ប៉េកាំងពឹងលើនិស្សិតក្នុងធ្វើទំនើបកម្មវិស័យយោធា
កងទ័ពប្រជាមានិតចិន ដែលជាកងទ័ពដ៏ធំ និងច្រើនជាងគេបំផុតនៅលើពិភពលោក កំពុងតែប្រញឹកធ្វើទំនើបកម្ម។ ប្រតិបត្តិការ ចែចង់ប្រមូលយកនិស្សិតក្មេងៗឲ្យចូលធ្វើទាហាន មិនត្រឹមតែដើម្បីអភិវឌ្ឍវិស័យយោធាចិនប៉ុណ្ណោះទេ តែក៏ជាមធ្យោបាយដ៏ប្រសើរមួយក្នុងការប្រយុទ្ធប្រឆាំងនឹងភាពអត់ការងារធ្វើរបស់យុវនិស្សិត ទើបបញ្ចប់ការសិក្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
វិស័យយោធាចិន នៅមានភាពយឺតយាវខ្លាំងផ្នែកបច្ចេកវិទ្យា ហេតុដូច្នេះហើយបានជាក្នុងមួយឆ្នាំៗ ចិនត្រូវការជ្រើសរើសនិស្សិត ឲ្យចូលមកបំរើការនៅក្នុងជួរកងទ័ព រយៈពេលយ៉ាងហោចណាស់ពីរឆ្នាំ ជាថ្នូរនឹងការឧបត្ថម្ភថវិកា នៅថ្នាក់ឧត្តមសិក្សារយៈពេល៤ឆ្នាំ។ ជាទូទៅនិស្សិតប្រមាណពី៣០ទៅ៤០% តែងបន្តរក្សាការងារក្នុងវិស័យយោធានេះ លើសពីពីរឆ្នាំ។
គេមិនអាចផ្ទៀងផ្ទាត់ អំពីចំនួននិស្សិតចូលធ្វើកងទ័ពបានទេ ប៉ុន្តែកាលពីឆ្នាំ២០១០ សារព័ត៌មានកងទ័ពប្រជាមានិត បាននិយាយអំពីចំនួន១០ម៉ឺននាក់។ ចំនួនអ្នកបំរើការនៅក្នុងវិស័យយោធា កើនឡើងជារៀងរាល់ឆ្នាំ ពី ជាងបីលាននាក់ នៅឆ្នាំ២០០៥ ដល់ជាង៦លាននាក់នៅឆ្នាំ២០១០។ បើតាមវរៈសេនីយឯកម្នាក់ ទទួលបន្ទុកជ្រើសរើសនាយទាហានថ្មី កងទ័ពប្រជាមានិតចិនដែលជាកងទ័ពដ៏ធំ និងច្រើនជាងគេនៅលើពិភពលោក កំពុងតែផ្តើមប្តូរផ្លាស់ពីកងទ័ពដែលមានបរិមាណច្រើន មកជាទ័ពដែលមានគុណភាព និងពីការប្រើកម្លាំងមនុស្ស មកជាការប្រើកម្លាំងបច្ចេកវិទ្យាវិញ។
ការធ្វើទំនើបកម្មវិស័យយោធាចិន បានធ្វើឲ្យពិភពលោកព្រួយបារម្ភ ជាពិសេសនៅពេលបានឃើញកញ្ចប់ថវិកាប្រចាំសម្រាប់យោធា បានកើនឡើងប្រមាណ១២,៧% នៅឆ្នាំ២០១១នេះ ប៉ុន្តែអាជ្ញាធរក្រុងប៉េកាំងបានអះអាង ថវិកាជាង៩០ពាន់លានដុល្លារនេះ គឺ ផ្តោតយ៉ាងសំខាន់ទៅលើការអភិវឌ្ឍន៍ ផ្នែក យន្តការ និងព័ត៌មានវិទ្យា ដែលចិនស្គាល់ភាពយឺតយាវតែប៉ុណ្ណោះ។
ក្រៅពីត្រូវការយុវនិស្សិតដើម្បីអាចធ្វើទំនើបកម្ម ឲ្យសក្តិសមនឹងយុគសម័យបច្ចុប្បន្ន ការជ្រើសរើសនិស្សិតឲ្យធ្វើទាហាន ត្រូវបានអាជ្ញាធរចិនពន្យល់ថាជាការបង្កាត់វប្បធម៌ ដល់ក្មេងជំនាន់ក្រោយផង និងជាផ្តល់ការងារដល់យុវនិស្សិតទើបបញ្ចប់ការសិក្សាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ