លោកឌុយទែរតេចេញបញ្ជាអោយកងទ័ពហ្វីលីពីនចូលកាន់កាប់កោះជម្លោះនៅសមុទ្រចិន
ប្រធានាធិបតីហ្វីលីពីន ឌុយទែរតេ បានបញ្ឆេះកំហឹងរបស់ចិន នៅថ្ងៃព្រហស្បតិ៍នេះ ដោយបានប្រកាសបញ្ជាអោយកងទ័ពចូលទៅកាន់កាប់ដែនកោះជម្លោះនៅសមុទ្រចិនខាងត្បូង។ លោកឌុយទែរតេថែមទាំងប្រាប់អោយកងទ័ពសង់ហេដ្ឋារចនាសម្ព័ន្ធ និងដោតទង់ជាតិហ្វីលីពីននៅទីនោះទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ថ្ងៃព្រហស្បតិ៍នេះ ក្នុងពេលទស្សនកិច្ចមូលដ្ឋានយោធាកោះប៉ាឡាវ៉ាន់ ភាគខាងលិចហ្វីលីពីន ប្រធានាធិបតីឌុយទែរតេ បានថ្លែងប្រាប់ក្រុមអ្នកសារព័ត៌មានថា លោកបានចេញបញ្ជាអោយកងទ័ព ចូលទៅសាងសង់ហេដ្ឋារចនាសម្ព័ន្ធ នៅលើកោះមួយចំនួន នៃប្រជុំកោះជម្លោះSpratleys នៅសមុទ្រចិន។ លោកឌុយទែរតេប្រាប់ទៀតថា ហ្វីលីពីនទាមទារកោះពី៩ទៅ១០ នៃប្រជុំកោះSpratleys ជាដែនបូរណភាពជាតិ។
សម្រាប់លោកឌុយទែរតេ គ្រប់គ្នាទៅកោះទាំងនោះ គឺហាក់ដូចចង់រកប្រយោជន៍នៅតាមកោះទាំងនោះ។ លោកឌុយទែរតេប្រាប់ថា ហ្វីលីពីននឹងធ្វើអោយប្រសើរជាងគ្រប់គ្នា គឺហ្វីលីពីនចូលទៅរស់នៅតាមកោះទំនេរអស់នោះតែម្តង។ គួរបញ្ជាក់ថា ក្រៅពីហ្វីលីពីន នៅសមុទ្រចិនខាងត្បូង ចិនមានជម្លោះដែនទឹកជាមួយប្រទេសជាច្រើនទៀត ដូចជាព្រុយណេ ម៉ាឡេស៊ី វៀតណាម រឺក៏កោះតៃវ៉ាន់។
ប៉ុន្មានឆ្នាំនេះ ចិនប្រើនយោបាយវាតទីដែនកោះតូចៗ នៅសមុទ្រចិន ដោយបានសាងសង់ហេដ្ឋារចនាសម្ព័ន្ធនៅទីនោះ។ ឆ្នាំ២០១៦ តុលាការក្រុងឡាអេបានកាត់ក្តីអោយហ្វីលីពីនឈ្នះចិន ចំពោះរឿងដែលចិនចង់គ្រប់គ្រងសមុទ្រចិនតែម្នាក់ឯង។
លោកឌុយទែរតេ កន្លងមក មិនដែលខ្វល់ពីជម្លោះដែនទឹកជាមួយចិនទេ ហើយបានបង្ហាញជំហរខិតទៅរកចិនទៀតផង ដើម្បីទាញចំណេញប្រយោជន៍សេដ្ឋកិច្ច។ តែពេលនេះ លោកឌុយទែរតេប្តូរជំហរទៅវិញ ដោយបញ្ជាអោយកងទ័ពហ្វីលីពីនចូលកាន់កាប់ដែនកោះជម្លោះនៅសមុទ្រចិន។ លោកឌុយទែរតេ ប្រហែលចង់ផ្ញើសារអោយលោកដូណាល់ ត្រាំ ដែលកំពុងរៀបចំទទួលប្រធានាធិបតីចិន នៅរដ្ឋផ្លរីដា ថ្ងៃព្រហស្បតី៍នេះ។ លោកឌុយទែរតេ ប្រហែលចង់អោយលោកត្រាំ ជជែកពីបញ្ហាជម្លោះសមុទ្រចិន ជាមួយលោកស៊ី ជីនពីង រឺក៏អាចថា លោកឌុយទែរតេកំពុងចង់យកចិត្តយកថ្លើមលោកដូណាល់ ត្រាំ ដែលធ្លាប់រិះគន់ចិនក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ