អ្នកសេដ្ឋកិច្ច៖ខេត្តព្រះសីហនុនឹងបន្តរញ៉េរញ៉ៃមិនក្រោម៥ឆ្នាំទៀតទេ ទើបអាចរៀបចំបានស្រួលបួលឡើងវិញ
អ្នកជំនាញផ្នែកសេដ្ឋកិច្ចនៅកម្ពុជា បានមើលឃើញថា វត្តមានយ៉ាងគំហុកនៃជនជាតិចិននៅក្នុងខេត្តព្រះសីហនុបានបង្កនូវភាពអវិជ្ជមានច្រើនជាងវិជ្ជមាន។ ភាពអវិជ្ជមាន គឺទៅលើបញ្ហាសន្តិសុខ ភាពរញ៉ររញ៉ៃនៃសំណង់អាគារនានា បញ្ហាបរិស្ថាន និងទេសចរណ៍ជាដើម។ បញ្ហាទាំងអស់នេះ ត្រូវបានអ្នកជំនាញសេដ្ឋកិច្ចលើកឡើងថា អាចបន្តកើតមានមិនក្រោម៥ឆ្នាំទៀតទេ ទើបអាចរៀបចំឱ្យបានល្អស្រួលបួលឡើងវិញ។
ចុះផ្សាយនៅថ្ងៃ៖
ស្តាប់ - ០២:៣០
លោកបណ្ឌិត ឆេង គីមឡុង អ្នកជំនាញផ្នែកសេដ្ឋកិច្ច និងជានាយកនៃមជ្ឈមណ្ឌលនវានុវត្តន៍ផ្នែកអភិបាលកិច្ច និងប្រជាធិបតេយ្យរបស់វិទ្យាស្ថានចក្ខុវិស័យអាស៊ីបានបង្ហាញការយល់ឃើញតាមរយៈវិទ្យុបារាំងអន្តរជាតិថា ការអភិវឌ្ឍនៅក្នុងខេត្តព្រះសីហនុនាពេលបច្ចុប្បន្ននេះ គឺប្រហែលជារដ្ឋាភិបាលកម្ពុជាយកគម្រូតាមការអភិវឌ្ឍដំបូងៗនៅក្នុងប្រទេសចិនរបស់លោកតេង ស៊ីពីង។ លោកបណ្ឌិត ឆេង គីមឡុង ពន្យល់ថា រដ្ឋាភិបាលកម្ពុជានឹងបន្តបណ្តោយឱ្យក្រុមហ៊ុនឯកជនវិនិយោគប៉ាតណាប៉ាតណីបែបនេះបន្តទៀតអាចរហូតដល់៥ឆ្នាំឬលើសពីនេះទើបរដ្ឋាភិបាលអាចរៀបចំឱ្យមានរបៀបរៀបរយឡើងវិញ។
ការលើកឡើងរបស់អ្នកជំនាញសេដ្ឋកិច្ចនេះ ធ្វើឡើងស្របពេលដែលសាធារណមតិជាតិ និង អន្តរជាតិមើលឃើញថា ខេត្តព្រះសីហនុកំពុងពេញដោយភាពរញ៉េរញ៉ៃ។ រញ៉េរញ៉ៃដោយសារតែវត្តមានជនជាតិចិនយ៉ាងគំហុកនៅក្នុងខេត្តនេះ។ វត្តមាននៃជនជាតិចិននេះ បានបណ្តាលឱ្យមានបញ្ហាជាច្រើនដូចយ៉ាងបញ្ហាសន្តិសុខ សណ្តាប់ធ្នាប់ បញ្ហាធ្លាក់ចុះនៃភ្ញៀវទេសចរជាតិ-អន្តរជាតិ និងបញ្ហាប្រែប្រួលខ្លាំងនៃវិស័យអចលនទ្រព្យនៅក្នុងខេត្តព្រះសីហនុជាដើម។
លោកបណ្ឌិត ឆេង គីមឡុង បានហៅបញ្ហាទាំងអស់នេះ ថាជាបញ្ហាអន្តរកាលនៃខេត្តព្រះសីហនុ។ សម្រាប់អ្នកជំនាញសេដ្ឋកិច្ចរូបនេះ ដើម្បីអាចស្តារមុខមាត់ខេត្តព្រះសីហនុឡើងវិញបាន គឺរដ្ឋាភិបាលត្រូវរៀបចំបទដ្ឋាននៃសាងសង់ឱ្យច្បាស់លាស់ អនុវត្តច្បាប់គ្រប់គ្រងលើជនបរទេសឱ្យបានត្រឹមត្រូវ ក៏ដូចជា គៀងគរវិនិយោគិនបន្ថែមក្រៅពីជនជាតិចិន។ លោកបណ្ឌិតគី សេរីវឌ្ឍ អ្នកជំនាញផ្នែកសេដ្ឋកិច្ចនៅរាជបណ្ឌិត្យសភាកម្ពុជាវិញក៏យល់ឃើញស្រដៀងគ្នានេះដែរ។ ប៉ុន្តែ លោកបន្ថែមថា អាជ្ញាធរត្រូវតែជំរុញ និងលើកទឹកចិត្តឱ្យសាងសង់អាគារនានាឱ្យបានរួចរាល់ និង រៀបចំហេដ្ឋារចនាសម្ព័ន្ធឱ្យបានរៀបរយ។ ជាមួយគ្នានេះ ក៏ត្រូវបង្កើតនូវព្រឹត្តិការណ៍ផ្សេងៗ ដើម្បីស្រូបយកភ្ញៀវទេសចរជាតិ និងអន្តរជាតិមកកាន់ខេត្តព្រះសីហនុវិញ។
ចំពោះបញ្ហាទាំងនេះ លោកឃាង ភារម្យ អ្នកនាំពាក្យសាលាខេត្តព្រះសីហនុ បានអះអាងថា អាជ្ញាធរតែងតែស្វាគមន៍អ្នកវិនិយោគផ្សេងៗដោយមិនរើសអើងនោះឡើយ។ លោកបន្តថា ខេត្តព្រះសីហនុអាចទាក់ទាញបាននូវវិនិយោគិនបន្ថែមទៀតនាពេលខាងមុខនេះ ព្រោះខេត្តនេះមាននូវតំបន់សក្កានុពលជាច្រើនសម្រាប់ការវិនិយោគ។ ពាក់ព័ន្ធបញ្ហាទេសចរណ៍វិញ លោកឃាង ភារម្យ បានគូសបញ្ជាក់ថា នៅពេលនេះ អាជ្ញាធរខេត្តព្រះសីហនុកំពុងរៀបចំរបៀបរៀបរយ និងសោភណ្ឌភាពឆ្នេរពីរ ដើម្បីទាក់ទាញភ្ញៀវទេសចរជាតិ និង អន្តរជាតិទៅលេងកម្សាន្តឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ