សហភាពអឺរ៉ូប និងអាហ្វ្រិកសាកល្បងផ្តល់សន្ទុះថ្មីឱ្យដល់ភាពជាដៃគូសេដ្ឋកិច្ច
ក្រុមអ្នកដឹកនាំអឺរ៉ូបនិងអាហ្វ្រិកបានរួមប្រជុំគ្នាពីរថ្ងៃគឺ នៅថ្ងៃចន្ទម្សិលមិញនិងថ្ងៃអង្គារ៣០វិច្ឆិកានេះជាថ្ងៃបង្ហើយ នៅទីក្រុងTripoli ដើម្បីសាកល្បងផ្តល់សន្ទុះថ្មីឱ្យដល់ភាពជាដៃគូសេដ្ឋកិច្ចរវាង ទ្វីបទាំងពីរ នៅក្នុងបរិយាកាសដក់ជាប់ដោយរឿងវិវាទស្តីពីបញ្ហាដូចយ៉ាង អន្តោប្រវេសន៍ ពាណិជ្ជកម្មឬអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
ជាភ្ញៀវនៃជំនួបកំពូល លោកប្រធានាធិបតីលីប៊ី Mouammar Kadhafi បានយល់ឃើញថា ការបង្កើតភាពជាដៃគូរវាងទ្វីបទាំងពីរបានទទួលបរាជ័យ។អនុសញ្ញាមួយចំនួនចុះនៅឆ្នាំ២០០៧ នៅជំនួបកំពូលLisbonne គ្មានប្រសិទ្ធិភាពទេ។លោកkadhafiបានព្រមានប្រាប់ថា អាហ្វ្រិកប្រហែលអាចនឹងបែរទៅរកមហាអំណាចដទៃទៀតដូចយ៉ាង អាមេរិកឡាទីន ចិនឬឥណ្ឌា។ ”យើងចង់បានភាពជាដៃគូស្មើភាពគ្នាឈរនៅលើមូលដ្ឋាន មានផលប្រយោជន៍ទៅវិញទៅមក ពុំមែននៅលើការកេងប្រវ័ញ្ចគ្នានោះទេ”។
ប្រកបដោយសុទិដ្ឋិនិយមជាង លោកប្រធានសហភាពអឺរ៉ូប Herman Van Rompuyបានយល់ឃើញថា ជំនួបកំពូលនៅTripoliដែលចប់នៅថ្ងៃអង្គារ៣០វិច្ឆិកានេះគឺ”ជាសញ្ញាដ៏ខ្លាំងមួយ”។ ”សហភាពអឺរ៉ូបនិងអាហ្វ្រិកត្រូវតែធ្វើសហការគ្នានិងឆ្លៀតឱកាសល្អផ្តល់ឱ្យដោយសក្តានុពលដ៏ធំធេងផ្សំបញ្ចូលគ្នារបស់យើង”។
លោកប្រធានគណៈកម្មការនៃសហភាពអាហ្វ្រិក Jean Ping បានអំពាវនាវឱ្យ”លើកជាស្ថាពរការបិទខ្ទប់ដូចយ៉ាងកិច្ចព្រមព្រៀងនៃភាពជាដៃគូសេដ្ឋកិច្ច” ដែលត្រូវជំនួសរបបពាណិជ្ជកម្មអនុគ្រោះដែលអឺរ៉ូបផ្តល់ឱ្យអតីតដែនដីអាណានិគមរបស់ខ្លួន ជារបបត្រូវអង្គការពាណិជ្ជកម្មពិភពលោក(OMC) ចាត់ទុកថាមិនចុះសម្រុងនឹងក្បួនខ្នាតអន្តរជាតិ។
ព្រួយបារម្ភចំពោះកសិកម្មនិងឩស្សាហកម្មរបស់ខ្លួន អាហ្វ្រិកខ្លាចបារម្ភតែឃើញរលាយបាត់ទៅប្រាក់ចំណូលមួយភាគធំនៃថវិការបស់ខ្លួនបានមកពីពន្ធអាករលើទំនិញនាំចូលមកពីអឺរ៉ូប។
បណ្តាប្រទេសអាហ្វ្រិកបានច្រានចោលសេចក្តីថ្លែងការណ៍រួមជាមួយសហភាពអឺរ៉ូបស្តីពីការប្រែប្រួលនៃអាកាសធាតុ ដោយយល់ឃើញថា វាជាអាទិភាពសំរាប់តែទ្វីបអឺរ៉ូប។
អ្នកដឹកនាំបារាំង អាល្លឺម៉ង់និងអង់គ្លេសពុំបានមានមុខទេ នៅជំនួបកំពូលពីរថ្ងៃនេះនៅTripoliនៃប្រទេសLibye។
៦ប្រធានបទសំខាន់ៗនៃជំនួបកំពូលនេះគឺសមាហរ័ណកម្មក្នុងតំបន់ ថាមពលនិងការប្រែប្រួលនៃអាកាសធាតុ កសិកម្ម សន្តិភាព និងសន្តិសុខ អភិបាលកិច្ចនិងសិទ្ធិមនុស្ស អន្តោប្រវេសន៍និងការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ