បឹងយក្ខឡោមត្រូវបានបង្កើតទៅជាតំបន់ប្រើប្រាស់ច្រើនយ៉ាង
រដ្ឋាភិបាលកម្ពុជា បានចេញអនុក្រឹត្យ ស្តីពីការបង្កើតតំបន់ប្រើប្រាស់ច្រើនយ៉ាង បឹងយក្ខឡោម ដែលមានផ្ទៃដីសរុប២២៥ហិកតា ស្ថិតក្នុង ក្រុងបានលុង ខេត្តរតនគិរី។ បើតាមអនុក្រឹត្យដែលផ្សព្វផ្សាយនៅថ្ងៃនេះ ការដាក់បឹងដែលមានជម្រៅជ្រៅនេះ ទៅជាតំបន់ប្រើប្រាស់ច្រើនយ៉ាង គឺជាការថែទាំជម្រកសត្វព្រៃ និងប្រព័ន្ធអេកូឡូស៊ី ព្រមទាំងជីវៈចម្រុះ ដើម្បីរក្សាលំនឹងបរិស្ថាន។
ចុះផ្សាយនៅថ្ងៃ៖
ស្តាប់ - ០១:៤៩
យោងតាមអនុក្រឹត្យដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន ផ្ទៃដីតំបន់ប្រើប្រាស់ច្រើនយ៉ាង«បឹងយក្ខឡោម»នេះ មិនរួមបញ្ចូលដីកម្មសិទ្ធិឯកជន និងដីប្រើប្រាស់ជាប្រយោជន៍សាធារណៈនោះទេ។ ក្រសួងមានសមត្ថកិច្ច និងអាជ្ញាធរពាក់ព័ន្ធត្រូវសហការគ្នាធានាការគាំពារបរិស្ថាន ការអភិរក្សប្រព័ន្ធអេកូឡូស៊ី ជីវៈចម្រុះ និងការប្រើប្រាស់ធនធានធម្មជាតិប្រកបដោយនិរន្តភាព។ នេះបើតាមអនុក្រឹត្យចេញថ្ងៃទី១៣មិថុនាដែលទើបត្រូវបានផ្សព្វផ្សាយជាសាធារណៈនៅថ្ងៃនេះ។
ក្នុងអនុក្រឹត្យដែលមានចំនួន៦មាត្រានោះ បានគូសបញ្ជាក់ថា ការដាក់បឹងធម្មជាតិដែលមានជម្រៅជ្រៅជាងគេនេះ ទៅជាតំបន់ប្រើប្រាស់ច្រើនយ៉ាង គឺជាការរួមចំណែកកាត់បន្ថយការប្រែប្រួលអាកាសធាតុ និងលើកទឹកចិត្តឲ្យមានការចូលរួមរបស់សហគមន៍មូលដ្ឋាន ក្នុងការថែរក្សា ការពារអភិរក្ស និងការប្រើប្រាស់ធនធានធម្មជាតិ ដោយនិរន្តរភាព។
កាលពីខែមេសាឆ្នាំនេះ រដ្ឋាភិបាលក៏បានសម្រេចបង្កើតតំបន់គ្រប់គ្រងជលផលសមុទ្រនៅប្រជុំកោះពោធិ៍ និងកោះទន្សាយ ក្នុងខេត្តកែប ដោយមានគោលដៅកំណត់តំបន់គ្រប់គ្រងជលសមុទ្រនៅប្រជុំកោះនេះ និងអភិរក្សធនធានជលផល ជីវចម្រុះ និងប្រព័ន្ធអេកូឡូស៊ីសមុទ្រឲ្យមានប្រសិទ្ធិភាព។
នេះជាការបង្កើតតំបន់អភិរក្សបន្ថែមទៀត បន្ទាប់ពីលោកនាយករដ្ឋមន្ត្រីហ៊ុន សែន នៅថ្ងៃទី៨ខែកុម្ភៈឆ្នាំ២០១៨នេះបានចេញអនុក្រឹត្យបង្កើតឧទ្យានជាតិសមុទ្រកោះរ៉ុងជាផ្លូវការ។ ឧទ្យានជាតិសមុទ្រនេះ មានរាប់បញ្ជូលដូចជាកោះរ៉ុង កោះរ៉ុងសន្លឹម កោះកូន កោះតូច កោះតាទៀម កោះម្នាស់ក្រៅ និងកោះម្នាស់ក្នុង។ តំបន់អភិរក្សនេះ ស្ថិតនៅក្នុងខេត្តព្រះសីហនុ និងខេត្តកោះកុង ដែលមានផ្ទៃដីទំហំជាង ៥ ០០០ ហិកតា និងផ្ទៃទឹកទំហំជាង៤៧ ០០០ ហិកតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ