ហ្វ៊ុនស៊ិនប៉ិចនឹងបញ្ជូនមេធាវីទៅសិក្សារបាយការណ៍គ្រោះថ្នាក់ចរាចរណ៍លើសម្តេចក្រុមព្រះ
គណបក្សហ្វ៊ុនស៊ិនប៉ិចនៅព្រឹកនេះ បានធ្វើសន្និសីទសារព័ត៌មានមួយបង្ហាញពីស្ថានភាពវិវត្តនៃសុខភាពរបស់សម្តេចក្រុមព្រះដែលកំពុងទទួលការព្យាបាលនៅក្នុងប្រទេសថៃ។ តាមគណបក្សហ្វ៊ុនស៊ិនប៉ិច នៅពេលនេះសម្តេចក្រុមព្រះ បានធូរស្រាលច្រើនពីរបួសហើយ។ គណបក្សហ្វ៊ុនស៊ិនប៉ិចក៏បានអះអាងឲ្យដឹងដែរថា នឹងរៀបចំបញ្ជូនមេធាវីទៅសិក្សាបន្ថែមលើរបាយការណ៍របស់សមត្ថកិច្ចអំពីស្ថានភាពគ្រោះថ្នាក់ចរារណ៍លើសម្តេចក្រុមព្រះ។
ចុះផ្សាយនៅថ្ងៃ៖
ស្តាប់ - ០២:១៩
លោកយូ ហុកគ្រី អនុប្រធានបក្សគណបក្សហ្វ៊ុនស៊ិនប៉ិចបានអះអាងប្រាប់ក្រុមសារព័ត៌មានថា គណបក្សហ្វ៊ុនស៊ិនប៉ិចមិនទាត់ចោលនូវរបាយការណ៍របស់សមត្ថកិច្ចជុំវិញស្ថានភាពគ្រោះថ្នាក់ចរាចរណ៍ដែលកើតឡើងចំពោះសម្តេចក្រុមព្រះ នរោត្តម រណឬទ្ធិ ព្រះប្រធានគណបក្សហ្វ៊ុនស៊ិនប៉ិចឡើយ។ របាយការណ៍អង្កេតបឋមរបស់អគ្គស្នងការនគរបាលជាតិបានបង្ហាញថា ហេតុការណ៍ដែលបានកើតឡើងលើសម្តេចក្រុមព្រះ គឺជាគ្រោះថ្នាក់ចរាចរណ៍សុទ្ធសាធ មិនមែនជាករណីឃាតកម្មនោះទេ។ លោកយូ ហុកគ្រី បានលើកឡើងថា គណបក្សហ្វ៊ុនស៊ិនប៉ិចជឿបណ្តោះអាសន្នលើរបាយការណ៍អង្កេតបឋមនេះ ដោយហេតុថា គណបក្សមិនបានចូលរួមស៊ើបអង្កេតរឿងនេះជាមួយសមត្ថកិច្ច។
ដោយសារតែមិនបានចូលរួមស៊ើបអង្កេតនេះហើយ ទើបគណបក្សហ្វ៊ុនស៊ិនប៉ិចនឹងរៀបចំបញ្ចូនមេធាវីទៅធ្វើការសិក្សាលើរបាយការណ៍នេះបានច្បាស់លាស់ ហើយថា ប្រសិនបើមានការសង្ស័យលើចំណុចណាមួយនោះ នឹងអាចស្នើសុំសមត្ថកិច្ចធ្វើការស៊ើបអង្កេតបន្ថែម។ នេះបើតាមការបញ្ជាក់ពីលោកយូ ហុកគ្រីដដែល។ អនុប្រធានគណបក្សហ្វ៊ុនស៊ិនប៉ិចរូបនេះ ក៏បានអះអាងទៀតថា ចំពោះការដាក់ពាក្យបណ្តឹងទៅកាន់តុលាការលើរឿងគ្រោះថ្នាក់ចរាចរណ៍នេះ គណបក្សមិនទាន់សម្រេចនៅឡើយទេ ដោយរង់ចាំការសម្រេចព្រះទ័យពីសម្តេចក្រុមព្រះ។
សូមបញ្ជាក់ថា សម្តេចក្រុមព្រះនរោត្តម រណឫទ្ធិ បានជួបគ្រោះថ្នាក់ចរាចរណ៍ដ៏រន្ធត់កាលពីថ្ងៃទី១៧ ខែមិថុនាកន្លងទៅ។ គ្រោះថ្នាក់ចរាចរណ៍នេះបានឆក់យកជីវិតអ្នកម្នាងអ៊ុក ផល្លា ចំណែកសម្តេចក្រុមព្រះវិញបានរងរបួសធ្ងន់ធ្ងរ។ នៅពេលនេះ សម្តេចក្រុមព្រះកំពុងទទួលការព្យាបាលនៅក្នុងមន្ទីរពេទ្យមួយក្នុងប្រទេសថៃ។ លោកយូ ហុកគ្រី បានប្រាប់ឲ្យដឹងថា ព្រះរាជសុខភាពរបស់ទ្រង់បានធូរស្បើយច្រើនហើយ ប៉ុន្តែលោកមិនអាចបញ្ជាក់បានទេថាតើសម្តេចក្រុមព្រះនឹងយាងមកប្រទេសកម្ពុជាវិញនៅពេលណានោះ។
យ៉ាងណាក៏ដោយ បើតាមលោកយូ ហុកគ្រី គ្រោះថ្នាក់លើសម្តេចក្រមព្រះនេះ មិនប៉ះពាល់ដល់ដំណើរការរបស់គណបក្សឆ្ពោះទៅកាន់ការបោះឆ្នោតឡើយ ព្រោះគណបក្សបានបង្កើតគណកម្មការមួយដើម្បីដឹកនាំកិច្ចការនេះ។ មិនតែប៉ុណ្ណោះ គ្រោះថ្នាក់នេះក៏មិនបានប៉ះពាល់ដល់ទឹកចិត្តសកម្មជន និងអ្នកគាំទ្រគណបក្សហ៊ុនស៊ិនប៉ិចដែរ ដោយជំនួសមកវិញលោកយូ ហុកគ្រីជឿថា គ្រោះថ្នាក់នេះបានទាញសមានចិត្ត និងការអាណិតអាសូរពីសំណាក់ប្រជាពលរដ្ឋមកលើសម្តេចក្រុមព្រះ និងគណបក្សហ៊ុនស៊ិនប៉ិច។ តាមរយៈលោកយូ ហុកគ្រី សម្តេចក្រុមព្រះពីមន្ទីរពេទ្យក្នុងទីក្រុងបាងកកបានបន្តអំពាវនាវឲ្យប្រជាពលរដ្ឋទៅបោះឆ្នោតឲ្យគ្រប់ៗគ្នានៅថ្ងៃទី២៩ ខែកក្កដា ឆ្នាំ២០១៨ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ