ប្រធានកងអង្គរក្សលោក ជា ស៊ីម ត្រូវបានសមត្ថកិច្ចចាប់ខ្លួន
ប្រធានកងអង្គរក្សលោក ជា ស៊ីម គឺឧត្តមសេនីយ ឈឿន ចាន់ថន រួមទាំងអង្គរក្សបីនាក់ផ្សេងទៀតត្រូវបានសមត្ថកិច្ចចាប់ខ្លួន នៅព្រឹកថ្ងៃសៅរ៍នេះដោយរឹបអូសបានអាវុធយុទ្ធភណ្ឌជាច្រើនដែល លាក់ទុកក្នុងផ្ទះ។ ការចាប់ខ្លួនប្រធានកងអង្គរក្សនៃមេដឹកនាំកំពូលគណបក្សប្រជាជន កម្ពុជាមិនត្រូវបានគេពន្យល់មូលហេតុច្បាស់លាស់នៅឡើយទេ ប៉ុន្តែ ប្រភពខ្លះថា មកពីឧត្តមសេនីយ៍រូបនេះមានជាប់ពាក់ព័ន្ធនឹងការលាក់ទុកអាវុធ ខុសច្បាប់ និងការរំលោភលើសេចក្តីទុកចិត្ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ឧត្តមសេនីយ៍ឯក ឈឿន ចាន់ថន ហៅ ម៉ៅ ប្រធានកងអង្គរក្សសម្តេច ជា ស៊ីម និងអង្គរក្ស ៣ នាក់ទៀតត្រូវបានកម្លាំងកងរាជអាវុធហត្ថលើផ្ទៃប្រទេស និងរាជធានីភ្នំពេញនាំខ្លួនទៅកាន់ស្នងការដ្ឋាន នៅព្រឹកព្រលឹមថ្ងៃសៅរ៍ទី១៣សីហានេះ។ ផ្ទះរបស់លោកឧត្តមសេនីយ៍ផ្កាយ ៣ ឈឿន ចាន់ថន ក្នុងសង្កាត់បឹងកេងកង៣ ខណ្ឌចម្ការមន រាជធានីភ្នំពេញ ត្រូវបានកងកម្លាំងសមត្ថកិច្ចរាប់សិបនាក់ឡោមព័ទ្ធ ចាប់តាំងពីយប់ថ្ងៃទី១២សីហា ឆ្នាំ២០១១ មកម៉្លេះ ប៉ុន្តែ គេត្រូវរង់ចាំ រហូតដល់ព្រឹកថ្ងៃសៅរ៍នេះ ទើបសមត្ថកិច្ចសម្រុកចូលចាប់នាំខ្លួនលោក ឈឿន ចាន់ថន តែម្តង។
នៅកន្លែងកើតហេតុ កាលពីព្រឹកថ្ងៃសៅរ៍ ទី១៣ សីហា មេបញ្ជាការកងរាជអាវុធហត្ថក្រុងភ្នំពេញ លោក យ៉ា គឹមអ៊ី មិនបានបញ្ជាក់ពីមូលហេតុនៃការចាប់ខ្លួនប្រធានកងអង្គរក្សសម្តេច ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភាប្រាប់អ្នកកាសែតទេ។ លោកមេបញ្ជាការគ្រាន់តែថ្លែងថា នេះជាការអនុវត្តតាមដីការបស់តុលាការប៉ុណ្ណោះ។ ប្រតិបត្តិការនេះធ្វើឡើងដោយមានវត្តមាន លោក មាស ច័ន្ទពិសិដ្ឋ ព្រះរាជអាជ្ញារងសាលាដំបូងរាជធានីភ្នំពេញ។ មន្ត្រីតុលាការរូបនេះក៏បដិសេធមិនអត្ថាធិប្បាយអំពីបញ្ហានេះដែរ។
យ៉ាងណាក៏ដោយ ប្រភពពីសមត្ថកិច្ចបង្ហើបថា ការចាប់ខ្លួនឧត្តមសេនីយ៍ផ្កាយបី ឈឿន ចាន់ថន ធ្វើឡើង ក្រោយពេលដែលឧត្តមសេនីយរូបនេះត្រូវបានដកហូតតំណែងពីមេអង្គរក្សសម្តេចជា ស៊ីម រួចហើយដោយព្រះរាជក្រឹត្យរបស់ព្រះមហាក្សត្រ។ ប្រភពបង្ហើបថា ការចាប់ខ្លួននោះ ជាប់ពាក់ព័ន្ធនឹងការលាក់អាវុធខុសច្បាប់ និងការរំលោភលើសេចក្តីទុកចិត្តក្នុងការប្រើប្រាស់ថវិការបស់សម្តេច ជា ស៊ីមសម្រាប់សាងសង់សមិទ្ធផលផ្សេងៗ ដើម្បីប្រយោជន៍សាធារណៈ។ ប៉ុន្តែ គ្មានព័ត៌មានលម្អិតស្តីពីបញ្ហានេះ នៅឡើយទេ។
សមត្ថកិច្ចក៏បានបង្ហាញសម្ភារៈយោធាជាច្រើន ដែលដកហូតបានពីផ្ទះលោក ឧត្តមសេនីយ៍ឯក ឈឿន ចាន់ថន។ សម្ភារៈទាំងនោះមានដូចជា អាវុធ ១១ ដើម ក្នុងនោះមានអាវុធវែង ៧ ដើម អាវុធខ្លី ៤ ដើម និងគ្រាប់រំសេវ រួមទាំងសម្លៀកបំពាក់យោធាជាច្រើនទៀត។ កាលពីប៉ុន្មានខែមុននេះ ឧត្តមសេនីយ៍យោធាម្នាក់នៃកងយោធពលខេមរភូមិន្ទ ក៏ត្រូវបានចាប់ខ្លួនដែរពីបទបង្កើតកងកម្លាំងប្រដាប់អាវុធខុសច្បាប់៕
ភ្លាមៗ បន្ទាប់ពីការចាប់ខ្លួនមេអង្គរក្សសម្តេច ជា ស៊ីម កាលពីព្រឹកមិញ, លោកនាយករដ្ឋមន្ត្រី ហ៊ុន សែន បានតែងតាំងមេបញ្ជាការថ្មីនៃកងអង្គរក្សការពារប្រមុខដឹកនាំគណបក្សប្រជាជនកម្ពុជា។ លោកឧត្តមសេនីយ៍ ឯក យឹម លាង ត្រូវបានតែងតាំងឲ្យកាន់តំណែងជំនួសលោក ឈឿន ចាន់ថន ដែលត្រូវបានគេចាប់ខ្លួនក្នុងបទរំលោភសេចក្តីទុកចិត្ត និងលាក់អាវុធខុសច្បាប់។ ការតែងតាំងនេះបានធ្វើឡើង តាមរយៈអនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន ប៉ុន្មានម៉ោង ប៉ុណ្ណោះក្រោយការចាប់ខ្លួនលោក ឈឿន ចាន់ថន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ