ចូលមកដល់សប្តាហ៍ទីបីនៃការធ្វើសក្ខីកម្មរបស់ឌុចក្នុងនាមជាសាក្សីក្នុងសំណុំរឿងលេខ០០២ លោកកាំង ហ្គេចអ៊ាវ ហៅឌុចអតីតប្រធានគុគទួលស្លែងឬហៅថាមន្ទីរស២១ បានអះអាងថា លោកនួនជា មិនត្រឹមតែមានតួនាទីជាប្រធានរដ្ឋសភានិងជាអនុលេខាបក្សនៃរបបកម្ពុជាប្រជាធិបតេយ្យដែលទទួលបន្ទុកខាងសង្គមកិច្ច វប្បធម៌ ឃោសនានិងសិក្សាធិការប៉ុណ្ណោះទេ ប៉ុន្តែលោកនួនជាក៏មានតួនាទីនិងមុខងារថ្មីមួយទៀតខាងផ្នែកសន្តិសុខផងដែរ។ ការអះអាងរបស់ឌុចនៅក្នុងសប្តាហ៍នេះ ត្រូវបានបដិសេធចោលទាំងស្រុងដោយសហមេធាវីការពារក្តីលោកនួនជា។
