ការបោះឆ្នោត ដែលបានហែហមដោយការចាប់ខ្លួនពួកប្រឆាំងរាប់រយនាក់
ចាប់ខ្លួននេះ មកពីគេធ្វើមីទ្ទិញចោទអាជ្ញាធរថា ក្លែងបន្លំសន្លឹកឆ្នោត។ ប៉ុន្តែតាមអាជ្ញាធរមីទ្ទិញនោះធ្វើឡើងដោយគ្មានសេចក្តីអនុញ្ញាត នាំឲ្យខូចសណ្តាប់ធ្នាប់សង្គម។ ទោះយ៉ាងណាក្តី ស្របនឹងលទ្ធផលផ្លូវការបណ្តោះអាសន្ន ប្រកាសព្រឹកមិញ ដោយគ.ជ.ប. ក្នុងការបោះឆ្នោតរើសសភាឌូម៉ានីតិកាលថ្មី ដែលបានប្រព្រឹត្តទៅម្សិលមិញ គឺបក្សកាន់អំណាច ឈ្មោះ ”ប្រទេសរុស្ស៊ីរួមធ្លុងមួយ” ដែលបន្តស្ថិតនៅជា ”កម្លាំងនយោបាយនាំមុខនៅរុស្ស៊ី” -នេះបើតាមការថ្លែងនៃលោកប្រធានាធិបតីមេដវេដេវ ក្រោយពីឮលទ្ធផលនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
លទ្ធផលដែលមាន គឺថា ពីក្នុងចំណោមអាសនៈ ៤៥០ នៃសភាឌូម៉ា ធ្លាក់ទៅលើបក្សកាន់អំណាច”ប្រទេសរុស្ស៊ីរួមធ្លុងមួយ” គឺអាសនៈចំនួន២៣៨ ឬ លើសពី៥០% បានន័យថា ដណ្តើមបានភាគច្រើនដាច់ខាត សម្រាប់សភាដំណើរការ ថ្វីដ្បិតតែតិចជាងភាគច្រើនធម្មនុញ្ញ ដែលបក្សនេះធ្លាប់មានក្នុងសភាឌូម៉ានីតិកាលមុន ដល់ទៅ៣១៥អាសនៈឬ ជាង២/៣ឯណោះ សម្រាប់អនុម័តវិសោធនកម្ម ទៅលើរដ្ឋធម្មនុញ្ញ ដោយម្ចាស់ការខ្លួនឯង។
ប៉ុន្តែ ចាប់ពីអំណើះតទៅ ក្នុងករណីខ្លះ តាមប្រសាសន៍លោកប្រមុខរដ្ឋមេដវេដេវ បក្សនេះមុខជាត្រូវបង្ខំចិត្តចងសម្ព័ន្ធ ជាមួយបក្សផ្សេងក្នុងសភាឌូម៉ា ហេតុដែលរឹតតែឆ្លុះឲ្យឃើញពីលក្ខណៈប្រជាធិបតេយ្យមែនពិត នៃប្រព័ន្ធអំណាចនីតិបញ្ញត្តិនៅរុស្ស៊ី។
អ្វីដែលទាក់ទាញភ្នែកពួកអ្នកកាសែត គឺពេលដែលការបោះឆ្នោតប្រព្រឹត្តទៅប៉ូលិសក្រោមលេសប្លែកៗ បានវាតប្រតិបត្តិការចាប់ពួកបាតុករនៃបក្សប្រឆាំងនានា ចាប់ទាំងក្របួច-កពួកគេ ហើយអូសចូលឡានទ្រុងតែម្តង រាល់អ្នកណាដែលឈរជាអង្គមីទ្ទិញ ស្រែកបន្លឺឡើងស្រុះៗគ្នា នូវពាក្យស្លោកថា “បរាជ័យការបោះឆ្នោតក្លែងក្លាយ“ “ការបោះឆ្នោតរបស់ពួកអ្នកជាការក្លែងបន្លំ” “បរាជ័យពួកប៉ូលិសហ្វាស្ស៊ីស្ត”។ គិតជាសរុប នៅរដ្ឋធានីម៉ូស្គូ នៅក្រុង Saint-Petersbourg និងនៅក្រុងទី៣ ក្រុង Nijny Novgorod មានឃាត់ខ្លួនសរុបទៅ៣៥០នាក់។
ពួកគេតំណាងឲ្យបក្សប្រឆាំងក្រោមឈ្មោះ បែបយ៉ាង “ប្រទេសរុស្ស៊ីត្រូវមានមុខមាត់ផ្សេង” “រណសិរ្សឆ្វេង” “បុព្វហេតុដែលត្រូវ”។ល។ ពីក្នុងចំនួននោះ នៅម៉ូស្គូ បាតុករ២៥៨នាក់ក្រោយពីជាប់ឃុំអស់មួយយប់នៅបុស្តិ៍ប៉ូលិស ហើយត្រូវអាជ្ញាធរកត់កំណត់ហេតុមកព្រឹកថ្ងៃចន្ទនេះ ក៏បានត្រូវព្រលែងចេញមកវិញ។ លើកលែងតែមេដឹកនាំចលនា “រណសិរ្សឆ្វេង” លោក Serguei Oudalsov ដែលត្រូវឃាត់ខ្លួន៥ថ្ងៃទៀត។
និយាយអំពីការក្លែងបន្លំសន្លឹកឆ្នោតវិញ តាមការកត់ត្រាឃើញនៃសមាគមឈ្មោះ ”សំឡេង” ខាងតាមដានឃ្លាំមើលភាពសុចរិតនៃការបោះឆ្នោត គឺមានប្រព្រឹត្តទៅការលួចបោះសន្លឹកឆ្នោត យ៉ាងច្រើនសន្ធឹកសន្ធាប់ ទៅក្នុងហិបឆ្នោតជាមុនស្រេច។ ទោះបី ពេញមួយថ្ងៃម្សិលមិញ មានដល់ទៅជាង១.៧០០ដង ការជូនដំណឹងស្តីអំពីភាពមិនប្រក្រតីនៃការបោះឆ្នោតក្តី ក៏គ.ជ.ប. យោងទៅលើមតិពួកអ្នកសង្កេតការណ៍បរទេស អះអាងថា ការបោះឆ្នោតរើសសភាឌូម៉ា នីតិកាលទី៦ នៅរុស្ស៊ី បានប្រព្រឹត្តទៅស្របនឹងស្តង់ដារអន្តរជាតិកម្រិតខ្ពស់ទេតើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ