ចិនគ្រោងអនុម័តច្បាប់ឃុំឃាំងដោយសម្ងាត់
ក្រុងប៉េកាំងគ្រោងនឹងធ្វើការកែប្រែច្បាប់ព្រហ្មទណ្ឌរបស់ខ្លួន ដើម្បីអាចមានសិទ្ធិឃុំឃាំងមនុស្ស នៅកន្លែងសម្ងាត់មួយ ដោយស្របច្បាប់បាន។ ជាសំណើច្បាប់ដែលក្រុមអ្នកការពារសិទ្ធិមនុស្ស បានធ្វើការបរិហារយ៉ាងខ្លាំង នៅថ្ងៃសៅរ៍នេះ។
ចុះផ្សាយនៅថ្ងៃ៖
ស្តាប់ - ០១:២០
អត្ថបទច្បាប់ព្រហ្មទណ្ឌថ្មី ដែលនឹងស្នើឡើងនេះ នឹងអនុញ្ញាតឲ្យក្រុមប៉ូលិស រួមសហការជាមួយនឹងរដ្ឋអាជ្ញា អាចធ្វើការឃុំឃាំងមនុស្សនៅក្នុងសំណុំរឿង ដែលមានជាប់ពាក់ព័ន្ធនឹងសន្តិសុខជាតិ ភេរវនិយម និងអំពើពុករលួយធំៗ។ សម្រាប់អាជ្ញាធរក្រុងប៉េកាំង ការឃុំឃាំងមនុស្សនៅក្នុងគេហដ្ឋាន អាចធ្វើឲ្យរំខានដល់ការស៊ើបអង្កេត ហេតុដូច្នេះហើយទើបគេត្រូវនាំជនសង្ស័យ ទៅឃុំទុកនៅក្នុងកន្លែងសម្ងាត់មួយ និងមានសិទ្ធិមិនផ្តល់ព័ត៌មានអ្វីទាំងអស់ដល់ក្រុមគ្រួសារ ព្រោះវាក៏អាចនាំឲ្យប៉ះពាល់ដល់ការស៊ើបអង្កេតដូចគ្នា។
ប្រសិនបើគម្រោងច្បាប់នេះ ត្រូវបានអនុម័តមែន រាល់ការបាត់ខ្លួន របស់សកម្មជនសិទ្ធិមនុស្ស ឬអ្នកប្រឆាំងនឹងរដ្ឋាភិបាលកុម្មុយនិស្ត ដែលកើតឡើងកាន់តែញឹកញាប់ឡើងៗ នឹងក្លាយជារឿងស្របច្បាប់។ នេះជាការព្រួយបារម្ភរបស់អ្នកទទួលខុសត្រូវនៃសមាគមសិទ្ធិមនុស្ស ដែលមានការិយាល័យ នៅហុងកុង។
ក្នុងរយៈពេលប៉ុន្មានខែចុងក្រោយនេះ មេធាវី និងក្រុមអ្នកបះបោរប្រឆាំងរដ្ឋាភិបាលក្រុងប៉េកាំង ជាច្រើននាក់ បានបាត់ខ្លួន និងខ្លះត្រូវអាជ្ញាធរកុម្មុយនិស្តចិន បានចាប់ខ្លួន ដោយហេតុចិនខ្លាចចលនាបដិវត្តន៍នៅពិភពអារ៉ាបឆ្លងចូលប្រទេសរបស់ខ្លួន។ ករណី វិចិត្រករ អៃ វៃវៃ បានទទួលសេរីភាព បន្ទាប់ពីបាត់ខ្លួនបីខែ យ៉ាងសម្ងាត់ ជាឧទាហរណ៍ជាក់ស្តែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ