ប្រជាជនអ៊ីតាលីទៅបោះឆ្នោតរើសតំណាងរាស្ត្រនិងសមាជិកព្រឹទ្ធសភា
ប្រជាជនអ៊ីតាលីប្រហែលជា៤៧លាននាក់ បាននាំគ្នាទៅបោះឆ្នោត នៅថ្ងៃអាទិត្យនេះ ហើយនឹងបន្តនៅថ្ងៃចន្ទស្អែកទៀត ដើម្បីរើសអ្នកតំណាងរាស្ត្រ និងសមាជិកព្រឹទ្ធសភា។ មានគណបក្សចំនួន៥ កំពុងតែប្រជែងគ្នាដណ្តើមសន្លឹកឆ្នោត។ យោងតាមការស្ទាបស្ទង់មតិ គណបក្សប្រជាធិបតេយ្យដែលជាគណបក្សឆ្វេងនិយម របស់លោក Pier Luigi Bersani នឹងទទួលបានជោគជ័យ ក្នុងការបោះឆ្នោតនេះ ជាមួយនឹងសំលេងឆ្នោត ជាង៣៤% នាំមុខគណបក្ស កណ្តាលនិយមនិន្នាកាស្តាំរបស់អតីតនាយករដ្ឋមន្ត្រី Silvio Berlusconi ដែលអាចទទួលបានសំលេង៣០%។ រីឯគណបក្សកណ្តាលនិយមរបស់នាយករដ្ឋមន្ត្រីផុតអណត្តិ Mario Monti ប្រហែលជានឹងទទួលបានសំលេងតែជាង ១៣%រយ ប៉ុណ្ណោះ។ អ្វីដែលគេកំពុងបារម្ភនៅពេលនេះ គឺថាតើរដ្ឋាភិបាលថ្មីរបស់អ៊ីតាលី នឹងមានសមត្ថភាពគ្រប់គ្រាន់ ដើម្បីស្រោចស្រង់វិបត្តថវិកា របស់ប្រទេសជាតិបានឬទេ?
ចុះផ្សាយនៅថ្ងៃ៖
ស្តាប់ - ០២:០៧
ប្រជាជនអ៊ីតាលី ប្រហែលជា៤៧លាននាក់ បាននាំគ្នាទៅបោះឆ្នោត នៅថ្ងៃអាទិត្យនេះហើយនឹងបន្តនៅថ្ងៃចន្ទស្អែកទៀត ដើម្បីរើសអ្នកតំណាងរាស្ត្រ និងសមាជិកព្រឹទ្ធសភា។ គណបក្សចំនួន៥ កំពុងតែប្រជែងគ្នាដណ្តើមអសនៈនៅសភា ដែលមាន៦៣០ កៅអី និងនៅព្រឹទ្ធសភាដែលមាន៣១៥ កៅអី។
យោងតាមការស្ទាបស្ទង់មតិ គណបក្សប្រជាធិបតេយ្យឆ្វេងនិយម របស់លោក Pier Luigi Bersani នឹងទទួលបានជោគជ័យ ក្នុងការបោះឆ្នោតនេះ ជាមួយនឹងសំលេងឆ្នោត ជាង៣៤ ភាគរយ ដោយនាំមុខគណបក្សកណ្តាលនិយមនិន្នាកាស្តាំរបស់អតីតនាយករដ្ឋមន្ត្រី Silvio Berlusconi ដែលគេប្រមើលមើលថា អាចទទួលសំលេង៣០ភាគរយ។
បន្ទាប់ពីនោះ គណបក្សចលនាផ្កាយប្រាំ ដែលដឹកនាំដោយសិល្បករ Beppe Grillo ប្រហែលជាទទួលបាន ១៧ ភាគរយ។ ចំណែកគណបក្សកណ្តាលនិយមរបស់នាយករដ្ឋមន្ត្រីផុតអណត្តិ គឺលោក Mario Monti ត្រូវគេរំពឹងថាទទួលបានសំលេងតែជាង ១៣ភាគរយ ប៉ុណ្ណោះ។
អ្វីដែលគេកំពុងតែចោទជាសំណួរនៅពេលនេះ គឺថាតើរដ្ឋាភិបាលថ្មីរបស់អ៊ីតាលី អាចមានសមត្ថភាពគ្រប់គ្រាន់ ដើម្បីដោះស្រាយវិបត្តថវិកាក្នុងប្រទេសបានរឺក៏យ៉ាងណា។ យើងឃើញហើយថា នាយករដ្ឋមន្ត្រីដែលផុតអណត្តិ គឺលោក Mario Monti ដែលបានចូលកាន់តំណែងជំនួសលោក Silvio Berlusconi ទទួលបានសំលេងតិចតួចណាស់ បើប្រៀបទៅនឹងគណបក្សឆ្វេងនិយម។ ជាពិសេសទៅទៀតនោះ លោក Silvio Berlusconi ដែលបានចុះពីតំណែង ដោយសារតែប្រឈមមុខនឹងរឿងអាស្រូវ ព្រមទាំងវិបត្តថវិកានោះ បានលេចមុខជាថ្មី នៅក្នុងឆាកនយោបាយ ដោយបានឃោសនាថា នឹងកាត់បន្ថយការយកពន្ធក្នុងស្រុក។ ហើយយោងតាមការស្ទាបស្ទង់មតិ គណបក្សរបស់លោកបានទទួលសម្លេងខ្ពស់ទៀតផង។
ដោយឡែក គណបក្សប្រជាធិបតេយ្យឆ្វេងនិយម របស់លោក Bersani ដែលកំពុងលេចមុខធ្លោ នៅពេលនេះ ប្រហែលជាពិបាកនឹងដណ្តើមអសនៈនៅព្រឹទ្ធសភា ដោយសារតែត្រូវពឹងផ្អែកលើសមាសភាពចំរុះនយោបាយ នៅតាមតំបន់បោះឆ្នោតនិមួយៗ។ អ្នកវិភាគនានារំពឹងថា អនាគតរដ្ឋាភិបាលថ្មីរបស់អ៊ីតាលី គឺជារដ្ឋាភិបាលចំរុះ ដែលមានវត្តមានគណបក្សឆ្វេងនិយម និងអ្នកគាំទ្រនានាមកពីគណបក្សរបស់នាយករដ្ឋមន្ត្រីផុតអណត្តិ។
ទោះយ៉ាងណា លទ្ធផលផ្លូវការនៃការបោះឆ្នោត នឹងត្រូវបានដឹងច្បាស់នៅយប់ថ្ងៃចន្ទ រឺព្រឹកថ្ងៃអង្គារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ