ប្រទេសចិនសន្យាជាថ្មីថានឹងឈប់កាត់យកសរីរាង្គរបស់អ្នកទោសអស់ជីវិត
ប្រទេសចិនឈប់យកសរីរាង្គរបស់អ្នកទោសដែលគេប្រហារជីវិតរួចហើយ។ រហូតមកទល់ពេលនេះ អាជ្ញាធរចិន បានសន្យាជាច្រើនលើកជាច្រើនសា ថានឹងឈប់អនុវត្តកាត់យកសរីរាង្គអ្នកទោសអស់ជីវិត ដែលជាសំណុំរឿងមួយដ៏ចម្រូងចម្រាស់ខ្លាំងនៅប្រទេសចិន។ កន្លងមក អង្គការការពារសិទ្ធិមនុស្សអន្តរជាតិ ក៏ធ្លាប់បានធ្វើការផ្តន្ទាទោសទៅលើការកាត់យកសរីរាង្គរបស់អ្នកទោសចិនផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ប្រទេសចិន នឹងបញ្ចប់ការកាត់យកសរីរាង្គអ្នកទោសអស់ជីវិត ចាប់ពីថ្ងៃទី១មករា២០១៥ទៅ។ ការកាត់យកសរីរាង្គរបស់អ្នកទោសអស់ជីវិតគឺ ដើម្បីយកទៅផ្គត់ផ្គង់មន្ទីរពេទ្យសម្រាប់ព្យាបាលការផ្សាំសរីរាង្គ នេះជាការអះអាងរបស់លោក ហួង ជីហ្វុយដែលជាប្រធានគណៈកម្មាធិការផ្នែកខាងជំនួយសរីរាង្គមនុស្ស។
លោក ហួង ជីហ្វុយ ថ្លែងបន្ថែមថា”ចាប់ពីអំណើះទៅ ការប្រមូលយកសរីរាង្គមនុស្សគឺធ្វើឡើងទៅតាមមធ្យោបាយតែមួយគត់ គឺការស្ម័គ្រចិត្របើទោះបីជាប្រទេសចិន នៅមានការខ្វះខាតខ្លាំងក្តីនៅលើបញ្ហានេះ។
ជាអនុរដ្ឋមន្ត្រីក្រសួងសុខាភិបាលចិន លោក ហួង ជីហ្វុយ បានប្រមើលទុកថា ក្នុងមួយឆាំ្នៗ ប្រជាជនចិន ចំនួន ៣០ម៉ឺននាក់ ត្រូវការផ្សាំសេរីរាង្គជាបន្ទាន់ ប៉ុន្តែមានជនចំនួន ១ម៉ឺននាក់ប៉ុណ្ណោះដែលត្រូវបានទទួលការផ្សាំសរីរាង្គ។ ក្នុងចំណោមប្រជាជនចិនចំនួន ១លាននាក់ អ្នកស្ម័គ្រចិត្តផ្តល់សរីរាង្គ មានចំនួនតែ ០ ,៦% បើប្រៀបទៅនឹងប្រទេសអេស្ប៉ាញដែលមានរហូតដល់ទៅ ៣២%។
តាំងពីមានការរៀបចំប្រព័ន្ធថ្មីផ្តល់សរីរាង្គដោយស្ម័គ្រចិត្ត នៅឆ្នាំ ២០១៤ តែមួយគត់ អាជ្ញាធរចិន បានទទួលអំណោយចំនួន១៥០០ ដែលជាចំនួនមួយដ៏ច្រើនបំផុត លើសចំនួនអំណោយសរុបសំរាប់រយៈពេល៤ឆ្នាំកន្លងមកដែរ។
គួររំលឹកថា ការវះកាត់ផ្សាំទៅលើអ្នកជម្ងឺនៅមន្ទីរពេទ្យ មួយភាគធំ ត្រូវបានសម្រេចឡើងដោយសាការកាត់យកសរីរាង្គរបស់អ្នកទោសអស់ជីវិត ឬក៏អ្នកទោសដែលស្លាប់រួច។ ក៏ប៉ុន្តែ ការអនុវត្តន៍នេះ ជាញឺកញយត្រូវបានធ្វើឡើងដោយគ្មានការយល់ព្រមពីក្រុមគ្រួសារទេ នេះបើយោងតាមការអះអាងរបស់ អង្គការការពារសិទ្ធមនុស្ស តែប្រទេសចិនបានបដិសេធថាជារឿងមិនពិត។
សូមបញ្ជាក់ថា ប្រជាជនចិនដែលមិនចង់ឲ្យសរីរាង្គរបស់ក្រុមគ្រួសារខ្លួនដល់អាជ្ញាធរ- ពីព្រោះម្យ៉ាងដោយគោរពទៅតាមប្រពៃណីនិងម្យ៉ាងទៀតគឺការមិនទុកចិត្តអាជ្ញាធរដោយសារតែមានការប្រព្រឹត្តអំពើពុករលួយខ្លាំង។
ប្រទេសចិន ជាប្រទេសមួយដែលបានសម្លាប់អ្នកទោសដ៏ច្រើនជាងគេបំផុតនៅលើលោក។ គ្រាន់តែឆ្នាំទៅមិញប៉ុណ្ណោះ អ្នកទោសដែលគេប្រហារជីវិតមានចំនួនដល់ ទៅ ២៤០០នាក់ នេះបើយោងតាមអង្គការក្រៅរដ្ឋាភិបាលមួយ ដែលមានទីស្នាក់ការនៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ