សេដាកបារម្ភពីកំណើនជីរគីមី ខណៈលោកនាយករដ្ឋមន្ត្រីសាទរ
លោកនាយករដ្ឋមន្ត្រី ហ៊ុន សែន បានប្រកាសអោយដឹងអំពីកំណើននៃការប្រើប្រាស់ជីរគីមីជារៀងរាល់ឆ្នាំនៅក្នុងវិស័យដាំដុះនៅកម្ពុជា។ ប្រមុខរដ្ឋាភិបាលកម្ពុជាបានថ្លែងយ៉ាងនេះនៅក្នុងពិធីសម្ពោធរោងចក្រផលិតជីរគីមីរបស់ក្រុមហ៊ុនវៀតណាមមួយនៅព្រឹកថ្ងៃអង្គារនេះនៅក្នុងស្រុកគៀនស្វាយ។ កំណើនការប្រើប្រាស់ជីរគីមីបានធ្វើអោយអ្នកជំនាញកសិកម្មនៅអង្គការសេដាកព្រួយបារម្ភទៅវិញ។ លោក គាម មករាឌី អ្នកជំនាញរបស់អង្គការសេដាកអះអាងថា ជីគីមីអាចធ្វើអោយខូចខាតដល់គុណភាពដី។
ចុះផ្សាយនៅថ្ងៃ៖
ស្តាប់ - ០១:៣៥
ជីររគីមីជាង៥សែន៥ម៉ឺនតោនត្រូវបាននាំចូលមកក្នុងប្រទេសកម្ពុជា សម្រាប់ការប្រើប្រាស់របស់កសិករខ្មែរនៅក្នុងឆ្នាំ២០១២នេះ។ នេះបើយោងតាមការប្រកាសរបស់លោកនាយករដ្ឋមន្ត្រីហ៊ុន សែននៅព្រឹកថ្ងៃអង្គារនេះ នៅក្នុងពិធីសម្ពោធរោងចក្រផលិតជីរគីមីរបស់ក្រុមហ៊ុនវៀតណាមមួយនៅក្នុងស្រុកគៀនស្វាយ។
លោកនាយករដ្ឋមន្ត្រីបានបន្ថែមថា តម្រូវការនៃការប្រើប្រាស់ជីរគីមីបានកើនឡើងនៅក្នុងឆ្នាំ២០១២នេះ បើធៀបនឹងឆ្នាំ២០១១កន្លងទៅដែលមានបរិមាណជាង៥សែន១ម៉ឺនតោន។ ចំពោះលោកនាយករដ្ឋមន្ត្រី កំណើនការប្រើប្រាស់ជីរគីមីបញ្ជាក់អំពីការរីកចម្រើនផ្នែកបច្ចេកទេសរបស់កសិករខ្មែរក្នុងការធ្វើកសិកម្ម។
អាចជាការរីករាយរបស់ប្រមុខរដ្ឋាភិបាល ក៏ប៉ុន្តែអ្នកជំនាញកសិកម្មរបស់អង្គការសេដាក លោកគាម មករាឌីបានសម្តែងការព្រួយបារម្ភចំពោះកំណើននៃការប្រើប្រាស់ជីរគីមីនេះទៅវិញ។ នាយកកម្មវិធីបរិស្ថាន និងសុខភាពរបស់អង្គការសេដាករូបនេះបានពន្យល់ថា ការប្រើប្រាស់ជីរគីមីត្រូវធ្វើទៅតាមក្បួនខ្នាត។ ក្នុងន័យនេះ ក្រុមហ៊ុនផលិតជីរគីមីត្រូវមានកាតព្វកិច្ចបង្ហាត់បង្រៀនកសិករវិធីនៃការប្រើប្រាស់ជីរគីមី។ អ្នកជំនាញរូបនេះអះអាងថា ការប្រើប្រាស់ជីរគីមីច្រើនអាចធ្វើអោយខូចគុណភាពដី និងជីរវចម្រុះនៅក្នុងដី។
ទោះយ៉ាងណាក៏ដោយ លោកនាយករដ្ឋមន្ត្រីបានអះអាងនៅព្រឹកមិញនេះដែរថា ការប្រើប្រាស់ជីរគីមីនឹងនៅតែបន្តកើនឡើងទៅមុខទៀត។
ចំពោះអ្នកជំនាញអង្គការសេដាក ការជំរុញអោយកសិករប្រើប្រាស់ជីរធម្មជាតិ គឺជាកត្តាចាំបាច់មួយដែលមិនត្រឹមតែជួយរក្សាគុណភាពដីទេ តែវាអាចជួយកាត់បន្ថយចំណាយរបស់ពួកគាត់ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ