សភាឌូម៉ារបស់រុស្ស៊ីបោះឆ្នោតជុំទីមួយលើសន្ធិសញ្ញាSTARTថ្មី
បើទោះបីជាមានការរារែក និងមិនយល់ស្របលើចំណុចខ្លះក្នុងសន្ធិសញ្ញា STARTថ្មីដែលទើបផ្តល់សច្ចាប័នដោយសភាអាមេរិកាំង សភាឌូម៉ារបស់រុស្ស៊ីបានសម្រេច នៅថ្ងៃសុក្រម្សិលមិញ ផ្តល់ចម្លើយជាវិជ្ជមានដល់សន្ធិសញ្ញា STARTថ្មីដែលប្រមុខដឹកនាំរុស្ស៊ី និងអាមេរិកបានចុះហត្ថលេខា កាលពីខែមេសា ក្នុងសាធារណរដ្ឋឆែក។ អ្នកតំណាងរាស្រ្តបានធ្វើការបោះឆ្នោតគាំទ្រ ជារួម។ ចំណែកការផ្តល់សច្ចាប័នលើសន្ធិសញ្ញានឹងអាចធ្វើឡើង នៅពាក់កណ្តាលខែមករា ២០១១ នៅក្រោយពេលសមាជិកសភាត្រលប់ពី វិស្សមកាលវិញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
សភាឌូម៉ាបានបោះឆ្នោតទទួលសា្គល់ខ្លឹមសាររួមរបស់សន្ធិសញ្ញា STARTថ្មីដែលសំដៅកាត់បន្ថយអាវុធនុយក្លេអ៊ែរ ក្នុងប្រទេសរុស្ស៊ី និងអាមេរិក។ ប៉ុន្តែ នៅថ្ងៃសុក្រម្សិលមិញនេះ អ្នកច្បាប់រុស្ស៊ីបានត្រឹមអានអត្ថបទលើកទីមួយប៉ុណ្ណោះ។ គេត្រូវការអាន និងកែសម្រួលខ្លឹមសារអត្ថបទ សន្ធិសញ្ញា STARTថ្មី បីដង មុននឹងឈានទៅដល់ការផ្តល់សច្ចាប័នទាំងស្រុងលើសន្ធិសញ្ញា។
បើតាមការបញ្ជាក់របស់រដ្ឋមន្រ្តីការបរទេសរុស្ស៊ី លោក Sergei Lavrov រុស្ស៊ីត្រូវធ្វើការពិនិត្យដោយល្អិតល្អន់ទៅលើសន្ធិសញ្ញា STARTថ្មីដែលធ្វើដោយភាគីអាមេរិក។ ជាក់ស្តែង រុស្ស៊ីបានបង្ហាញរួចទៅហើយ នូវការមិនយល់ស្របរបស់ខ្លួន ជាមួយនឹងចំណុចវិសោធនកម្មមួយចំនួនដែលភាគីអាមេរិកបានធ្វើឡើង នៅក្នុងសន្ធិសញ្ញា STARTថ្មី។
ឃ្លាមួយដែលចែងនៅក្នុងសន្ធិសញ្ញាធ្វើដោយភាគីអាមេរិកបានសរសេរថា សន្ធិសញ្ញានឹងមិនកំរិតនូវលទ្ធភាពនៃការបាញ់សាកល្បង ការអភិវឌ្ឍន៍ និងការពង្រាយខែលមីស្ស៊ីល ដែលគ្មានគ្រាប់នុយក្លេអ៊ែរ ដែលអាមេរិកធ្លាប់មាន និងត្រូវផលិតក្នុងពេលអនាគត។
លោក Lavrov បាននិយាយថា រុស្ស៊ីមិនអាចទទួលយកបានទេ ដែលអាមេរិកមិនព្រមបញ្ចូលប្រភេទអាវុធទំនើប ជាពិសេសខែលប្រឆាំងមីស្ស៊ីល ចូលទៅក្នុងសន្ធិសញ្ញាកាត់បន្ថយអាវុធនុយក្លេអ៊ែរ។ ដូច្នេះ រុស្ស៊ីបានបង្ហាញជំហរថា ខ្លួននឹងសរសេរអត្ថបទមួយសម្រាប់ជំទាស់នឹងខ្លឹមសាររបស់សន្ធិសញ្ញាដែលធ្វើឡើងដោយអាមេរិក។
គួររំលឹកថា រុស្ស៊ីធ្លាប់បានតវ៉ាទៅទីក្រុងវ៉ាស៊ីនតោន ឲ្យឈប់ដំឡើងខែលប្រឆាំងមីស្ស៊ីល ក្នុងទឹកដីអឺរ៉ុប ដូចជាក្នុងប្រទេសប៉ូឡូញ។ ទីក្រុងម៉ូស្គូដែលបារម្ភថាខែលមីស្ស៊ីលទាំងនោះអាចគំរាមកំហែងសន្តិសុខរបស់រុស្ស៊ី បានស្នើសុំឲ្យអាមេរិកចុះឈ្មោះខែលមីស្ស៊ីល និងអាវុធបាញ់បានចម្ងាយឆ្ងាយផ្សេងទៀត ទៅក្នុងបញ្ជីអាវុធដែលត្រូវកាត់បន្ថយ នៅក្នុងសន្ធិសញ្ញា STARTថ្មី។ សំណើនេះធ្លាប់បានអាមេរិកច្រានចោលដោយបង្ហាញហេតុផលថា អាវុធទាំងនោះនឹងមិនអាចចងភ្ជាប់ទៅនឹងសន្ធិសញ្ញាបាន ដោយសារវាមិនមានបំពាក់ជាមួយនឹងអាវុធនុយក្លេអ៊ែរ។ សន្ធិសញ្ញាSTARTថ្មីផ្តោតសំខាន់តែទៅលើការកាត់បន្ថយគ្រឿងសព្វាវុធដែលមានគ្រាប់នុយក្លេអ៊ែរតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ