ពន្ធដារ ថាខ្លួនពុំជាប់ពាក់ព័ន្ធនឹងការបង្ខំឲ្យម្ចាស់កាសែតខេមបូឌា ដេលីធ្វើលិខិតសុំទោសលោកហ៊ុន សែន
តាមរយៈសេចក្តីបំភ្លឺរបស់ខ្លួនចុះថ្ងៃទី១៥ កញ្ញា អគ្គនាយកដ្ឋានពន្ធដារបានអះអាងថា ខ្លួនពុំមានការជាប់ពាក់ព័ន្ធឫចាប់បង្ខំលោកស្រី Deborah Krisher-Steele ម្ចាស់កាសែតខេមបូឌា ដេលីឲ្យចុះហត្ថលេខាលើលិខិតសុំទោសលោកនាយករដ្ឋមន្ត្រីហ៊ុន សែនឡើយ។ ការបំភ្លឺនេះ បានធ្វើឡើងបន្ទាប់ពីលោក ស្រីDeborah Krisher-Steele បានប្រាប់សារព័ត៌មានថា លោកស្រីបានរងការបង្ខិតបង្ខំឲ្យចុះហត្ថលេខាលើលិខិតសុំទោសលោកហ៊ុន សែន ដើម្បីកុំឲ្យគេធ្វើបាបស្វាមីលោកស្រីដែលកំពុងស្នាក់នៅក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:១៦
អគ្គនាយកដ្ឋានពន្ធដារ បានគូសបញ្ជាក់ថា ខ្លួនគឺជាស្ថាប័នអនុវត្តច្បាប់មិនមែនជាអង្គភាពដែលធ្វើការដោយគ្រាន់តែផ្អែកលើលិខិតសុំទោសមួយសន្លឹក ហើយអនុញ្ញាតឲ្យអ្នកជាប់ពន្ធរួចផុតពីកាតព្វកិច្ចពន្ធដារនោះឡើយ។ ចំពោះករណីដែលលោកស្រី Deborah Krisher-Steele សរសេរលិខិតសុំទោសលោកនាយករដ្ឋមន្ត្រីហ៊ុនសែនវិញ អគ្គនាយកដ្ឋានពន្ធដារអះអាងថា គឺជារឿងផ្ទាល់ខ្លួនរបស់លោកស្រី ហើយអគ្គនាយកដ្ឋានពន្ធដារក៏ពុំមានការពាក់ព័ន្ធ ឬចាប់បង្ខំឲ្យលោកស្រីចុះហត្ថលេខាលើលិខិតសុំទោសណាមួយនោះទេ។ ជាមួយគ្នានេះ អគ្គនាយកដ្ឋានពន្ធដារក៏បានសង្កត់ធ្ងន់ថា ខ្លួនមិនទទួលស្គាល់អ្នកសម្របសម្រួលរូបណាម្នាក់ដែលស្ថិតនៅក្រៅក្របខ័ណ្ឌអគ្គនាយកដ្ឋានពន្ធដារឡើយ ហើយការកំណត់ពន្ធ និងការសម្រេចលើការកំណត់ពន្ធវិញ គឺឈរលើភស្តតាងច្បាស់លាស់ គឺមិនមែនចេះតែមានលិខិតសុំទោសមួយសន្លឹកជាការស្រេច ឫក៏ចេះតែនិយាយថា ជារឿងនយោបាយនោះទេ៕
កាលពីថ្ងៃទី៩ ខែកញ្ញា លោកស្រី Deborah Krisher-Steele បានសរសេរលិខិតមួយជូនទៅកាន់លោកនាយករដ្ឋមន្ត្រីហ៊ុន សែន ដើម្បីសុំឲ្យជួយអន្តរាគមន៍បើកដំណើរការកាសែតឡើងវិញ។ លិខិតនោះ គឺបង្ហាញពីជំហរទន់ភ្លន់មែនទែនសឹងតែមិនគួរឲ្យជឿថាជាលិខិតរបស់កាសែតខេមបូឌា ដេលី។ យ៉ាងណាមិញ នៅថ្ងៃទី១២ ខែកញ្ញា នៅក្នុងប្រទេសជប៉ុន លោកស្រី Deborah Krisher-Steele បានប្រាប់អ្នកសារព័ត៌មានថា លោកស្រីបានរងនូវការបង្ខិតបង្ខំឲ្យចុះហត្ថលេខាលើលិខិតសុំទោសលោកនាយករដ្ឋមន្ត្រីហ៊ុន សែន ដើម្បីកុំគេចាប់ខ្លួនប្តីលោកស្រីដែលកំពុងស្ថិតនៅក្នុងប្រទេសកម្ពុជា។ លោកស្រីចាងហ្វាងកាសែតខេមបូឌា ដេលី ក៏បានគូសបញ្ជាក់ថា លោកស្រីបានចុះហត្ថលេខាលើលិខិតជាភាសាខ្មែរនោះទាំងដែលលោកស្រីមិនដឹងថាមានខ្លឹមសារយ៉ាងម៉េចផង។
បើទោះបីថាមានគេបង្ខិតបង្ខំឲ្យចុះហត្ថលេខាក្តី ប៉ុន្តែលោកស្រី Deborah Krisher-Steele មិនបានបង្ហាញឲ្យដឹងចំតែម្តងទេ ថាតើអ្នកណាក៏ឫស្ថាប័នណាឲ្យប្រាកដនោះ។ នេះបានធ្វើអគ្គនាយកដ្ឋានពន្ធដារសម្តែងការសោកស្តាយដែលម្ចាស់កាសែតខេមបូឌា ដេលីរូបនេះចេះតែចោទប្រកាន់គេឯង ហើយនិយាយមិនមានការទទួលខុសត្រូវបែបនេះ។ តែទោះជាយ៉ាងណា អគ្គនាយកដ្ឋានពន្ធដារក៏បានជំរុញឲ្យលោកស្រី Deborah Krisher-Steele បង្ហាញអត្តសញ្ញាណជនដែលបង្ខិតបង្ខំលោកស្រីនោះដល់សមត្ថកិច្ច ដើម្បីចាត់ការទៅតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ