លោក ហ៊ុន សែន៖ លាហើយសង្គ្រាម ក្រោយធ្លាក់ខ្លួនពិការភ្នែករយៈពេល៤៤ឆ្នាំ
លោកនាយករដ្ឋមន្ត្រី ហ៊ុន សែន នៅថ្ងៃទី ១៦ មេសា ដែលត្រូវនឹងថ្ងៃចុងក្រោយនៃពិធីបុណ្យចូលឆ្នាំថ្មីនេះ បានបង្ហោះសាររំលឹកការឈឺចាប់នៃការបាត់បង់ប្រស្រីភ្នែកឆ្វេងរបស់លោកនៅក្នុងសម័យសង្គ្រាមនា ថ្ងៃទី ១៦ មេសា ឆ្នាំ១៩៧៥។ ថ្ងៃទី ១៦ មេសា ១៩៧៥ - ១៦ មេសា ២០១៩ នេះ គឺជាខួប៤៤ឆ្នាំនៃការធ្លាក់ខ្លួនពិការភ្នែកឆ្វេងរបស់លោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
«ថ្ងៃ ១៦ មេសា នេះ គឺជាខួបលើកទី៤៤ឆ្នាំ នៃការធ្លាក់ខ្លួនពិការរបស់ខ្ញុំ (១៦ មេសា ១៩៧៥-១៦ មេសា ២០១៩)។ តាំងពីពេលនោះមក ខ្ញុំមិនដែលនិយាយនឹងមិនមានសិទ្ធិនិយាយពាក្យ (រក្សាការពារដូចការពារប្រស្រីភ្នែក) ទៀតទេ ព្រោះខ្ញុំខ្លួនឯង បានបាត់បង់ប្រស្រីភ្នែកឆ្វេងរួចទៅហើយ»។ ទាំងនេះ គឺជាសំណេរប្រកបដោយភាពឈឺចាប់របស់លោកនាយករដ្ឋមន្ត្រី ហ៊ុន សែន ដែលបង្ហោះនៅលើគណនីយហ្វេសបុករបស់លោក នៅថ្ងៃទី ១៦ មេសានេះ ចំថ្ងៃចុងក្រោយនៃពិធីបុណ្យចូលឆ្នាំថ្មី ប្រពៃណីជាតិ។
តាមរយៈសំណេរនេះ លោកនាយករដ្ឋមន្ត្រី ហ៊ុន សែន បានរៀបរាប់ថា លោកពិតជាឈឺខ្លាំងណាស់ នៅពេលដែលលោកត្រូវរបួស នឹងគ្រូពេទ្យបានវះយកកែវភ្នែកលោកចេញ។ ជាមួយនឹងសំណេរបែបនេះ ប្រមុខរដ្ឋាភិបាលកម្ពុជា លោក ហ៊ុន សែន ក៏បានផ្តាំប្រាប់យុវជនកម្ពុជាថា នេះហើយ គឺជារសជាតិនៃយុវជនក្នុងសម័យសង្គ្រាម។ ខ្លះពលីជីវិត ខ្លះដាច់ដៃដាច់ជើង និងខ្លះពិការភ្នែកជាដើម។ បន្ថែមលើនេះ ប្រមុខរដ្ឋាភិបាលកម្ពុជា លោក ហ៊ុន សែន មិនភ្លេចអំពាវនាវឲ្យប្រជាពលរដ្ឋកម្ពុជា ជួយការពារសន្តិភាពដែលរកបានដោយលំបាក នឹងកុំអោយសង្រ្គាមកើតឡើងជាថ្មី នៅលើទឹកដីកម្ពុជា។
ការរំលឹកម្តងហើយម្តងទៀត ពីការការពារសន្តិភាពពីសំណាក់លោកនាយករដ្ឋមន្ត្រី ហ៊ុន សែននេះ គឺស្របពេលដែលអតីតប្រធានគណបក្សប្រឆាំងលោក សម រង្ស៊ី ដែលកំពុងនីរទេសខ្លួននៅក្រៅប្រទេស បានអំពាវនាវម្តងហើយម្តងទៀត ឲ្យមានការផ្លាស់ប្តូរជាវិជ្ជមាននៅក្នុងប្រទេសកម្ពុជានៅក្នុងឆ្នាំ២០១៩នេះ។ លោក សម រង្ស៊ី កាលពីថ្ងៃទី ១៤ មេសា ដោយភ្ជាប់ជាមួយនូវសារជូនពរដល់ប្រជាពលរដ្ឋកម្ពុជានៅក្នុងឱកាសបុណ្យចូលឆ្នាំថ្មី ក៏បានឆ្លៀតបញ្ចូលសារនយោបាយផងដែរ ដោយលោកសុំឱ្យប្រជាពលរដ្ឋកម្ពុជារួចផុតពីអំណាចផ្តាច់ការដែលលោកចង់សំដៅទៅការគ្រប់គ្រងរបស់លោកនាយករដ្ឋមន្ត្រី ហ៊ុន សែន។ មិនតែប៉ុណ្ណោះ អតីតប្រធានគណបក្សប្រឆាំងរូបនេះ បានភ្ជាប់លោកនាយករដ្ឋមន្ត្រី ហ៊ុន សែន ដែលកាន់អំណាចជាង៣ទសវត្សនៅកម្ពុជា ទៅនឹងបណ្តាមេដឹកនាំផ្តាច់ការនិងកាន់អំណាចយូឆ្នាំនៅលើពិភពលោក និងដែលកំពុងធ្លាក់ចេញពីអំណាចជាបន្តបន្ទាប់។
យ៉ាងណាក៏ដោយ នៅចុងបញ្ចប់នៃសំណេររបស់ខ្លួន លោកនាយករដ្ឋមន្ត្រី ហ៊ុន សែន បានសរសេរឃ្លានៅក្នុងរង្វង់ក្រចកថា «លាហើយសង្គ្រាម ស្វាគមន៍ការអភិវឌ្ឍ» ដែលមានន័យថា លោកមិនចង់ឲ្យប្រទេសកម្ពុជាធ្លាក់ទៅក្នុងសង្គ្រាមជាថ្មី ដែលបានធ្វើឲ្យលោកបាត់បង់ប្រស្រីភ្នែកឆ្វេងនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ