កុមារ កូនស្ត្រីអ្នកបឹងកក់ យំរកម្តាយ ដែលជាប់ពន្ធនាគារក្នុងរឿងដីធ្លី
មួយថ្ងៃ មុនទិវាកុមារអន្តរជាតិ ថ្ងៃ១មិថុនា ក្រុមកុមារ ជាកូនស្ត្រីអ្នកភូមិបឹងកក់ ដែលជាប់ពន្ធនាគារក្នុងរឿងជម្លោះដីធ្លី បានប្រមូលផ្តុំ ស្រែកយំរកម្តាយ នៅមុខក្រសួងយុត្តិធម៌។ កុមារា កុមារី អាយុប្រមាណ ១០ ឆ្នាំ បានឈរយំផង និងស្រែកច្រៀងផង អំពាវឲ្យអាជ្ញាធរសមត្ថកិច្ច ពិសេសលោកនាយករដ្ឋមន្ត្រី ហ៊ុន សែន អន្តរាគមដោះលែងអ្នកភូមិបឹងកក់ ១៥ នាក់ ចេញពីពន្ធនាគារព្រៃស។ ក្រុមស្ត្រីបឹងកក់ទាំងនោះ ត្រូវបានតុលាការកាត់ទោស ដាក់ពន្ធនាគារ ពី ១ ឆ្នាំ ទៅ ២ ឆ្នាំកន្លះ ក្នុងរឿងជម្លោះដីនៅបឹងកក់ កាលពីថ្ងៃទី២៤ឧសភា សប្តាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
“ខ្ញុំត្រូវការម្តាយ។ ខ្ញុំពិបាកណាស់ ពេលអត់មានម្ដាយ។ ប្អូនខ្ញុំឈឺនៅផ្ទះ គ្មានអ្នកណាមើល ហើយខ្ញុំក៏មិនដែលបានចូលរៀន...”។ ពាក្យសម្តីទាំងនេះ គឺជាការទួញសោករបស់កុមារីអាយុ ១២ ឆ្នាំ ជាកូនស្ត្រីអ្នកភូមិបឹងកក់ម្នាក់។
នៅព្រឹកថ្ងៃព្រហស្បតិ៍នេះ សកម្មជនដីធ្លី អ្នកបុរីកីឡា ដីក្រហម អ្នកបឹងកក់ និងអ្នករស់នៅសហគមន៍ជាច្រើនទៀត រួមនឹងកុមារតូចជាច្រើននាក់ បានប្រមូលផ្តុំ នៅមុខក្រសួងយុត្តិធម៌ ទល់មុខព្រះបរមរាជវាំង ស្រែកទ្រហោយំ និងច្រៀងចម្រៀង អំពាវនាវឲ្យតុលាការ ដោះលែងម្តាយ-ឪពុក ជាអ្នកភូមិបឹងកក់ចំនួន ១៥ នាក់ ពីពន្ធនាគារព្រៃស។
អ្នកភូមិបឹងកក់ ដែលភាគច្រើនជាស្ត្រី និងជាម្តាយរបស់កុមារតូចៗ ត្រូវបានតុលាការ កាលពីថ្ងៃទី២៤ឧសភា កាត់ទោសដាក់ពន្ធនាគារ ពី១ ឆ្នាំ ដល់ ២ ឆ្នាំ ៦ខែ ក្នុងរឿងទំនាស់ដីធ្លីដ៏រ៉ាំរ៉ៃ នៅតំបន់បឹងកក់។
ក្រុមសកម្មជនដីធ្លី និងកុមារតូចៗ បានស្រែករកយុត្តិធម៌ និងដាក់ញត្តិទៅកាន់ក្រសួងយុត្តិធម៌ ដើម្បីឲ្យដោះលែងម្តាយពីពន្ធនាគារ។ ការចាប់ស្ត្រីអ្នកភូមិបឹងកក់ ដាក់ពន្ធនាគារ គឺជារឿងអយុត្តិធម៌។ នេះជាសម្រែករបស់កុមារាកុមារី នៅមួយថ្ងៃមុនទិវាកុមារអន្តរជាតិ ថ្ងៃ១មិថុនា។
តាមក្រុមសកម្មជនដីធ្លី ស្ត្រីអ្នកភូមិបឹងកក់ជាប់ទោស គ្រាន់តែការពារដីផ្ទះរបស់ខ្លួន ដែលត្រូវក្រុមហ៊ុនបូមខ្សាច់ពន្លិចប៉ុណ្ណោះ។ អង្គការសង្គមស៊ីវិលជាតិ និងអន្តរជាតិ បានចេញសេចក្តីថ្លែងការណ៍ ថ្កោលទោសដ៏ខ្លាំងក្លា ចំពោះការកាត់ទោសអ្នកតវ៉ាដីធ្លី នៅបឹងកក់។ តាមសេចក្តីថ្លែងការណ៍ជាបន្តបន្ទាប់ រឿងនេះ ជាការគំរាមកំហែងដល់សកម្មជនដីធ្លី ហើយតុលាការ ត្រូវដោះលែងអ្នកបឹងកក់ ឲ្យមានសេរីភាពឡើងវិញ។
ជុំវិញរឿងនេះ មន្ត្រីរដ្ឋាភិបាល ពិសេសលោកនាយករដ្ឋមន្ត្រី ហ៊ុន សែន នៅតែរក្សាភាពស្ងប់ស្ងាត់ ខណៈដែលការបោះឆ្នោតឃុំសង្កាត់ នឹងចូលមកដល់នៅថ្ងៃទី៣មិថុនា។ រីឯគណបក្សប្រឆាំងសមរង្ស៊ី កំពុងយកបញ្ហាដីធ្លី និងការបណ្តេញចេញ ពិសេសករណីរឿងបឹងកក់ ជាប្រធានបទឃោសនារកសំឡេងឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ