កម្ពុជា ប្រកាសអនុវត្តផែនការទសវត្សរ៍សុវត្ថិភាពចរាចរណ៍
រដ្ឋាភិបាលកម្ពុជា ប្រកាសអនុវត្តជាលើកដំបូងនូវទសវត្សរ៍សុវត្ថិភាពចរាចរណ៍ចាប់ពីឆ្នាំ ២០១១ ដល់ឆ្នាំ២០២០ ដើម្បីលើកកម្ពស់សុវត្ថិភាពចរាចរណ៍ ព្រមទាំងការផ្តល់សេវាសង្គ្រោះដល់ជនរងគ្រោះ។ ក្នុងរយៈពេល ១០ ឆ្នាំខាងមុខនេះ រដ្ឋាភិបាលបានដាក់ផែនការថា នឹង កាត់បន្ថយអត្រាគ្រោះថ្នាក់ចរាចរណ៍ឲ្យបាន ៣០ % ដែលអាចសង្គ្រោះជីវិតមនុស្សបានចំនួន ៤.៧០០ នាក់។
ចុះផ្សាយនៅថ្ងៃ៖
ស្តាប់ - ០២:១៨
តាមសេចក្តីប្រកាសព័ត៌មានរបស់រដ្ឋាភិបាល ប្រទេសជាច្រើន រួមទាំងកម្ពុជា កាលពីថ្ងៃទី១១ឧសភា បានប្តេជ្ញាចិត្តចំពោះការអនុវត្តតាមទសវត្សរ៍សុវត្ថិភាពចរាចរណ៍ របស់អង្គការសហប្រជាជាតិ ដើម្បីលើកកម្ពស់សុវត្ថិភាពចរាចរណ៍ និងផ្តល់សេវាសង្គ្រោះ ដល់ជនរងគ្រោះ។
សេចក្តីប្រកាស បានបង្ហាញនូវផែនការ ៧ ចំណុច របស់រដ្ឋាភិបាលកម្ពុជា សម្រាប់ការអនុវត្តទសវត្សរ៍សុវត្ថិភាពចរាចរណ៍សកល រួមមាន ទី១-ការគ្រប់គ្រងសុវត្ថិភាពចរាចរណ៍
ទី២-ហេដ្ឋារចនាសម្ព័ន្ធផ្លូវថ្នល់ ទី៣-យានយន្តប្រកបដោយសុវត្ថិភាព ទី៤-ឥរិយាបថប្រកបដោយសុវត្ថិភាពអ្នកប្រើប្រាស់ផ្លូវ។
ទី៥-ការជួយសង្គ្រោះដល់ជនរងគ្រោះ
ទី៦-ច្បាប់ចរាចរណ៍ និងការរឹតបន្តឹងច្បាប់ និងទី៧-ការផ្តល់ប័ណ្ណបើកបរ។
តាមផែនការទសវត្សរ៍សុវត្ថិភាពចរាចរណ៍ជាសកល ប្រទេសជាសមាជិក រួមទាំងកម្ពុជា ត្រូវកាត់បន្ថយអត្រាស្លាប់ដោយគ្រោះថ្នាក់ចរាចរណ៍ ឲ្យនៅត្រឹមតែ ៥០% នៅត្រឹមឆ្នាំ២០២០។ ប៉ុន្តែសម្រាប់ប្រទេសកម្ពុជា អាចកំណត់ត្រឹមតែ ៣០ % ប៉ុណ្ណោះ ហើយបើតាមការប៉ាន់ស្មាន គឺកម្ពុជាអាចសង្គ្រោះជីវិតមនុស្សចំនួន ៤.៧០០ នាក់ ក្នុងអំឡុងពេល ១០ ឆ្នាំខាងមុខ។
របាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្ហាញថា មានអ្នកស្លាប់ដោយសារគ្រោះថ្នាក់ចរាចរណ៍ចំនួន ១.៨១៦ នាក់ កាលពីឆ្នាំ២០១០។ ចំនួនអ្នកស្លាប់នៅកម្ពុជា ដោយសារគ្រោះថ្នាក់ចរាចរណ៍នេះ កើនឡើងជាងឆ្នាំ២០០៩ ដែលមានអ្នកស្លាប់ត្រឹមតែ ១.៧១៧ នាក់ប៉ុណ្ណោះ។
ចំណែកក្រសួងមហាផ្ទៃ លើកឡើងថា ក្នុងត្រីមាសទី១ ឆ្នាំ២០១១ មានករណីគ្រោះថ្នាក់ចរាចរណ៍ ចំនួន ១.១៨៦ ករណី ក្នុងនោះ មានអ្នកស្លាប់ ៤៦១ នាក់ និងរបួសជាង ២.០០០ នាក់។ ចំនួនគ្រោះថ្នាក់នេះ បានកើនឡើង បើប្រៀបធៀបនឹងឆមាសទី១ ឆ្នាំ២០១០។
តាមការប៉ាន់ស្មាន គ្រោះថ្នាក់ចរាចរណ៍នៅឆ្នាំ២០១០ បានធ្វើឲ្យប្រទេសកម្ពុជាខាតបង់រហូតដល់ ២៧៩ លានដុល្លារ។
ដើម្បីសម្រេចបានផែនការកាត់បន្ថយគ្រោះថ្នាក់ចរាចរណ៍ រដ្ឋាភិបាលបានពង្រឹងលើការអនុវត្តច្បាប់ចរាចរណ៍ ដូចជា ការពាក់មួកសុវត្ថិភាពពេលបើកបរម៉ូតូ អប់រំកុំឲ្យបើកបរហួសល្បឿនកំណត់ និងកុំបើកបរពេលស្រវឹង ជាដើម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ