ពលរដ្ឋម្នាក់ទៀតត្រូវអាជ្ញាធរចាប់ដាក់គុកដោយសារចែកចាយសារប្រមាថព្រះមហាក្សត្រតាមហ្វេសប៊ុក
តុលាការសាលាដំបូងខេត្តសៀមរាបកាលពីថ្ងៃទី២០ ឧសភាម្សិលមិញ បានសម្រេចឃុំខ្លួនបុរសវ័យចំណាស់ម្នាក់ទៀតដាក់ពន្ធនាគារបណ្តោះអាសន្ន ដោយចោទប្រកាន់ពីបទប្រមាថព្រះចេស្តារអង្គព្រះមហាក្សត្រ។ នេះ គឺជាករណីទីពីរហើយដែលអាជ្ញាធរកម្ពុជា បានអនុវត្តច្បាប់ថ្មីដាក់ទោសទណ្ឌលើអ្នកដែលជេរប្រមាថព្រះមហាក្សត្រនៅតាមបណ្តាញសង្គមហ្វេសប៊ុក។
ចុះផ្សាយនៅថ្ងៃ៖
ស្តាប់ - ០២:០៧
ជនសង្ស័យថ្មីនេះ មានឈ្មោះថា បាន សម្ភីរ អាយុ៧០ឆ្នាំ មុខរបរជាជាងកាត់សក់ ហើយបច្ចុប្បន្នរស់នៅភូមិពន្លឺព្រះផុស ឃុំកំពង់ក្តី ស្រុកជីក្រែង ខេត្តសៀមរាប។ បុរសវ័យចំណាស់រូបនេះ ត្រូវបានអាជ្ញាធរខេត្តសៀមរាប ហៅមកសាកសួរកាលពីថ្ងៃទី១៩ ឧសភាហើយនៅថ្ងៃទី២០ឧសភា តុលាការខេត្តនេះក៏បានសម្រេចឃុំខ្លួនលោកជាបណ្តោះអាសន្ននៅក្នុងពន្ធនាគារតែម្តង ដោយចោទប្រកាន់ពីបទប្រមាថចំពោះអង្គព្រះមហាក្សត្រ ។
ការសម្រេចឃុំខ្លួននេះ ធ្វើឡើងបន្ទាប់ពីលោក បាន សម្ភីរ តាមរយៈគណនីហ្វេសប៊ុករបស់ខ្លួនកាលពីថ្ងៃទី១៣ ឧសភាកន្លងទៅ បានចែកចាយ(Share)នូវរូបព្រះភ័ក្រព្រះមហាក្សត្រកម្ពុជាសម្តេចព្រះនរោត្តម សីហមុនី និងរូបលោកនាយករដ្ឋមន្ត្រីហ៊ុន សែន និងភរិយា ព្រមទាំងភ្ជាប់ជាមួយវីឌីអូឃ្លីបមួយ ដោយមានប្រជាពលរដ្ឋថ្លែងរៀបរាប់ពីទុក្ខលំបាកក្រោមការធ្វើទុក្ខបុកម្នេញពីអាជ្ញាធរ។ លោកបាន សម្ភីរ បានចែកចាយរូបភាពនេះបន្តពីគណនីហ្វេសប៊ុកមួយទៀតឈ្មោះថា Khmer Thatcher ដែលមានខ្លឹមសារចោទលោកនាយករដ្ឋមន្ត្រីហ៊ុន សែនថាជាភេរវជន និងបានចាត់ទុកព្រះមហាក្សត្រថា ជាព្រះមហាក្សត្រក្លែងក្លាយថែមទៀត។
តាមអាជ្ញាធរខេត្តសៀមរាប លោក បាន សម្ភីរ បានសារភាពថា លោកពិតជាបានចែកចាយបន្តនូវរូបភាព និងខ្លឹមសារនេះពិតប្រាកដមែន។ បើតាមអាជ្ញាធរខេត្តសៀមរាបដដែល លោកបាន សម្ភីរបានអះអាងប្រាប់ថា មូលហេតុដែលលោកធ្វើដូច្នេះ គឺដោយសារតែលោកមិនពេញចិត្តនឹងអង្គព្រះមហាក្សត្រកម្ពុជាបច្ចុប្បន្ន។ នេះបើតាមការចុះផ្សាយរបស់គេហទំព័រអគ្គស្នងការដ្ឋាននគរបាលជាតិកម្ពុជា។
សូមកត់សម្គាល់ថា នេះ គឺជាករណីទីពីរហើយដែលអាជ្ញាធរកម្ពុជាបានអនុវត្តច្បាប់ទៅលើអ្នកដែលប្រមាថអង្គព្រះមហាក្សត្រនៅតាមបណ្តាញសង្គមហ្វេសប៊ុក។ ករណីទីមួយ ធ្វើឡើងទៅលើនាយកសាលាបឋមសិក្សាម្នាក់នៅក្នុងខេត្តកំពង់ធំ ដែលបានសរសេរប្រមាថដល់ព្រះមហាក្សត្រជុំវិញការរំលាយអតីតគណបក្សសង្គ្រោះជាតិនៅលើហ្វេសប៊ុក។ ករណីទាំងពីរនេះ សុទ្ធតែត្រូវបានចោទប្រកាន់តាមមាត្រា៤៣៧ ស្ទួននៃច្បាប់ស្តីពីវិសោធនកម្មក្រមព្រហ្មទណ្ឌ ដែលទើបប្រកាសឲ្យប្រើប្រាស់កាលពីចុងខែកុម្ភៈ។ តាមមាត្រាថ្មីនេះ ជនសង្ស័យទាំងពីរ អាចប្រឈមនឹងទោសជាប់ពន្ធនាគារពី០១ឆ្នាំ ទៅ០៥ឆ្នាំ និងពិន័យជាទឹកប្រាក់ពី២លានរៀល ទៅ១០លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ