អ្នកទេសចរខ្មែរ និងថៃចាប់ផ្ដើមធ្វើដំណើរទៅវិញច្រើនឡើងវិញ
អ្នកទេសចរខ្មែរ និងថៃចាប់ផ្ដើមធ្វើដំណើរទៅវិញច្រើនឡើងវិញ ក្នុងរយៈពេលចុងក្រោយនេះ ជាពិសេស នៅក្នុងឱកាសចូលឆ្នាំសកលឆ្នាំ២០១១ខាងមុខនេះ។ សមាគមទីភ្នាក់ងារទេសចរណ៍កម្ពុជាបានបញ្ជាក់ប្រាប់ នៅថ្ងៃសៅរ៍នេះថា ចំនួនភ្ញៀវខ្មែរដែលគ្រោងទៅកំសាន្តទៅក្នុងប្រទេសថៃ នៅក្នុងឱកាសដំណាច់ឆ្នាំនេះមានការកើនឡើង៧០ភាគរយរីឯភ្ញៀវថៃវិញ ក៏ចូលមកទស្សនាប្រទេសកម្ពុជាច្រើនដែរក្នុងរយៈពេលចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គី សុខលីមពីទីក្រុងភ្នំពេញ
ភ្ញៀវទេសចរជនជាតិខ្មែរ និងជនជាតិថៃបានចាប់ផ្ដើមធ្វើដំណើរកំសាន្តទៅវិញទៅមកកាន់តែច្រើន នៅក្នុងរយៈពេលមួយខែចុងក្រោយនេះ។
លោក អាំង គីមអៀង ប្រធានសមាគមទីភ្នាក់ងារទេសចរណ៍កម្ពុជាបាននិយាយប្រាប់ នៅថ្ងៃសៅរ៍នេះថា ចាប់តាំងពីស្ថានភាពនយោបាយរវាងព្រះរាជាណាចក្រជិតខាងទាំងពីរបានវិលមករកស្ថានភាពប្រសើរឡើងវិញនោះ ប្រជាពលរដ្ឋនៃប្រទេសទាំងពីរក៏បានចាប់ផ្តើមធ្វើដំណើរកំសាន្តទៅវិញទៅមកកាន់តែច្រើនដែរ។ ជាក់ស្តែង នៅក្នុងអំឡុងបុណ្យចូលឆ្នាំសកលនេះចំនួនប្រជាជនខ្មែរដែលគ្រោងទៅកំសាន្តនៅទីក្រុងបាងកកមានការកើនឡើងប្រមាណជា៧០ភាគរយ បើប្រៀបធៀបទៅនឹងរយៈពេលដូចគ្នា កាលពីឆ្នាំមុន។
សម្រាប់ជនជាតិថៃវិញក៏ដូចគ្នាដែរ ពួកគេបានសម្រុកមកទស្សនាប្រទេសកម្ពុជាកាន់តែច្រើន។ លោក អាំង គីមអៀង អ្នកឯកទេសទេសចរណ៍នៅក្នុងប្រទេសកម្ពុជាបានបញ្ជាក់ថា ជារៀងរាល់ថ្ងៃ ប្រជាពលរដ្ឋថៃប្រមាណជា៥០០នាក់បានឆ្លងកាត់តាមច្រកប៉ោយប៉ែតខេត្តបន្ទាយមានជ័យចូលមកក្នុងប្រទេសកម្ពុជាដើម្បីធ្វើដំណើរកំសាន្ត។
ទំនាស់ព្រំដែនរវាងប្រទេសកម្ពុជា និងប្រទេសថៃបានចាប់ផ្ដើមតាំងពីឆ្នាំ២០០៨មកម្ល៉េះ។ ហើយនៅពេលនេះ ដំណោះស្រាយពិតប្រាកដមិនទាន់មានមែន ប៉ុន្តែស្ថានភាពជាទូទៅមានលក្ខណៈល្អប្រសើរជាងពីពេលមុន។
នៅក្នុងអំឡុងពេលមានភាពតានតឹងផ្នែកការទូត ប្រជាពលរដ្ឋនៃប្រទេសទាំងពីរមិនសូវធ្វើដំណើរកំសាន្តទៅវិញទៅមកទេពីព្រោះពួកគេប្រកាន់គំនិតជាតិនិយមរៀងៗខ្លួន។
ជាក់ស្តែង នៅពេលនោះ គេសង្កេតឃើញថា ប្រជាជនខ្មែរភាគច្រើនបានធ្វើដំណើរកំសាន្តទៅកាន់ប្រទេសវៀតណាម និងប្រទេសសិង្ហបុរី ជាជាងធ្វើដំណើរកំសាន្តទៅកាន់ប្រទេសថៃ។
លោក អាំង គីមអៀង ប្រធានសមាគមទីភ្នាក់ងារទេសចរណ៍កម្ពុជាបានបញ្ជាក់បន្ថែមទៀតថា ការលុបចោលទិដ្ឋាការរវាងប្រទេសថៃ និងប្រទេសកម្ពុជាក៏ជាកត្តាជំរុញមួយកម្រិតបន្ថែមទៀតអោយប្រជាជននៃប្រជាជាតិទាំងពីរកាន់តែខិតចូលជិតគ្នាខ្លាំងឡើង។ កាលពីប៉ុន្មានសប្ដាហ៍មុននេះ ប្រទេសទាំងពីរបានរៀបចំពិធីតន្ត្រីចម្រៀងចម្រុះ នៅទីក្រុងបាងកកផងនិងទីក្រុងភ្នំពេញផងក្នុងគោលបំណងចងភ្ជាប់អារម្មណ៍ប្រជាជននៃប្រទេសទាំងពីរឡើងវិញ។
លោក គង់ សុភារ័ក្ស ប្រធាននាយកដ្ឋានស្ថិតិ និងព័ត៌មាននៃក្រសួងទេសចរណ៍ បានបញ្ជាក់នៅថ្ងៃសៅរ៍នេះថា ចំនួនភ្ញៀវទេសចរជនជាតិថៃស្ថិតនៅក្នុងលំដាប់លេខរៀងទី៨ ក្នុងចំណោមប្រជាជន១០ប្រទេសដែលទស្សនាព្រះរាជាណាចក្រកម្ពុជាច្រើនជាងគេនៅឆ្នាំ២០១០នេះ។ ជនជាតិវៀតណាមស្ថិតក្នុងលំដាប់លេខរៀងទីមួយ ជនជាតិកូរ៉េខាងត្បូងស្ថិតក្នុងលំដាប់លេខរៀងពីរនិងជនជាតិចិនស្ថិតនៅក្នុងលំដាប់លេខរៀងទី៣។
នៅឆ្នាំ២០១០នេះ ប្រទេសកម្ពុជានឹងទទួលបានភ្ញៀវទេសចរចំនួន២លាន៥សែននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ