ទិវាជនពិការថ្ងៃទី ៣ធ្នូ៖ រដ្ឋាភិបាលលើកឡើងពីគោលនយោបាយ និងកិច្ចគាំពារសម្រាប់ជនពិការ
ទិវាជនពិការកម្ពុជា លើកទី១៦ និងទិវាជនពិការអន្តរជាតិ លើកទី៣២ នាថ្ងៃទី៣ធ្នូស្អែកនេះ នឹងប្រារព្ធឡើងក្រោមប្រធានបទ “ផ្តល់លទ្ធភាពអាចប្រើប្រាស់បាន រួមបញ្ចូលទាំងមុខរបរ ការងារ និងបច្ចេកវិទ្យា ដើម្បីការអភិវឌ្ឍប្រកបដោយនិរន្តរភាព។ សារលិខិត និងសារាចរណែនាំ របស់លោកនាយករដ្ឋមន្ត្រី បានបង្ហាញពីឆន្ទៈ និងការប្តេជ្ញាចិត្តរបស់រដ្ឋាភិបាល ក្នុងការលើកកម្ពស់សិទ្ធិជនពិការ និងលើកទឹកចិត្តដល់ជនរួមជាតិទាំងអស់ ផ្តល់ការគាំទ្រដោយគ្មានការរើសអើង ចំពោះសុខុមាលភាពរបស់ជនពិការ ដែលជាធនធានមិនអាចមើលរំលងបាន។
ចុះផ្សាយនៅថ្ងៃ៖
ស្តាប់ - ០២:១៨
ទិវាជនពិការ ថ្ងៃ៣ធ្នូ ត្រូវប្រារព្ធឡើង ដើម្បីបង្កើនការយល់ដឹងអំពីបញ្ហាពិការភាព ដោយផ្តោតលើការបង្កលក្ខណៈងាយស្រួលដល់ជនពិការនូវលទ្ធភាពប្រើប្រាស់បាននៅតាមទីសាធារណៈ និងឯកជន ក៏ដូចជាការបំផុសឲ្យគ្រប់ក្រសួង ស្ថាប័ន និងវិស័យឯកជនអនុវត្តការជ្រើសរើសជនពិការឲ្យចូលបម្រើការងារ ការហ្វឹកហ្វឺនផ្នែកបរិស្ថាន ទីកន្លែងការងារ មធ្យោបាយ ណិងសម្ភារៈបរិក្ខាជាដើម។
សារាចរណែនាំ និងសារលិខិតរបស់លោកនាយករដ្ឋមន្ត្រីហ៊ុនសែន ក្នុងទិវាជនពិការ ថ្ងៃ៣ធ្នូ ដែលត្រូវបានផ្សព្វផ្សាយ នៅថ្ងៃអង្គារនេះ បានបង្ហាញពីគោលនយោបាយ ផែនការយុទ្ធសាស្ត្រសំខាន់ៗ របស់រដ្ឋាភិបាល ដោយផ្តោតលើការកាត់បន្ថយភាពក្រីក្ររបស់ជនពិការ ការផ្តល់សេវាសុខភាព សមត្ថភាព និងការការពារជនពិការ ជាដើម។
ក្នុងនោះ រដ្ឋាភិបាល បានផ្តល់កម្មសិទ្ធិដីធ្លី និងបានកសាងលំនៅដ្ឋានជូនជនពិការ តាកែនកោះស្លា តំបន់អភិវឌ្ឍន៍ជនពិការ ៣១៧ នៅស្រុកគូលែន ខេត្តសៀមរាប និងនៅភ្នំឆ័ត្រ ខេត្តបន្ទាយមានជ័យ។ រដ្ឋាភិបាល ក៏បានផ្តល់សេវាស្តារលទ្ធភាពពលកម្ម នៅសហគមន៍ ដើម្បីចូលរួមចំណែកជួយដល់ជនពិការក្រីក្រ លើកកម្ពស់ជីវភាព ការអប់រំ ការព្យាបាល ការស្តារលទ្ធភាពពលកម្ម កាយសម្បទា និងការបណ្តុះបណ្តាលវិជ្ជាជីវៈ និងមុខរបរ ជាពិសេសម្រាប់ជនពិការគថ្លង់ និងជនពិការភ្នែកផងដែរ។ រដ្ឋាភិបាល ក៏បានរៀបចំបង្កើតឲ្យមានអក្សរស្ទាប និងភាសាសញ្ញាសម្រាប់ជនពិការភ្នែក និងជនពិការគថ្លង់ ព្រមទាំងបានដាក់បញ្ចូលទៅក្នុងកម្មវិធីសិក្សានៃវិស័យអប់រំ។ល។ និង។ល។
សារលិខិតចុះថ្ងៃទី១ធ្នូ បង្ហាញថា ការទទួលជនពិការចូលបម្រើការងារ នៅតាមក្រសួងស្ថាប័នរដ្ឋ ចំនួន ៤០ គិតត្រឹមពាក់កណ្តាលឆ្នាំ២០១៤ គឺមានជនពិការចូលបម្រើការងារសរុបចំនួន ១.៩៩៩ នាក់ ក្នុងនោះ ពិការកម្រិតធ្ងន់មានចំនួន ៤៦១ នាក់។
ក្នុងទិវាជនពិការ ថ្ងៃ៣ធ្នូ នៅឆ្នាំនេះ លោកនាយករដ្ឋមន្ត្រី ក៏បានបន្តជំរុញដល់គ្រប់ក្រសួង ស្ថាប័នរដ្ឋ និងឯកជន រោងចក្រ សហគ្រាស ត្រូវលើកទឹកចិត្តដល់ជនពិការ ដែលមានលក្ខណៈសម្បត្តិ និងសមត្ថភាពបំពេញមុខងារ និងតួនាទីទទួលខុសត្រូវ ក្នុងមុខតំណែង ឲ្យមានសិទ្ធិចូលបម្រើការងារដោយគ្មានការរើសអើង រាប់ទាំងការបម្រើការងារជាមន្ត្រីរាជការ កម្មករ និយោជិត កូនជាង ឬកម្មសិក្សាការី ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ