សហជីពកម្មករជម្រុញឲ្យថៅកែរោងចក្រចូលរួមកិច្ចចរចា
នៅថ្ងៃសុក្រនេះ ក្រុមសហជីពកម្មកររបស់លោកអាត់ ធន់ និងលោកស្រីម៉ម ញឹម បានជួបប្រជុំជាមួយនឹងតំណាងសហជីពកម្មករ ដើម្បីជម្រុញឲ្យថៅកែរោងចក្រកាត់ដេរចូលរួមការចរចា នៅខែធ្នូនេះ លើប្រធានបទ ដំឡើងប្រាក់អត្ថប្រយោជន៍ដល់កម្មករ។ ក្រុមសហជីពកម្មករក៏បានទាមទារឲ្យថៅកែរោងចក្រ ទទួលយកតំណាងសហជីពកម្មករប្រមាណ ៤០០ នាក់ ចូលធ្វើការឡើងវិញ ក្រោយពីកូដកម្ម កាលពីពាក់កណ្តាលខែកញ្ញា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរពីទីក្រុងភ្នំពេញ
បន្ទាប់ពីកិច្ចប្រជុំនៅព្រឹកមិញ លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និងជាប្រធានសហភាពការងារកម្ពុជា CLC បានថ្លែងទៅកាន់ក្រុមអ្នកកាសែតថា កម្មករកាត់ដេរដែលជាប្រធានសហជីពតាម ១៦ រោងចក្រភាគច្រើន នៅស្រុកស្អាង ខេត្តកណ្តាល មិនត្រូវបានថៅកែ អនុញ្ញាតឲ្យចូលធ្វើការឡើយ បើទោះបីជា មានអន្តរាគមន៍ពីរដ្ឋាភិបាល និងមានដីកាបញ្ជាពីតុលាការ ព្រមទាំងមានសំណើពីក្រុមអ្នកបញ្ជាទិញក៏ដោយ។
ក្រោយពីកូដកម្មទាមទារដំឡើងប្រាក់អត្ថប្រយោជន៍ការងារកម្មករកាត់ដេរ និងផលិតស្បែកជើង កាលពីថ្ងៃទី១៣ ដល់ថ្ងៃទី១៦ ខែកញ្ញា ឆ្នាំ២០១០ យ៉ាងហោចណាស់មានសហជីពតំណាងកម្មករជាង ៨០០ នាក់ ត្រូវបានថៅកែរោងចក្រប្តឹងទៅតុលាការ និងបញ្ឈប់ពីការងារ។ មកដល់ពេលនេះ នៅមានកម្មករចំនួន ៣៩៧នាក់ នៅរោងចក្រចំនួន ១៦ ត្រូវបានថៅកែ មិនអនុញ្ញាតឲ្យចូលធ្វើការ ដោយសារតែអ្នកទាំងនោះបានចូលរួមធ្វើកូដកម្ម។
ករណីនេះត្រូវបានលោកអាត់ ធន់ ស្នើឲ្យតុលាការ រដ្ឋាភិបាល និងក្រុមអ្នកបញ្ជាទិញ គួរតែចាត់វិធានការយ៉ាងតឹងរ៉ឹងបំផុត ចំពោះនិយោជកថៅកែរោងចក្រ ដែលមិនបានគោរពតាមបទបញ្ជា ក៏ដូចជាសេចក្តីសម្រេចរបស់តុលាការ ក្នុងការបង្គាប់ឲ្យទទួលយកកម្មករ និងតំណាងសហជីព ចូលធ្វើការជាធម្មតាឡើងវិញ។ ម្យ៉ាងទៀតថៅកែរោងចក្រ ដែលនៅតែបន្តប្តឹងសហជីព ក៏ត្រូវដកពាក្យបណ្តឹង ហើយត្រូវតែចូលរួមតុចរចា ដោយស្មោះត្រង់ និងសន្តិវិធីជាមួយសហជីព នៅក្នុងខែធ្នូនេះ។
សេចក្តីសម្រេចរបស់អង្គប្រជុំសហជីពកម្មករយ៉ាងដូច្នេះ បានធ្វើឡើង តែបីថ្ងៃប៉ុណ្ណោះ ក្រោយពីកិច្ចប្រជុំក្រុមប្រឹក្សាការងារ ដែលដឹកនាំដោយរដ្ឋមន្ត្រីក្រសួងការងារ និងមានការចូលរួមពីតំណាងសហជីពកម្មករ និងភាគីសមាគមរោងចក្រកាត់ដេរ ជួបប្រជុំគ្នា កាលពីថ្ងៃទី៣០ ខែវិច្ឆិកា ឆ្នាំ២០១០។ ជាកិច្ចប្រជុំដែលបានសម្រេចបង្កើតក្រុមការងារចរចា រវាងភាគីថៅកែរោងចក្រ និងភាគីសហជីពតំណាងកម្មករ លើប្រាក់អត្ថប្រយោជន៍កម្មករ ការបន្ថែមលុយថ្លៃបាយ ពេលថែមម៉ោង លុយអតីតភាពការងារ និងប្រាក់រង្វាន់ការងារទៀងទាត់ ដែលត្រូវចាប់ផ្តើមចរចា រយៈពេលបីខែ ចាប់ពីខែធ្នូនេះ។
ក៏ប៉ុន្តែ លោក ជាតិ ខេមរា មន្ត្រីជាន់ខ្ពស់សមាគមរោងចក្រកាត់ដេរកម្ពុជា ដែលតំណាងឲ្យភាគីថៅកែ បានលើកឡើងថា ការជួបចរចាជាមួយនឹងភាគីសហជីពកម្មករ អាចធ្វើទៅបាន នៅក្នុងខែកុម្ភៈ ព្រោះនៅខែធ្នូនេះ ក្រុមថៅកែរោងចក្រ ជាជនបរទេស ជាប់រវល់នឹងបុណ្យណូអែល។
យ៉ាងណាក៏ដោយ លោកអាត់ ធន់ បានព្រមានថា បើគ្មានការចរចាដើម្បីដំឡើងប្រាក់អត្ថប្រយោជន៍ដល់កម្មករកាត់ដេរ ហើយកម្មករតំណាងសហជីព ដែលថៅកែបញ្ឈប់ពីការងារ មិនត្រូវបានថៅកែអនុញ្ញាតឲ្យចូលធ្វើការវិញទេ នៅក្នុងខែធ្នូនេះ នោះសហជីពកម្មករ នឹងត្រូវធ្វើកូដកម្ម ក្នុងទ្រង់ទ្រាយធំ ជាងកូដកម្ម កាលពីពាក់កណ្តាលខែកញ្ញាទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ