាយជាអនាគតនាយករដ្ឋមន្ត្រីចិនឡើងមកកាន់កាប់តំណែងជំនួសលោកវិន ជាប៉ាវ ។
ប្រមុខការទូតបារាំងសន្យាជាមួយប៉េកាំងថាប្រទេសទាំងពីរនឹងមានទំនាក់ទំនងនឹងនរល្អ គឺមានមូលហេតុដូចសេចក្តីប្រកាសឲ្យដឹងដោយ លោក ឡូរ៉ង់ហ្វាប៊ីយូស ថា “ទីក្រុងប៉ារីសមានមហិច្ឆតាថ្មីក្នុងការអភិវឌ្ឍន៍ទំនាក់ទំនងជាមួយទីក្រុងប៉េកាំង ហើយក៏ដោយសារតែប្រទេសចិនបានក្លាយទៅជាប្រទេសដៃគូពាណិជ្ជកម្មដ៏សំខាន់សម្រាប់ប្រទេសបារាំង។
គួរបញ្ជាក់ថា លោកប្រធានាធិបតីបារាំង ហ្វ្រង់ស័រហូឡង់ នឹងអញ្ជើញទៅបំពេញទស្សនកិច្ចនៅប្រទេសចិនឆ្នាំក្រោយ ក្រោយពីទីក្រុងប៉េកាំងមានក្រុមប្រមុខដឹកនាំថ្មីឡើងមកកាន់កាប់អំណាច។
ហើយប្រមុខការទូតបារាំងលោក ឡូរ៉ង់ ហ្វាប៊ីយូស ក៏បានថ្លែងពន្យល់ប្រាប់ភាគីចិនឲ្យដឹង ពីទំនាក់ទំនង់រវាងប្រទេសចិនជាមួយប្រទេសបារាំងក្រោមការគ្រប់គ្រងរបស់លោកហូឡង់ថា មានលក្ខណៈខុសពីសម័យកាលរបស់លោកនីកូឡាសាកូហ្ស៊ី។
បើយោងតាម លោក ឡូរ៉ង់ហ្វាប៊ីយូស “ទីក្រុងប៉េកាំងត្រូវការទំនាក់ទំនងមួយដែលមានលំនឹងភាពល្អ ហើយនិងមានទស្សនៈវែងឆ្ងាយ”។
ក្នុងចំណោមបញ្ហាជាច្រើនដែលអាចធ្វើឲ្យភាគីចិនពុំសប្បាយចិត្តគឺបញ្ហាអន្តរជាតិ ដែលក្នុងនោះមានបញ្ហាដ៏ក្តៅគគុកដូចជាបញ្ហាអៀរ៉ង់និងបញ្ហាស៊ីរី។ ពាក់ព័ន្ធនឹងបញ្ហាស៊ីរីនេះ លោកប្រមុខការទូតបារាំងបានខិតខំថ្លែងពន្យល់ភាគីចិនថា ជំហរជាប្រពៃណីរបស់ចិនដែលតែង “ពុំលូកដៃជ្រាតជ្រែកចូលបញ្ហាផ្ទៃក្នុង” ពុំអាចអនុវត្តតទៅទៀតបានឡើយ ជាក់ស្តែង វិបត្តិនៅប្រទេសស៊ីរី ឥឡូវនេះ បានហូរហៀរចូលទៅដល់ប្រទេសទួរគី ប្រទេសលីបង់។ ជាងនេះទៅទៀត វាកំពុងក្លាយទៅជាវិបត្តិតំបន់ ឬអន្តរជាតិផងទៀត។
ក៏ប៉ុន្តែ អ្វីដែលពិសេសសម្រាប់ទីក្រុងប៉ារីសគឺ វិស័យពាណិជ្ជកម្ម ដោយហេតុថា នៅឆ្នាំ២០១១ ការដោះដូរពាណិជ្ជកម្មរវាងប្រទេសបារាំងនិងប្រទេសចិន បានបណ្តាលឲ្យជញ្ជីងពាណិជ្ជកម្មបារាំងមានឧនភាពប្រមាណ២៧ពាន់លានអឺរ៉ូ ដែលតំណាងដល់ទៅ៤០%នៃឧនភាពពាណិជ្ជកម្មសរុបរបស់ប្រទេសបារាំង។
វីដែលចម្លែក គឺលោកហ្វាប៊ីយូសពុំបានរំលឹកពីករណីលោក Patrick Devillersឡើយ។ ស្ថាបត្យករបារាំងរូបនេះធ្លាប់មានទំនាក់ទំនងជាមួយឥស្សរជនចិនដ៏សំខាន់ឈ្មោះ ប៉ូស៊ីឡៃ និងភរិយា ហើយដែលបានធ្វើឲ្យកើតមានភាពស្មុគស្មាញនៅក្នុងទំនាក់ទំនងបារាំង-ចិន ហើយដែលកម្ពុជាបានចាប់ឃុំខ្លួនតាមការស្នើសុំរបស់ទីក្រុងប៉េកាំង។ ចំណែកឯទីក្រុងប៉ារីសវិញ បានទាមទារឲ្យកម្ពុជាឆ្លើយបំភ្លឺពីមូលហេតុនិងការចោទប្រកាន់ដែលបាននាំឲ្យមានការចាប់ឃុំខ្លួនជនជាតិបារាំងរូបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ