ព្យុងយ៉ាងបើកសម័យប្រជុំសភាទន្ទឹមនឹងការបង្ហោះផ្កាយរណប
សភាកូរ៉េខាងជើងប្រកាសបើកសម័យប្រជុំប្រចាំឆ្នាំរបស់ខ្លួន នៅថ្ងៃទី ១៣ មេសា ឆ្នាំ២០១២។ គិតចាប់តាំងពី លោក គីម ជុងអ៊ុន ក្លាយជាប្រមុខដឹកនាំរដ្ឋមក នៅខែធ្នូឆ្នាំ២០១១មកនេះជា លើកទីមួយហើយដែល សភាប្រជាជនកូរ៉េខាងជើង បើកសម័យប្រជុំពេញអង្គរបស់ខ្លួន ទន្ទឹមពេលគ្នានឹងកាលបរិច្ឆេទបាញ់បង្ហោះផ្កាយរណប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
នាឱកាស សម័យប្រជុំសភាប្រចាំឆ្នាំ លោក គីម ជុងអ៊ុន ប្រមុខដឹកនាំថ្មី វ័យក្មេងរបស់កូរ៉េខាងជើង នឹងត្រូវប្រកាសតែងតាំងជាផ្លូវការ ជាអគ្គមគ្គុទ្ទេសក៍ ដ៏មហិមានៃរបបកុម្មុយនិស្តព្យុងយ៉ាង។ នេះបើតាមទីភ្នាក់ងារព័ត៌មានផ្លូវការកូរ៉េខាងជើងនៅថ្ងៃសៅរ៍នេះ។ រហូតមកទល់ពេលនេះ លោក គីម ជុងអ៊ុន ត្រូវបានតែងតាំងជាអនុប្រធានគណៈកម្មការការពារជាតិ ដែលជាស្នូលនៃអំណាចរបស់កូរ៉េខាងជើង។ អ្នកវិភាគ និងអ្នកសង្កេតការណ៍នយោបាយកូរ៉េខាងជើង រំពឹងថាលោក គីម ជុងអ៊ុន នៅអាយុ៣០ឆ្នាំ នឹងទទួលបានតួនាទីទាំងអស់ដែលលោក គីម ជុងអ៊ីល ជាឪពុកធ្លាប់កាន់កាប់កាលនៅរស់ ពោលគឺជាប្រមុខដឹកនាំយោធា និងជាប្រមុខដឹកនាំបក្សពលករតែមួយគត់របស់កូរ៉េកុម្មុយនិស្ត។
ប៉ុន្តែ អ្វីជាការកត់សម្គាល់ខ្លាំង គឺសម័យប្រជុំពេញអង្គសភាប្រជាជនកូរ៉េខាងជើងនេះ នឹងប្រព្រឹត្តទៅចំថ្ងៃដែលរបបក្រុងព្យុងយ៉ាងគ្រោងបាញ់បង្ហោះផ្កាយរណប ដើម្បីអបអរ និងឧទ្ទិសដល់ថ្ងៃខួបកំណើត១០០ឆ្នាំ លោក គីម អ៊ីលស៊ុង អ្នកបង្កើតរបបកុម្មុយនិស្តកូរ៉េខាងជើង និងត្រូវជាជីតារបស់លោកគីម ជុងអ៊ុន ប្រមុខដឹកនាំប្រទេសបច្ចុប្បន្ន។
គម្រោងបង្ហោះផ្កាយរណប របស់កូរ៉េខាងជើង ពីថ្ងៃទី១២ដល់ថ្ងៃទី១៦មេសា ដែលរៀបចំស្រេចបាច់រង់ចាំតែដល់ថ្ងៃបាញ់នេះ ត្រូវបានសហរដ្ឋអាមេរិក និងសម្ព័ន្ធមិត្ត មានជាអាទិ៍កូរ៉េខាងត្បូង ចាត់ទុកថាជាលេសបិទបាំងមហិច្ឆតាចង់សាកល្បងបាញ់ពាំក្បាលនុយក្លេអ៊ែរ ឬមីស្ស៊ីលអន្តរទ្វីប។ សូម្បីតែប្រទេសចិន សម្ព័ន្ធមិត្តតែមួយគត់របស់ព្យុងយ៉ាង ក៏បានសម្តែងការព្រួយបារម្ភដែរ។ ចិនបានបង្ខំឱ្យមិត្តជិតខាងនេះស្ងប់អារម្មណ៍ បញ្ចៀសរាល់ទង្វើបង្កហេតុ។
ម្យ៉ាងវិញទៀត គម្រោងបង្ហោះផ្កាយរណបនេះ នឹងក្លាយជាប្រធានបទពិភាក្សាដ៏ចម្បងនិងទូលំទូលាយមួយ តែក្រៅផ្លូវការ នាឱកាសជំនួបកំពូលស្តីពីនុយក្លេអ៊ែរ ដើមសប្តាហ៍ក្រោយនេះ នាទីក្រុងសេអ៊ូល ដោយមានប្រធានាធិបតីអាមេរិក បារ៉ាក់ អូបាម៉ា និងអគ្គលេខាធិការអង្គការសហប្រជាជាតិ លោក បាន គីមូន ចូលរួមផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ