ចូលឆ្នាំថ្មី៖លោកកឹម សុខា បញ្ចេញសារចង់ឱ្យមានដំណោះស្រាយជាវិជ្ជមានឡើងវិញ
នៅព្រឹកថ្ងៃសៅរ៍នេះ ពោល គឺមុនមួយថ្ងៃនៃពិធីបុណ្យចូលឆ្នាំថ្មីប្រពៃណីជាតិចូលមកដល់ លោកកឹម សុខា ប្រធានអតីតគណបក្សសង្គ្រោះជាតិបានចេញសារជូនពរប្រជាពលរដ្ឋខ្មែរ។ លោកជូនពរឱ្យប្រទេសកម្ពុជា និងប្រជាពលរដ្ឋជួបតែក្តីសុខ និង ភាពរីកចម្រើន។ ជាមួយគ្នានេះ លោកកឹម សុខា ក៏សុំឱ្យមានដំណោះស្រាយផ្នែកនយោបាយឡើងវិញផងដែរ។
ចុះផ្សាយនៅថ្ងៃ៖
ស្តាប់ - ០២:១៣
«សូមឱ្យឆ្នាំថ្មីនេះជាឆ្នាំសេរីសួស្តី ឆ្នាំដែលខ្មែរវិលមករកដំណោះស្រាយជាវិជ្ជមានវិញ» នេះគឺជាផ្នែកដ៏សំខាន់មួយនៃសារជូនពរឆ្នាំថ្មីដែលលោកកឹម សុខា បានសរសេរនៅលើទំព័រហ្វេសប៊ុករបស់លោកនៅព្រឹកថ្ងៃទី១៣ ខែមេសា។ ជាមួយគ្នានេះ លោកកឹម សុខា ដែលកំពុងជាប់ឃុំនៅក្នុងគេហដ្ឋាន ក៏បានបួងសួងសុំឱ្យទេវតាឆ្នាំថ្មីកំចាត់ចេញពីកាយ វាចា ចិត្តរបស់មនុស្ស ជាពិសេស អ្នកនយោបាយខ្មែរនូវអកុសលធម៌ទាំងឡាយដូចជា ការលោភលន់គ្មានព្រំដែន ការរំលោភបំពាន ការគំរាមកំហែង អំពើហិង្សា ការមួលបង្កាច់ចោទប្រកាន់ ការលាបពណ៌ ការជេរប្រមាថ និង ការគុំគួនសងសឹកគ្នា។
តាមលោកកឹម សុខា ទាំងអស់នេះ គឺជាមូលហេតុដែលនាំឲ្យមានការឈឺចាប់ ការបែកបាក់ក្នុងសង្គមជាតិ និងនាំឱ្យអាប់ឱននូវតម្លៃពូជសាសន៍ តម្លៃនៃអ្នកដឹកនាំ ជាពិសេសកិត្យានុភាពជាតិ។ បន្ថែមពីលើនេះ លោកប្រធានអតីតគណបក្សសង្គ្រោះជាតិក៏បានសុំឱ្យទេវតាឆ្នាំថ្មីប្រោសប្រទានពរជ័យឱ្យប្រទេសកម្ពុជា មានសុខសន្តិភាព ការរីកចម្រើន ស្ថិតស្ថេរគង់វង់សម្រាប់ប្រជាពលរដ្ឋខ្មែរគ្រប់រូបដែលជាម្ចាស់ទឹកដី និងសូមឲ្យកម្ពុជាចាកផុតគ្រោះថ្នាក់ទាំងឡាយដែលបង្កដោយធម្មជាតិ ឬដោយមហិច្ឆិតាអគតិរបស់មនុស្ស។
សាររបស់លោកកឹម សុខាតាមរយៈទំព័រហ្វេសប៊ុកនេះ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកនាយករដ្ឋមន្ត្រីហ៊ុន សែន ដែលជាប្រធានគណបក្សកាន់អំណាច និង ជាប្រមុខរដ្ឋាភិបាលកម្ពុជាបានចេញសារលិខិតកម្រាស់៥ទំព័រទៅកាន់ប្រជាពលរដ្ឋកម្ពុជា។ ក្នុងសារដ៏វែងអន្លាយនោះ លោកនាយករដ្ឋមន្ត្រីបានលើកបង្ហាញពីសមិទ្ធផលនានាដែលរដ្ឋាភិបាលកម្ពុជាសម្រេចបាននាឆ្នាំកន្លងមក ក៏ដូចជាការរីកចម្រើនលើផ្នែកសេដ្ឋកិច្ចផងដែរ។
ក្រៅពីលើកពីបញ្ហាទាំងនេះ លោកនាយករដ្ឋមន្ត្រីហ៊ុន សែន ក៏បានប្តេជ្ញាធ្វើអ្វីគ្រប់បែបយ៉ាង ដើម្បីបន្តរក្សាការពារសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈឱ្យបានរឹងមាំ ព្រមទាំងការពាររដ្ឋធម្មនុញ្ញ និង ការពាររបបរាជានិយម។ បន្ថែមលើនេះ លោកហ៊ុន សែន ក៏បានបួងសួងសុំឱ្យទេវតាឆ្នាំថ្មីជួយគ្រប់គ្រង ថែរក្សាការពារ និងប្រសិទ្ធពរជ័យដល់ពលរដ្ឋកម្ពុជាគ្រប់រូបឱ្យមានសមានចិត្តជាកុសល យោគយល់គ្នា រួបរួមសាមគ្គីគ្នាជាមហាគ្រួសារខ្មែរតែមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ