វិបត្តិស៊ីរី ៖ ចិនព្រមព្រៀងជាមួយសម្ព័ន្ធអារ៉ាបលើផ្នែកជំនួយមនុស្សធម៌
២៥ថ្ងៃហើយដែលកងកម្លាំងរដ្ឋាភិបាលស៊ីរី បានទម្លាក់គ្រាប់លើក្រុងហូម។ ហូម និងប្រជាជនស៊ីវិល ពេលនេះដូចជាជាប់ក្នុងអន្ទាក់ កាត់ផ្តាច់ពីពិភពខាងក្រៅ ឡោមព័ទ្ធបន្ថែមដោយកម្លាំងប្រដាប់អាវុធ ដែលហាក់ដូចជាកំពុងសង្ខុញកាន់តែខ្លាំងឡើង ដើម្បីបង្ក្រាបមិនឱ្យកម្លាំងបះបោរងើបរួច។ ប៉ុន្តែជាលើកទីមួយ ក្រុងប៉េកាំងបានព្រមព្រៀងសហការជាមួយនឹងសម្ព័ន្ធអារ៉ាប និងពិភពអារ៉ាបក្នុងការបញ្ជូនជំនួយមនុស្សធម៌ទៅកាន់ស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ស្ថានភាពនៅក្រុងហូម និងក្រុងផ្សេងៗទៀតដែលមានការប្រយុទ្ធគ្នា ធ្លាក់ដុនដាបកាន់តែខ្លាំងឡើងៗ ចំនួនមនុស្សស្លាប់ និងរបួស មានជារៀងរាល់ថ្ងៃ គ្រឿងសម្ភារៈបរិក្ខារ ថ្នាំសង្កូវ និងស្បៀងអាហារ កាន់តែខ្សត់ទៅៗ។ កាកបាទក្រហមអន្តរជាតិ និងអឌ្ឍចន្ទក្រហមស៊ីរី កំពុងបន្តចរចាជាមួយយោធាសេរីស៊ីរី និងរដ្ឋាភិបាលលោក បាស្ហា អាល់អាសាទ ដើម្បីមានលទ្ធភាពចូលទៅផ្គត់ផ្គង់ជំនួយដល់ផ្ទាល់កន្លែងផង និងជម្លៀសអ្នករបួសផង។ អ្នកកាសែតស្រីបារាំងរបួសបាក់ជើងនៅតែជាប់កុនក្នុងក្រុងហូម ដដែលអស់មួយសប្តាហ៍មកហើយ។
ប៉ុន្តែអ្វីជាការកត់សម្គាល់នៅថ្ងៃនេះ បន្ទាប់ពីបានជួបពិភាក្សាតាមទូរស័ព្ទពីរថ្ងៃជាប់ៗគ្នា ជាមួយនឹងប្រមុខដឹកនាំសម្ព័ន្ធអារ៉ាប និងសមភាគីនៃបណ្តាប្រទេសអារ៉ាបមួយចំនួនទៀត នៅទីបំផុត ចិនដែលធ្លាប់តែប្រឆាំងរហូតមក បានយល់ព្រមឱ្យមានការបញ្ជូនជំនួយមនុស្សធម៌ទៅកាន់ស៊ីរី និងបានទាមទារឱ្យភាគីរដ្ឋាភិបាល និងបក្សប្រឆាំងបញ្ឈប់សកម្មភាពហិង្សាភ្លាម ដើម្បីអាចបើកទ្វារចរចានយោបាយបាន។ នេះបើតាមសារព័ត៌មានចិនថ្មី នៅថ្ងៃពុធនេះ ដែលមិនបានបញ្ជាក់លម្អិតអ្វីបន្ថែមទៀតទេ។
នៅឯទីក្រុងហ្សឺណែវ ក្រុមប្រឹក្សាសិទ្ធិមនុស្សអង្គការសហប្រជាជាតិ នឹងត្រូវចេញសេចក្តីសម្រេចចិត្តស្តីពីការបញ្ជូនបុគ្គលិកមនុស្សធម៌ទៅកាន់ស៊ីរី នៅថ្ងៃស្អែកនេះ។
លើផ្នែកការទូតវិញ សំណើរបស់ទុយនីស៊ី ទំនងអាចជាច្រកចេញមួយសំរាប់វិបត្តិនៅស៊ីរី។ ប្រទេសទុយនីស៊ីត្រៀមខ្លួនជាស្រេចនឹងផ្តល់ទឹកដីជ្រកកោននយោបាយដល់លោកប្រធានាធិបតីស៊ីរី បាស្ហា អាល់អាសាទ និងក្រុមគ្រួសារផង។ ចំណែកក្រុមប្រឹក្សាសន្តិសុខអង្គការសហប្រជាជាតិកំពុងតាក់តែងគម្រោងសេចក្តីសម្រេចចិត្តថ្មីឈានដល់ការឈប់បាញ់ដើម្បីមនុស្សធម៌។ ប្រមុខការទូតបារាំងអំពាវនាវឱ្យរុស្ស៊ី និងចិន កុំប្រើសិទ្ធិវេតូប្រឆាំង ដូចពីរលើកមុនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ