កប៉ាល់ចិនដេញប្រមាញ់កប៉ាល់ហ្វីលីពីន នៅសមុទ្រចិនខាងត្បូង
ការប្រឈមមុខដាក់គ្នា រវាងចិន និងហ្វីលីពីនបានកើតមានជាថ្មី កាលពីថ្ងៃសៅរ៍ បន្ទាប់ពីកប៉ាល់ល្បាតរបស់ចិន បានព្យាយាមរារាំង មិនឲ្យកប៉ាល់ដឹកស្បៀងរបស់ហ្វីលីពីន បើកចូលទៅកាន់តំបន់ថ្ម ប៉ប្រះទឹក ដែលមានបោះទីតាំងដោយកប៉ាល់យោធា ប្រចាំការរបស់ហ្វីលីពីន។ ក្រសួងការបរទេសហ្វីលីពីនបានថ្កោលទោសសកម្មភាពព្យាបាទអាយុជីវិតរបស់ឆ្មាំល្បាត ចិន ទៅលើទាហានហ្វីលីពីន និងបានទាមទារឲ្យចិនបញ្ឈប់សកម្មភាពគំរាមកំហែងដល់សន្តិសុខហ្វីលីពីន។
ចុះផ្សាយនៅថ្ងៃ៖
ស្តាប់ - ០២:២៥
នៅថ្ងៃសៅរ៍ កប៉ាល់ល្បាតចិនបួនគ្រឿងដែលប្រចាំការនៅសមុទ្រចិនខាងត្បូង (នៅម្តុំប្រជុំកោះSpratlys) បានបើកទៅពង្រាយគ្នា ឡោមព័ទ្ធតំបន់ថ្មប៉ប្រះទឹក ឈ្មោះ Second Thomas ដើម្បីរារាំង កុំឲ្យកប៉ាល់ហ្វីលីពីនបើកចូល ដឹកស្បៀង យកទៅឲ្យទាហានដែលប្រចាំការ នៅលើនាវាហ្វីលីពីន ដែលរដ្ឋាភិបាលហ្វីលីពីនបានប្រើប្រាស់ជាទីតាំង សំគាល់តំបន់ទឹករបស់ហ្វីលីពីន។
យោងតាមប្រព័ន្ធផ្សព្វផ្សាយក្នុងស្រុកហ្វីលីពីន នៅក្នុងពេលប្រឈមមុខដាក់គ្នា កប៉ាល់ល្បាតចិនប្រដេញយ៉ាងប្រកិត កប៉ាល់ហ្វីលីពីន និងបានប្រើម៉ាស៊ីនបំពងសំឡេង ស្រែកបញ្ជាឲ្យកប៉ាល់ដឹកស្បៀងហ្វីលីពីនចាកចេញពីតំបន់ទឹករបស់ចិន។ តាមអ្នកនាំពាក្យរបស់ទីបញ្ជាការយោធាហ្វីលីពីន នៅក្រោយការប្រដេញ គ្នាអស់រយៈពេល២ម៉ោង កប៉ាល់ដឹកស្បៀងហ្វីលីពីនបានសម្រេចជោគជ័យ បើកចូលទៅកាន់ នាវាប្រចាំការរបស់ខ្លួន។ កប៉ាល់ហ្វីលីពីនបានសម្រេចក្នុងការផ្គត់ផ្គង់ស្បៀង និងផ្លាស់ប្តូរទ័ពប្រចាំការរបស់ខ្លួននៅតំបន់ Second Thomas។
តំបន់ Second Thomasស្ថិតនៅក្នុងប្រជុំកោះ Spratlys ដែលស្ថិតនៅប្រមាណ ២០០គីឡូម៉ែត្រពីដីគោក ហ្វីលីពីន។ ចិនដែលទាមទារធ្វើជាម្ចាស់គ្រប់គ្រងតំបន់ទឹក ទាំងមូល នៅសមុទ្រចិនខាងត្បូង បានចាត់ទុក វត្តមាននាវាប្រចាំការរបស់ហ្វីលីពីន នៅ Second Thomasថា ជារឿងខុសច្បាប់។
នៅឆ្នាំ ១៩៩៩ ពោលគឺ នៅ៤ឆ្នាំក្រោយចិនបានចូលទៅសាងសង់រចនាសម្ព័ន្ធធំដំ មួយ នៅប្រជុំកោះ Spratlys ដែលស្ថិតនៅមិនឆ្ងាយពីតំបន់ថ្មប៉ប្រះទឹក Second Thomas រដ្ឋាភិបាលហ្វីលីពីនបានប្រើនាវាចាស់មួយគ្រឿង ធ្វើជាទីតំាង សំគាល់តំបន់ទឹករបស់ខ្លួន នៅSecond Thomas ដែលហ្វីលីពីនចាត់ទុកចូលជាដែនបូរណភាពទឹកដីហ្វីលីពីន។
រហូតមកដល់ខែកុម្ភៈមុន ចិនមិនដែលហាមឃាត់ការផ្គត់ផ្គង់ស្បៀងដល់នាវាហ្វីលីពីននៅ Second Thomasទេ។ ប៉ុន្តែ ចាប់តាំងពីដើមខែមីនានេះ នៅថ្ងៃទី ៩មីនាកន្លងទៅ ចិនបានហាមមិនឲ្យហ្វីលីពីនដឹកស្បៀងទៅក្នុងតំបន់ Second Thomas រហូតធ្វើឲ្យកងទ័ពហ្វីលីពីនត្រូវបង្ខំចិត្តផ្គត់ផ្គង់ស្បៀងដល់ទាហានប្រចាំលើនាវា តាមរយៈឧទ្ធម្ភាគចក្រ។
ឧប្បត្តិហេតុ ប្រឈមមុខដាក់គ្នា រវាងចិន និងហ្វីលីពីន កាលពីថ្ងៃសៅរ៍ កើតមាននៅមួយថ្ងៃមុនដែលហ្វីលីពីនត្រូវដាក់ពាក្យបណ្តឹងចិន ទៅតុលាការអន្តរជាតិ នៅក្នុងជម្លោះដណ្តើមដែនទឹក នៅសមុទ្រចិនខាងត្បូង។ ទីក្រុងប៉េកាំងវិញ ធ្លាប់បានព្រមានទីក្រុងម៉ានីលហើយថា ទំនាក់ទំនងទ្វេរភាគីរវាងចិន និងហ្វីលីពីននឹងត្រូវខូចខាត ប្រសិនម៉ានីលប្តឹងចិន នៅអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ